Hi June 28, 2020, vahuweleri vo tlula 4 000 lava vulavulaka Xitsonga ni vanhu van’wana lava joyineke va tsakile swinene loko Geoffrey W. Jackson, loyi a nga xirho xa Huvo leyi Fumaka Ya Timbhoni ta Yehovha, a humesa Vuhundzuluxeri Bya Matsalwa Yo Kwetsima lebyi pfuxetiweke hi Xitsonga.

Timbhoni leti vulavulaka Xitsonga ti sungule ku kuma Bibele ya Vuhundzuluxeri Bya Misava Leyintshwa yi helerile hi ririmi ra tona hi 1998. * Tibibele to tlula 130 000 ta Vuhundzuluxeri Bya Misava Leyintshwa ti kandziyisiwile hi Xitsonga naswona ti fambiseriwe Timbhoni ta Yehovha to tlula 4 000 leti vulavulaka Xitsonga emisaveni hinkwayo. Hikwalaho ka yini Bibele leyi yi pfuxetiwile? I vamani lava yi kandziyiseke? Hi nga tiyiseka njhani leswaku Vuhundzuluxeri Bya Misava Leyintshwa bya tshembeka? Naswona ku engeteriwe yini eka Bibele leyi leswi nga ta ku pfuna leswaku u “hlomisiwa hi ku helela eka ntirho wun’wana ni wun’wana lowunene”?​—2 Timotiya 3:16, 17.

Leswi tindzimi ti cincaka endzhaku ka malembe yo karhi, i swinene leswaku vuhundzluxeri bya Bibele byi pfuxetiwa leswaku byi ta twisiseka. Vanhu a va pfuneki loko Bibele ya ha tsariwe hi ririmi ra khale leri nga ha twisisekiki.

Eku sunguleni, Yehovha Xikwembu u endle leswaku buku ha yin’we ya le Bibeleni yi tsariwa hi ririmi leri tolovelekeke, leri vanhu a va kota ku ri twisisa. Hi ku landza endlelo leri, Komiti ya Vuhundzuluxeri Bya Bibele Ya Misava Leyintshwa yi humese nkandziyiso wa Xinghezi lowu pfuxetiweke wa Vuhundzuluxeri Bya Misava Leyintshwa hi October 2013. Rito ro rhanga ra nkandziyiso lowu ri ri: “Xikongomelo xa hina a ku ri ku humesa vuhundzuluxeri lebyi vulaka leswi matsalwa yo sungula ma vulaka swona byi tlhela byi twisiseka naswona swi olova ku byi hlaya.”

Nkandziyiso wa Xinghezi wo sungula wa Vuhundzuluxeri Bya Misava Leyintshwa a wu sekeriwe eka nkandziyiso wa New World Translation of the Holy Scriptures​— With References wa Xinghezi wa 1984. Bibele ya Xitsonga leyi pfuxetiweke yi fambisana ni matsalwa yo tala lama pfuxetiweke lama kumekaka eka nkandziyiso wa Xinghezi lowuntshwa, naswona wu antswise nkandziyiso wa Xitsonga leswaku swi olova ku wu hlaya.

Ku engetela kwalaho, ku humesiwa ka nkandziyiso wo sungula wa Xinghezi, ku antswise swo tala eka matwisiselo ya Xiheveru, Xiaramu ni Xigriki​—ku nga tindzimi leti Bibele yi tsariweke ha tona ro sungula. Ku kumiwe leswaku matsalwa ya Bibele lama tsariweke hi voko a ma nga si kumeka loko Vuhundzuluxeri Bya Misava Leyintshwa byi sungula ku kandziyisiwa; matsalwa wolawo a ma ta pfuna vahundzuluxeri va Bibele ku vona mahlayelo lamanene ya matsalwa yo sungula ya Bibele.

Hikwalaho ka sweswo, marito man’wana ma cinciwile leswaku ma fambisana ni leswi swidyondzi swi swi pfumelaka tanihi matsalwa yo sungula lama tshembekaka. Hi xikombiso, hi ku ya hi matsalwa man’wana, Matewu 7:​13 yi hlayeka hi ndlela leyi: “Nghenani hi nyangwa leyo khuma; hikuva gondzo leri yisaka endzovisweni ri anamile ri tlhela ri pfuleka, naswona va tele lava nghenaka ha rona.” Eka nkandziyiso wo sungula wa Vuhundzuluxeri Bya Misava Leyintshwa, rito leri nge “gondzo” a ri nga katsiwanga. Kambe vulavisisi lebyi engetelekeke byi endle leswaku ku fikeleriwa xiboho xa leswaku rito “gondzo” a ri ri kona eka matsalwa yo sungula ya Bibele. Kutani rito rero ri katsiwile eka nkandziyiso lowu pfuxetiweke. Ma tele matsalwa yo tano lama antswisiweke. Hambiswiritano, sweswo a hi xihoxo lexikulu lerova swi nga cinca rungula ra Rito ra Xikwembu.

Ku engetela kwalaho, vukambisisi byin’wana byi paluxe ni tindhawu tin’wana ta tsevu laha vito leri nge, Yehovha, a ri fanele ri humelela eka matsalwa ya Bibele. Tindhawu ta kona ti kumeka eka Vaavanyisi 19:18 na 1 Samuwele 2:​25; 6:3; 10:26; 23:14, 16. Kutani sweswi nkandziyiso wa Xinghezi wa Vuhundzuluxeri Bya Misava Leyintshwa wu hoxe vito leri nge Yehovha mikarhi ya 7 216, ku katsa ni mikarhi ya 237 laha vito leri ri humelelaka kona eka Matsalwa Ya Vukreste Ya Xigriki.

Vuhundzuluxeri Bya Misava Leyintshwa byi kandziyisiwe hi Watch Tower Bible and Tract Society, ku nga nhlangano lowu nga enawini lowu yimelaka Timbhoni ta Yehovha. Se ku hundze malembe yo tlula dzana Timbhoni ta Yehovha ti ri karhi ti fambisela vanhu Tibibele emisaveni hinkwayo. Nkandziyiso wo sungula wa Xinghezi wu humesiwe hi Komiti ya Vuhundzuluxeri Ya Bibele Ya Misava Leyintshwa exikarhi ka 1950 na 1960. Ematshan’weni yo lava ku tiendlela vito, swirho swa komiti yoleyo swi kombele leswaku mavito ya swona ma nga boxiwi hambiloko se swi file.​—1 Vakorinto 10:31.

Hi 2008, Huvo leyi Fumaka ya Timbhoni ta Yehovha yi hlawule ntlawa wun’wana leswaku ku vumbiwa Komiti Ya Vuhundzuluxeri Bya Bibele Ya Misava Leyintshwa. Komiti yoleyo yi nambe yi sungula ntirho wo pfuxeta matsalwa ya Xinghezi, yi kambisise ni matsalwa yo tala lama cinciweke eka Xinghezi hi mpfhuka nkandziyiso wolowo wu humesiwile ro sungula. Nakambe ku kambisisiwe tinhlamulo to tlula 70 000 ta vahundzuluxeri lava katsekeke eku hundzuluxeleni ka Vuhundzuluxeri Bya Misava Leyintshwa hi tindzimi to tlula 120.

Xo sungula, ku hlawuriwe Vakreste vo karhi leswaku va va ntlawa wa vahundzuluxeri. Vukambisisi byi kombise leswaku loko vahundzuluxeri va tirha swin’we tanihi ntlawa ematshan’weni yo tirha ha un’we un’we, va humesa vuhundzuluxeri byo antswa byi tlhela byi twisiseka eka tindhawu hinkwato. (Swivuriso 11:14) Kahlekahle, muhundzuluxeri ha un’we u va a ri ni ntokoto wo hundzuluxela mikandziyiso ya Timbhoni ta Yehovha. Ntlawa wolowo wa vahundzuluxeri wu leteriwa hi ku helela leswaku wu tiva milawu yo hundzuluxela Bibele naswona wu tirhisa tiprogreme to hlawuleka ta khompyuta.

Vahundzuluxeri va tirhise endlelo ro hundzuluxela Bibele leri katsaka ku dyondza marito ya le Bibeleni hi khompyuta. Ndzawulo Ya Vuhundzulexeri leyi nga eNew York, U.S.A., hi yona yi pfuneke vahundzuluxeri. Huvo Leyi Fumaka ya Timbhoni ta Yehovha hi yona yi rhangelaka eka ntirho wo hundzuluxela Bibele naswona yi tirhisa Komiti ya yona ya Vutsari. Kambe, xana ntirho lowu wu endliwa njhani?

Ntlawa wa vahundzuluxeri wu kongomisiwa leswaku wu humesa Bibele leyi (1) pakanisaka yi tlhela yi twisiseka eka vanhu lava nga dyondzekangiki, (2) leyi fambisanaka hinkwayo naswona (3) yi tirhisa ririmi leri kongomeke loko swi koteka. Xana sweswo swi fikeleriwe njhani? Xiya lexi endliweke eka Bibele leya ha ku humesiweka. Ntlawa wa vahundzuluxeri wu sungula ntirho wa wona hi ku pfuxeta marito ya Xitsonga lama tirhisiweke eka nkandziyiso wa khale wa Vuhundzuluxeri Bya Misava Leyintshwa. Progreme ya khompyuta leyi vuriwaka Watchtower Translation System yi kombisa nongonoko wa marito lama fanaka ya Bibele. Yi tlhela yi kombisa marito ya Xigriki kumbe Xiheveru leswaku vahundzuluxeri va kota ku tiva ndlela leyi marito wolawo a ma hundzuluxeriwe ha yona laha a ma humelela kona eBibeleni. Endlelo leri ra pfuna swinene eku pfuxeteni ka marito ya Xitsonga lama fanaka. Hi ku pfuniwa hi endlelo leri, vahundzuluxeri va kota ku tirhisa ririmi ra Xitsonga ra ntumbuluko ni ku tlhela ri twisiseka, va endla tano eka ndzimana yin’wana ni yin’wana.

Swi le rivaleni leswaku ku hundzuluxela a hi ku hoxetela marito ntsena. Ku endliwa matshatshala lamakulu ku tiyiseka leswaku marito ya Xitsonga ma hundzuluxeriwa hi ndlela leyinene leyi fambisanaka ni Matsalwa eka mongo wun’wana ni wun’wana. Ntirho lowu endliweke eka vuhundzuluxeri bya Bibele hakunene wa vulavula. Nkandziyiso wa Xitsonga wa Vuhundzuluxeri Bya Misava Leyintshwa wu endle leswaku Rito ra Xikwembu ri tshembeka eka tsalwa ra khale ni ku endla leswaku ri twisiseka ni ku hlayeka hi ku olova.

Hi ku khutaza leswaku u tikambisisela Bibele ya Vuhundzuluxeri Bya Misava Leyintshwa Bya Matsalwa Yo Kwetsima hi wexe. U nga kota ni ku yi hlaya eka web site kumbe eka JW Library app, kumbe u nga tikumela kopi leyi printiweke evandlheni ra le ndhawini ya ka n’wina ra Timbhoni ta Yehovha. U nga yi hlaya hi ku tiyiseka leswaku marito hinkwayo ya Xikwembu mahundzuluxeriwe kahle hi ririmi ra wena.

Xiengetelo B: Xi katsa swiyenge swa 15 swa mimepe ya mihlovohlovo ni mimpfampfarhutu