Micato ya Timbhoni ta Yehovha i nkhuvo lowu xiximekaka lowu nga ni mbulavulo wo koma wa le Bibeleni. Endzhaku ka mbulavulo ku nga ha va ni xinkhubyana lexi katsaka swakudya. a Loko Yesu a sungula ntirho wakwe wo chumayela u ye eka nkhuvo wo tano emutini wa Kana.—Yohane 2:1-11.

•  Ku endleka yini emucatweni?

•  Yi endleriwa kwihi micato ya Timbhoni ta Yehovha?

•  I vamani lava nga taka?

•  Xana ku fanele ku ambariwa njhani?

•  Xana lava rhambiweke va fanele va ta ni tinyiko?

•  Xana ta bananisiwa tinghilazi?

•  Xana vatekani va haxiwa hi rhayisi kumbe swiluva?

•  Xana ku va ni swakudya ni swo nwa?

•  Xana ku va ni vuyimbeleri kumbe ka ciniwa?

•  Xana Timbhoni ta Yehovha ta ti tlangela tianivhesari ta micato?

 Xiyenge xa nkoka i mbulavulo wa mucato lowu tekaka kwalomu ka timinete ta 30 naswona wu nyikeriwa hi nkulu loyi a nga Mbhoni ya Yehovha. Mbulavulo wolowo lowu khutazaka wu kandziyisa ndlela leyi Bibele yi nga pfunaka vatekani va va ni vukati lebyi khomelelaka, va rhandzana ni ku va ni ntsako.—Vaefesa 5:33.

 Ematikweni yo tala, mfumo wu pfumelela nkulu loyi a nga Mbhoni ya Yehovha leswaku a catisa vatekani hi nawu. Xisweswo, loko mbulavulo wu ya eku heleni vatekani va endla swihlambanyo. Va nga ha ambarisana ni swingwavila. Kutani nkulu u tivisa leswaku i nuna ni nsati.

 Eka matiko man’wana, nawu wu lava leswaku vatekani va catela ehofisini ya mfumo. Vatekani va endla leswi ku nga si sungula mbulavulo wa mucato. Loko vatekani va nga endlanga swihlambanyo ehofisini ya mfumo, va nga endla tano loko mbulavulo wu ya eku heleni. Loko va endlile swihlambanyo, va nga hlawula ku tlhela va swi vula hi ndlela leyi kombisaka leswaku se va hlambanyile. Mbulavulo wu gimeta hi xikhongelo laha ku komberiwaka Xikwembu leswaku xi katekisa vatekani lavantshwa.

 Timbhoni to tala ti hlawula ku endla micato ya tona endhawini leyi ti gandzelaka eka yona loko yi ri kona. b Vatekani va ta hlawula ndhawu yin’wana loko va ta va ni xinkhubyana endzhaku ka mbulavulo.

 Loko mucato wu endleriwa eHolweni ya Mfumo ku nga ya un’wana ni un’wana hambi i Mbhoni kumbe a hi Mbhoni. Loko vatekani va ri ni xinkhubyana va hlawula lava nga ta va rhamba.

 Hambiloko ku nga ri na ndlela yo karhi yo ambala loko micato yi endleriwa eHolweni ya Mfumo, Timbhoni ta Yehovha ti tikarhatela ku landzela nkongomiso wa le Bibeleni wo ambala hi ndlela leyi xiximekaka. Ta swi tlangela loko van’wana va endla tano. (1 Timotiya 2:9) I ntiyiso leswaku nsinya wolowo wa nawu wa tirha ni le xinkhubyanini loko vatekani va hlawula ku va na xona.

 Bibele yi hi khutaza ku hanana. (Pisalema 37:21) Timbhoni ta Yehovha ta swi tsakela ku nyika ni ku amukela tinyiko ta mucato. (Luka 6:38) Hambiswiritano, Timbhoni ti papalata ku kombela tinyiko kumbe ku boxa mavito ya lava nyikeleke. (Matewu 6:3, 4; 2 Vakorinto 9:7; 1 Petro 3:8) Hambileswi mhaka leyi yi nga humiki ematsalweni, mikhuva yo tano yi nga endla lava teke va nga tshunxeki.

 Doo! Timbhoni ta Yehovha a ti bananisi tinghilazi hikuva mukhuva wolowo wu huma eka swiendlo swa vukhongeri bya mavunwa. c Timbhoni ti navelela vatekani leswinene hi tindlela tin’wana ku nga ri ku bananisa tinghilazi.

 Doo! Etindhawini tin’wana vanhu va haxa lava ha ku cataka hi rhayisi, swiluva kumbe ni swin’wana. Va tshemba leswaku leswi swi ta endla vatekani swi va fambela kahle, va tsaka ni ku hanya nkarhi wo leha. Kambe Timbhoni ta Yehovha ti papalata swilo leswi fambisanaka ni mihivahivani. Leswi swi katsa ku va navelela njombo, ku nga leswi lwisanaka ni misinya ya milawu ya Bibele.—Esaya 65:11.

 Xiyenge xa mucato lexi endleriwaka eHolweni ya Mfumo a xi katsi swakudya kumbe swo nwa. Vatekani van’wana va hlawula ku va ni xinkhubyana laha ku nga ta va ni swakudya kumbe swo nwa. (Eklesiasta 9:7) Loko va endla xiboho xa leswaku ku va ni byala, va tiyiseka leswaku a byi tali naswona ku nwa lava malembe ya vona ma pfumeleriwaka hi nawu leswaku va nwa.—Luka 21:34; Varhoma 13:1, 13.

 Loko vatekani va ri ni xinkhubyana va nga hlawula leswaku ku va ni vuyimbeleri naswona ku ciniwa. (Eklesiasta 3:4) Vunanga lebyi hlawuriwaka byi fanele byi tsakisa kambe byi ta hambana hi ku ya hi leswi va swi tsakelaka kumbe ndhavuko. Mikarhi yo tala, xiyenge xa mucato lexi endleriwaka eHolweni ya Mfumo xi katsa tinsimu leti nga ni tinhlokomhaka leti humaka eMatsalweni.

 Misinya ya milawu ya Bibele a yi pfumeleli kumbe ku arisa ku tlangela tianivhesari ta micato kambe vatekani lava nga Timbhoni va tihlawulela loko va swi lava kumbe va nga swi lavi ku tlangela tianivhesari ta vona. Loko va hlawula ku endla tano va nga ha tlangela va ri voxe kumbe ni vanghana ni vandyangu.