Van’wana swi va tshikilela ngopfu ku tshama endlwini hikwalaho ka mpfula va nga tivi lexi va nga xi endlaka naswona ku nga ri na laha va nga yaka kona. Muntshwa loyi a vuriwaka Robert u ri, “Hi mikarhi yo fana ni yoleyo, u kuma ndzi lo tshama ndzi nga tivi lexi ndzi nga xi endlaka.”

 Xana u tshame u titwa hi ndlela yoleyo? Loko swi ri tano xihloko lexi xi ta ku pfuna!

•  Leswi u faneleke u swi tiva

•  Leswi u faneleke u swi endla

•  Leswi tintangha ta wena ti swi vulaka

•   Ku tirhisa thekinoloji a swi nge ku pfuni.

    Ku nghena eka inthanete u nga tivi lexi u xi lavaka swi nga ku dyela nkarhi ni ku tlhela swi ku sivela ku tirhisa vuswikoti bya wena naswona swi nga endla leswaku u tshama u phirhekile. Jeremy la nga ni malembe ya 21 u ri, “U tikuma u honolele xikrini, mianakanyo ya wena yi ri eku tsendzelekeni.”

   Muntshwa loyi a vuriwaka Elena, u pfumelelana na yona mhaka yoleyo. U ri, “Swi tele leswi u nga swi endlaka hi ku tirhisa thekinoloji. Swi nga ku hungasanyana kambe loko u swi veka ehansi u to ya u borheka!”

•   Langutelo leri u nga na rona i ra nkoka.

   Swi tele leswi hi nga swi endlaka leswi nga hi pfunaka ku hlula xivundza? Leswi swi titshege hi ndlela leyi u swi rhandzaka ha yona leswi u swi endlaka. Hi xikombiso, muntshwa loyi a vuriwaka Karen u ri: “A ndzi nga xi rhandzi xikolo hambileswi mikarhi hinkwayo a ndzi tshama ndzi ri ni leswi ndzi nga swi endlaka. Leswaku u nga borheki endla mitirho ya wena hi mbilu hinkwayo.”

 Xana a wu swi tiva? “Ku tikuma u nga ri na xa ku xi endla“ a hi xihinga, i nkarhi lowunene wa ku tiletela ni ku tidyondzisa swilo leswintshwa.

 Tsakela ku endla swilo swo hambanahambana. Kuma vanghana lavantshwa. Titolovete ku endla leswintshwa. Lavisisa timhaka letintshwa. Vanhu lava tsakelaka ku endla swilo swo hambanahambana a va borheki loko va ri voxe naswona a va tali ku borha van’wana!

 Nsinya wa nawu wa Bibele: “Hinkwaswo leswi voko ra wena ri swi kumaka leswaku ri swi endla, swi endle hi matimba ya wena.”​—Eklesiasta 9:10.

 “Sweswi ndzi dyondza Xichayina xa Ximandarin naswona ku praktisa ku xi vulavula siku ni siku, swi ndzi pfuna ndzi vona leswi a ndzi kayela swona. Ndzi tsakela ku va ni swo karhi swo swi endla. Swi ndzi pfuna leswaku ndzi tshama ndzi khomekile naswona ndzi wu tirhisa kahle nkarhi wa mina.”​—Melinda.

 Tiva leswi u lavaka ku swi fikelela. Loko u tiva xikongomelo xa leswi u swi endlaka, u ta ya u swi rhandza. Hambi ku ri ntirho wa xikolo wu nga ku tsakisa loko u tiva xikongomelo xa wona.

 Nsinya wa nawu wa Bibele: “Malunghana ni munhu a ku na nchumu xo antswa ku tlula leswaku a . . . endla leswaku moya-xiviri wakwe wu vona leswinene hikwalaho ka ku tikarhata kakwe.”​—Eklesiasta 2:24.

 “Loko lembe ri ya eku heleni a ndzi hlaya tiawara ta nhungu hi siku hikuva a ndzi nga hlayi loko lembe ra ha ku sungula. A swi nga ndzi borhi hikuva mianakanyo ya mina a yi dzike eka swona. A ndzi langutele ku vona minkutlunya ya mina loko lembe ri hela kutani sweswo hi swona leswi a swi endla leswaku ndzi dya buku.”​—Hannah.

 Amukela leswi u nga ta ka u nga swi cinci. Hambi ku ri swilo leswi u swi tsakelaka ngopfu swi nga ha ku borha. Hambi ku ri vanghana va wena va nga ha ku khomisa pala nkarhi wun’wana, va ku siya u nga ha tivi lexi u nga xi endlaka. Ematshan’weni yo pfumelela leswaku xiyimo xolexo xi ku tsanisa, va na ni langutelo lerinene.

 Nsinya wa nawu wa Bibele: “Loyi a nga ni mbilu leyinene u tshama a ri ni nkhuvo.”—Swivuriso 15:15.

 “Munghana wa mina u ndzi byele leswaku ndzi dyondza ku tiphina hambiloko ndzi ri ndzexe. U ndzi byele leswaku un’wana ni un’wana u fanele a dyondza ku tiphina loko a ri ni vanghana va yena ni loko a ri yexe.”​—Ivy.