Xihundla #1: Loko u nyika na wena u ta nyikiwa.

 Vanhu va ta swi xiya leswaku wa hanana naswona swi ta endla leswaku na vona va ku nyika. Bibele yi ri:

•  “Hanyani hi ku nyika, kutani vanhu va ta mi nyika. . . . Xipimo lexi mi pimaka ha xona, va ta mi pimela ha xona na n’wina.”—Luka 6:38.

•  “Ndlela leyi u khomaka van’wana ha yona, na wena u ta khomiwa ha yona.”—Luka 6:38, Contemporary English Version.

 Xihundla #2: Loko u pfuna van’wana, na wena wa pfuneka.

 Ku endlela van’wana leswinene swi endla leswaku u tixixima u tlhela u titwa u enerisekile hikwalaho ko hanana. Bibele yi ri:

•  “Ku nyika swi tisa ntsako lowukulu ku tlula ku amukela.”—Mintirho 20:35.

•  “Loko u endla nkhuvo, rhamba swisiwana, swigono, lava khutaka, lava feke mahlo; kutani u ta tsaka, hikuva a va na nchumu lexi va nga ku tlheriselaka xona.”—Luka 14:13, 14.

 Vantshwa lava khathalaka hi vanhu van’wana va kumeka hinkwako! Xiya swikombiso swin’wana.

 “Minkarhi yin’wana loko ndzi tshame esofeni ndzi ri karhi ndzi hlalela TV, ndzi ehleketa hi vatswari va mina lava nga entirhweni ni ndlela leyi va nga ta va va karhele ha yona loko va vuya ekaya. Hikwalaho, ndzi namba ndzi tlakuka ndzi hlantswa swibya ni ku basisa yindlu. Leswi vatswari va mina va rhandzaka kofi, ndzi va endlela yona. Loko manana a fika ekaya wa ndzi bumabumela a ku: ‘Ku basile la ndlwini naswona ka nun’hwela, ndza nkhensa n’wananga!’ Swa ndzi tsakisa ku vona ndlela leyi vatswari va mina va tsakaka ha yona loko ndzi endle leswinene.”—Casey.

 “Vatswari va mina va ndzi seketerile ni ku ndzi endlela hinkwaswo leswi a ndzi swi kombela. Ndzi tsundzuka lembe leri hundzeke loko movha wa vona wu onhakile, ndzi va nyike mali leswaku va yi yisa eku lunghisiweni hambileswi a ku ri mali yo tala. Eku sunguleni a va pfumelanga ku yi teka kambe ndzi va sindzisile leswaku va yi teka. Swi tele swinene leswi vona va ndzi endleleke swona. Ndzi titwe ndzi tsake ngopfu leswi ndzi nga va pfuna.”—Holly.

 Xana a wu swi tiva? Vantshwa vo tala va Timbhoni ta Yehovha va kuma ntsako hi ku dyondzisa van’wana Bibele. Van’wana va rhurhele ematikweni man’wana laha ku nga ni xilaveko xa vadyondzisi va Bibele.

 “Ndzi suke eUnited States ndzi ya eMexico ku ya pfuna ku dyondzisa van’wana Bibele. Minkarhi yin’wana swa tika ku hanana hi mali kumbe swilo swo karhi hikuva ndzi va ndzi nga ri na swona. Kambe ndzi xiye leswaku loko ndzi nyikela hi nkarhi ni matimba ya mina entirhweni wo chumayela, swi tsakisa ngopfu ku tlula ku nyikela hi nchumu wo karhi.”—Evan.

 Xana u nga swi tsakela ku twa leswaku swi tsakisa njhani ku pfuna van’wana? Xiya swiringanyeto swi nga ri swingani.

 Ku pfuna ndyangu wa ka n’wina:

•  Basisa ekaya, hlantswa swibya kumbe u basisa kamara ra wena u nga kalanga u byeriwa

•  Sweka

•  Tsalela vatswari va wena u va byela ndlela leyi u va rhandzaka ha yona

•  Pfuna makwenu hi ntirho wa xikolo

 Ku pfuna lava nga riki va ndyangu wa ka n’wina:

•  Rhumela munhu la vabyaka khadi

•  Basisela muakelani la dyuhaleke jarata

•  Endzela munhu la tshamaka a ri endlwini hikwalaho ka vuvabyi

•  Xavela munhu la langutaneke ni minkarhi yo tika nyiko

 Lexi nga ku pfunaka: Anakanya hi swilo swo karhi leswi u nga swi endlaka kutani u tivekela pakani ya ku pfuna munhu un’we vhiki leri. U ta hlamala ndlela leyi u nga ta tsaka ha yona!

“Loko u pfuna van’wana na wena wa tsaka. Wa titwa leswaku u kote ku endla swo karhi naswona u vona ndlela leyi van’wana va tlangelaka ha yona. Swi nga endleka loko wa ha sungula ku pfuna van’wana a wu nga swi teki swi ri nchumu kambe sweswi wa swi vona leswaku swi ku nyika ntsako. Leswi u swi endleke a swi nge ku endli u titwa u lahlekeriwe hi swo karhi hikuva u ta vuyeriwa swinene.”—Alana.