E-e, Timbhoni ta Yehovha a ti humesi vukhume; ntirho wa hina wu seketeriwa hi minyikelo ya ku tirhandzela leyi ku nga boxiwiki leswaku yi huma eka vamani. I yini vukhume naswona ha yini Timbhoni ta Yehovha ti nga byi humesi?

 Xileriso xa ku humesa vukhume kumbe tiphesente ta khume ta swilo leswi munhu a nga na swona a ku ri xin’wana xa swileriso leswi a swi tsariwe eka Nawu wa Muxe lowu a wu nyikiwe tiko ra khale ra Israyele. Hambiswiritano, Bibele yi swi veke erivaleni leswaku Nawu wolowo wa Muxe​—ku katsa ni xileriso xo “hlengeleta vukhume”​—a wu tirhi eka Vakreste.—Vaheveru 7:5, 18; Vakolosa 2:13, 14.

 Ematshan’weni yo va Timbhoni ta Yehovha ti nyikela vukhume ni magandzelo, ti tekelela Vakreste vo sungula naswona ti seketela ntirho wa tona wo chumayela hi tindlela timbirhi: hi ku chumayela ni ku dyondzisa handle ko hakeriwa swin’we ni ku humesa minyikelo ya ku tirhandzela.

 Xisweswo hi landzela nawu wa Bibele lowu nyikiweke Vakreste lowu nge: “Un’wana ni un’wana a a endle hilaha a boheke hakona embilwini yakwe, ku nga ri hi ku vilela kumbe hi ku sindzisiwa, hikuva Xikwembu xi rhandza munyiki la tsakeke.”—2 Vakorinto 9:7.