Yesu u vule leswaku mahungu lamanene ya Mfumo ma ta chumayeriwa vanhu emisaveni hinkwayo. (Matewu 24:14) Ku sukela hi 1909, minkandziyiso leyi sekeriweke eBibeleni leyi kandziyisiwaka hi Timbhoni ta Yehovha a yi hundzuluxeriwa hi ririmi ra Xipaniya, naswona a yi pfuna vanhu emisaveni hinkwayo leswaku va twa rungula ra Mfumo hi ririmi ra vona ra manana. Sweswi Xipaniya xi le ndhawini ya vumbirhi hi nhlayo ya vanhu lava xi vulavulaka tanihi ririmi ra manana, Xichayina xi le ndhawini yo sungula, naswona emisaveni hinkwayo vanhu va kwalomu ka hafu ya biliyoni va vulavula Xipaniya.

William, un’wana wa vahundzuluxeri va Xipaniya, u te: “Xipaniya i ririmi ra misava hinkwayo, ri vulavuriwa ematikweni yo tala naswona xi ni mindhavuko yo tala. Xikongomelo xa hina i ku hundzuluxela hi ndlela leyi nga ta khumba timbilu ta vahlayi lava nga ni swiyimo ni dyondzo yo hambanahambana swin’we ni swigwili ni swisiwana.” Leswaku hi kota ku langutana ni ntlhontlho wo fikelela vahlayi vo hambanahambana hi ndlela yoleyo, ntlawa wa hina wa vahundzuluxeri wu vumbiwa hi swirho leswi humaka eArgentina, eColombia, aEl Salvador, eGuatemala, eMexico, ePuerto Rico, eUnited States, eUruguay, eVenezuela ni le Spain.

Ku ringana makume ya malembe, Timbhoni ta Yehovha a ti hundzuluxela Xipaniya eUnited States ti pfuniwa hi vahundzuluxeri lava nga Timbhoni lava nga eArgentina, eMexico ni le Spain. Hambiswiritano, hi 1993, vahundzuluxeri va Xipaniya va rhurhele ePuerto Rico, leswi endleke leswaku hinkwavo ka vona va tirha swin’we endhawini yin’we.

Hi March 2012, ku tekiwe xiboho xa leswaku Ndzawulo ya Vuhundzuluxeri bya Xipaniya yi rhurha nakambe, naswona se a yi ta rhurhela erhavini ra Timbhoni ta Yehovha ra le Spain. Edward u te: “A ku nga ta rhurhisiwa vanhu, nhundzu ya vona ni michini ntsena, kambe a hi ta rhurha swin’we ni xitirhisiwa xin’wana xa ndzawulo ya hina, ku nga layiburari.” Layiburari ya kona yi ni tibuku ta kwalomu ka 2 500 ku katsa ni madzana ya Tibibele ta Xipaniya.

Hi May 29, 2013, swirho swa Ndzawulo ya Vuhundzuluxeri ya Xipaniya swi fikile ekaya ra swona lerintshwa naswona swi amukeriwe hi mandla mambirhi hi ndyangu wa Bethele ya le Spain. Ku hlela lokunene ni ku tirha hi matimba swi endle leswaku vahundzuluxeri, tibuku ni michini swi kota ku tsemakanya Lwandle ra Atlantiki naswona ku kandziyisiwa ka minkandziyiso ya Xipaniya ya Timbhoni ta Yehovha a ku kalanga ku kavanyeteka lerova swi xiyiwa hi vahlayi. Edward u te: “Lexi nga xa nkoka eka hina i rungula ra Mfumo naswona hi lava vanhu vo tala lava vulavulaka Xipaniya va ri hlaya.”