•  Hikwalaho ka yini u fanele u hlayisa nkarhi?

•  Leswi u nga swi endlaka

•  Leswi tintangha ta wena ti swi vulaka

•   Nkarhi wu fana ni mali. U ta wu tsundzuka loko u tlanga hi wona. Loko u tirhisa nkarhi hi vutlhari u ta va ni nkarhi wo tala wo endla swin’wana leswi u swi rhandzaka!

   Nsinya wa nawu wa Bibele: “Lolo ri tikombisa ri navela, kambe moya-xiviri wa rona a wu na nchumu. Hambiswiritano, moya-xiviri wa la gingiritekaka wu ta nonisiwa.”​—Swivuriso 13:4.

   Yinhlankulu: Ku tirhisa nkarhi hi vutlhari swi ta ku nyika ntshunxeko wo tala.

•   Ku hlayisa nkarhi i swa nkoka hikuva swi ta ku pfuna ni loko se u kurile. Loko u hlayisa nkarhi swi ta ku pfuna leswaku u nga hlongoriwi entirhweni. Hi xikombiso, a hi nge u na bindzu, xana u nga swi tsakela ku va ni mutirhi loyi a tshamaka a letile?

   Nsinya wa nawu wa Bibele: “Munhu la tshembekeke eka leswitsongo wa tshembeka ni le ka swo tala.”​—Luka 16:10.

   Yinhlankulu: Ndlela leyi u tirhisaka nkarhi ha yona yi kombisa vumunhu bya wena.

 A swi olivi ku hlayisa nkarhi. Xiya swihinga swi nga ri swingani.

 Xihinga #1: Vanghana

 “Loko vanghana va ndzi kombela leswaku ndzi famba na vona ndzi endla tano hambiloko ndzi nga ri na nkarhi lowu ringaneke. Ndzi ti byela leswaku ndzi ta yi tirha hi ku hatlisa mitirho leyi ndzi faneleke ndzi yi endla. Mikarhi yin’wana swa tirha kambe hakanyingi swi ndzi khela matluka.”​—Cynthia.

 Xihinga #2: Swikavanyeto

 “Thelevhixini yi fana ni vacuum cleaner. Ya ku koka hi ku ku kombisa tifilimi ni minongonoko leyi swi tikaka ku yi papalata.”​—Ivy.

 “Ndzi heta tiawara to tala ndzi tirhisa thebulete. Ndzi titwa nandzu hi leswi ndzi tshikaka ku yi tirhisa loko ntsena yi hela betiri.”​—Marie.

 Xihinga #3: Ku veketela mitirho

 “Ndzi ba mariri loko ndzi fanele ndzi endla mitirho ya xikolo kumbe mitirho yin’wana. Ndzi heta nkarhi wo tala ndzi endla swilo leswi nga pfuniki nchumu kukondza ndzi boheka ku endla mitirho ya mina ya xikolo, nkarhi wa mina ndzi wu tirhisa hi vuphukuphuku.”​—Beth.

1.   Tsala mitirho ya wena ehansi. Hi xikombiso swi nga ha katsa mitirho ya le kaya ni ntirho wa xikolo. Tsala nkarhi lowu u faneleke u heta ntirho wa wena evhikini.

    Nsinya wa nawu wa Bibele: “Tiyiseka hi swilo swa nkoka swinene.”​—Vafilipiya 1:10.

2.   Tsala swilo leswi u rhandzaka ku swi endla loko u nga ri bizi hi nchumu. Leswi swi nga ha katsa swilo swo tanihi social networking ni ku hlalela thelevhixini. Tsala nkarhi lowu u wu hetaka evhikini u ri karhi u endla swilo leswi.

    Nsinya wa nawu wa Bibele: “Hambetani mi famba hi vutlhari . . . , mi tixavela nkarhi lowunene.”​—Vakolosa 4:5.

3.   Kunguhata leswi u lavaka ku swi endla. Kambisisa leswi u swi tsaleke. Xana u veke nkarhi lowu ringaneleke wo endla mitirho ya nkoka? Xana u fanele u hunguta nkarhi lowu u wu hetaka u ri eku hungaseni leswaku u endla mitirho ya nkoka?

    Xitsundzuxo: Tsala mitirho leyi u lava ku yi endla siku ni siku.

    Nsinya wa nawu wa Bibele: “Kunene makungu ya lava va gingiritekaka ma endla leswi pfunaka.”​—Swivuriso 21:5.

4.   Swi tirhise. Nkarhi wun’wana u nga huma eka social network leswaku u rhanga u endla swilo swa nkoka. Eku heteleleni u nga ha xiya leswaku u pfulekeriwe hi nkarhi wo tala.

    Nsinya wa nawu wa Bibele: “Mi nga lolohi entirhweni wa n’wina.”​—Varhoma 12:11.

5.   Tinyike nkarhi wo wisa kambe u nga hundzeleti. Muntshwa loyi a vuriwaka Tara u ri: “Mikarhi yin’wana ndzi endla swilo swimbirhi eka swilo leswi ndzi swi tsaleke naswona ndzi nga ha ti byela leswaku ndzi ta teka 15 wa timinete leswaku ndzi hlalela thelevhixini kutani ndzi tlhelela eka ntirho wa mina. Ndzi tikuma ndzi hete timinete ta 30 loko ndzi ku phapha se ndzi hete awara hinkwayo, swi nga si ya kwihi ku va ku hele tiawara timbirhi ndzi ri karhi ndzi hlalele thelevhixini!”

    I yini lexi nga ku pfunaka? Teka vuhungasi ku ri hakelo leyi u yi kumaka loko u endla mitirho ya wena ya siku ni siku.

    Nsinya wa nawu wa Bibele: “A ku na nchumu xo antswa ku tlula leswaku . . . a endla leswaku moya-xiviri wakwe wu vona leswinene.”​—Eklesiasta 2:24.