Vanhu lava a va ri Timbhoni ta Yehovha leti khuvuriweke kambe va nga ha chumayeriki vanhu van’wana, kumbexana va kala va tshika ku tihlanganisa na hina, a hi va papalati. Entiyisweni, hi ringeta hi matimba ku va pfuna leswaku va tlhela va hisekela timhaka ta moya.

 A hi nambi hi n’wi susa evandlheni munhu loyi a endlaka xidyoho lexikulu. Hambiswiritano, loko Mbhoni leyi khuvuriweke yi tshamela ku tlula milawu ya Bibele ya mahanyelo naswona yi nga hundzuki kumbe yi tisola, yi ta papalatiwa kumbe yi susiwa evandlheni. Bibele yi vula hi ku kongoma yi ku: “Susani munhu wo homboloka exikarhi ka n’wina.”—1 Vakorinto 5:13.

 Ku humelela yini hi wanuna loyi a susiweke evandlheni kambe nsati ni vana vakwe va ha riki Timbhoni ta Yehovha? Vuxaka lebyi a a ri na byona na vona hi tlhelo ra vukhongeri bya cinca kambe hi tlhelo ra nyama a byi cinci. Vuxaka bya yena ni nsati wakwe swin’we ni vana vakwe byi ya emahlweni.

 Vanhu lava susiweke evandlheni va nga ta eminhlanganweni ya hina. Loko va swi tsakela, va nga tlhela va kuma ndzayo eka vakulu va vandlha. Xikongomelo xa vakulu i ku va pfuna leswaku va tlhela va faneleka ku va Timbhoni ta Yehovha. Vanhu lava susiweke evandlheni lava tshikaka mahanyelo ya vona yo biha naswona va tiyimiseleke ku hanya hi milawu ya Bibele va amukeleka leswaku va tlhela va va swirho swa vandlha.