Mavunwa: Timbhoni ta Yehovha a ti byi lavi vutshunguri bya madokodela hikuva a ti tshembi leswaku ma nga pfuna.

 Ntiyiso: Hi endla hilaha hi nga kotaka ha kona leswaku hina ni mindyangu ya hina, hi kuma vutshunguri lebyinene. Loko hi ri ni swiphiqo swa rihanyo, hi ya eka madokodela lama nga ni vuswikoti eka vutshunguri ni ku endla vuhandzuri handle ko pompela ngati. Ha byi tlangela swinene vutshunguri lebyi nga kona lebyi antswisiweke. Kahle-kahle, endlelo lerintshwa leri tirhisiwaka ro tshungula Timbhoni ta Yehovha handle ko ti pompela ngati sweswi ri tirhisiwa ni hi vanhu lavan’wana hinkwavo. Ematikweni yo tala, muvabyi un’wana ni un’wana a nga hlawula ku papalata makhombo lama vangiwaka hi ku pomperiwa ngati yo tanihi vuvabyi lebyi nga engatini, ku cinca ka matirhelo ya nsawuto ni makhombo lama nga ha vangiwaka hi swihoxo swa vanhu.

 Mavunwa: Timbhoni ta Yehovha ti tshemba leswaku ripfumelo ri nga endla leswaku munhu a hola.

 Ntiyiso: A hi hanyisi vanhu hi singita.

 Mavunwa: Ku papalata ku pomperiwa ngati swi koxa mali yo tala.

 Ntiyiso: Vutshunguri lebyi nga laviki ku pomperiwa ngati a byi koxi mali yo tala. a

 Mavunwa: Timbhoni to tala ku katsa ni vana va fa lembe ni lembe hikwalaho ko ala ku cheriwa ngati.

 Ntiyiso: Mhaka yoleyo a hi ntiyiso naswona a yi na vumbhoni. Hakanyingi madokodela ma endla vuhandzuri lebyi rharhanganeke byo tanihi vuhandzuri bya mbilu, vuhandzuri bya longo, mahlangano ni ku va munhu a hoxiwa xirho xa un’wana handle ko pompela ngati. b Hakanyingi vavabyi ku katsa ni vana lava tshunguriwaka handle ko cheriwa ngati va hlakarhela ku tlula vanhu lava pomperiweke ngati. c Eka swiyimo leswi hinkwaswo, a nga kona munhu la nga vulaka hi ku tiyiseka leswaku muvabyi u ta fa hikwalaho ko ala ku ku pomperiwa ngati kumbe u ta hanya hikwalaho ka leswi a cheriweke ngati.

 Leyi i mhaka ya vukhongeri ku nga ri ya swa vutshunguri. Testamente ya Khale ni Leyintshwa ti swi veka erivaleni leswaku hi fanele hi papalata ngati. (Genesa 9:4; Levhitika 17:10; Deteronoma 12:23; Mintirho 15:28, 29) Nakambe eka Xikwembu ngati yi yimela vutomi. (Levhitika 17:14) Hikwalaho hi papalata ngati ku nga ri hikwalaho ka leswi hi yingisaka Xikwembu ntsena kambe hileswi hi xi xiximaka tanihi Munyiki wa vutomi.

 Eminkarhini leyi nga hundza madokodela a ma teka ku tshungula handle ko tirhisa ngati swi nga lulamanga, ku ri ku dlaya, kambe langutelo rero ri cincile eka malembe ya sweswinyana. Hi xikombiso, hi 2004, xihloko lexi kandziyisiweke eka magazini wa dyondzo xi vule leswaku “matshungulelo lama tirhisiwaka eka vavabyi lava nga Timbhoni ta Yehovha ma ta hetelela ma ri wona lama nga ta tirhisiwa eka malembe lama landzelaka.” d Xihloko lexi nga eka magazini wa Heart, Lung and Circulation hi 2010 wu vule leswaku “‘vuhandzuri lebyi nga tirhisiki ngati’ a byi fanelanga byi tirhisiwa eka Timbhoni ta Yehovha ntsena, kambe byi fanele byi tirhisiwa eka vanhu hinkwavo lava endliwaka vuhandzuri.”

 Magidi ya madokodela emisaveni hinkwayo ma tirhisa maendlelo lama nga laviki ku pomperiwa ngati leswaku va endla vuhandzuri. Maendlelo yo tano ma tirhisiwa ni le matikweni lama ha hluvukaka naswona vavabyi vo tala lava nga riki Timbhoni ta Yehovha va tsakela ku tshunguriwa hi ndlela yoleyo.