Hi July 2009, Timbhoni ta Yehovha ti xave xitandi en’walungwini wa New York hi xikongomelo xo rhurhisa ntsindza wa tona wa misava hinkwayo. Xitandi xexo lexi nga tihekitara ta 102 xi le ndhawini leyi nga kwalomu ka tikhilomitara ta 80 en’walungu-vupela-dyambu bya ntsindza wa tona wa sweswi eBrooklyn le New York, laha ti nga kona ku sukela hi 1909.

Timbhoni ta kwalomu ka 800 ti ta tshama ni ku tirha entsindza wolowo lowuntshwa, lowu nga ta katsa muako lowu nga ni tihofisi to tirhela eka tona, muako lowu nga ta tirhiseriwa mintirho yo hambana-hambana ni miako ya mune yo tshama eka yona. Ku hleriwe ni ku akiwa muziyamu leyitsongo leyi nga ta kombisa matimu ya namuntlha ya Timbhoni ta Yehovha.

Miako hinkwayo leyi nga ta akiwa yi ta teka tihekitara ta 18 ta xitandi xexo ivi khwati leri rhendzeleke xitandi ni ndhawu leyi nga nhlangasi yi tshikiwa yi ri tano. Rivala ra xitandi a ri nge vi ni tindhawu letikulu leti byariweke byanyi. Ematshan’weni ya sweswo, ri ta tshikiwa ri fana ni ndhawu leyi ri nga eka yona ya makhwati.

Vampfampfarhuti va tipulani va endle leswaku miako leyi yi londzovota gezi ni mali, xisweswo ku hungutiwa ku onhiwa ka ndhawu swin’we ni swikoxo swa ku yi tirhisa. Hi xikombiso, lwangu ra kona ri ta funengetiwa hi swimilana swo tiya leswi nga khathaleriwiki ngopfu, xisweswo ku hungutiwa ku khuluka ka mati ya mpfula ni ku endla leswaku mpimo wa ku hisa ni ku titimela endzeni ka miako wu nga cinca-cinci. Ndlela leyi muako lowu nga ni tihofisi wu endliweke ha yona wu ta endla leswaku ku vonakala ka dyambu ku wu voningela. Mati na wona ma ta londzovotiwa.

I yini leswi susumeteleke Timbhoni ku va ti kunguhata ku rhurha? Marhavi ya Timbhoni ta Yehovha ematikweni man’wana sweswi ma pfuneta entirhweni wo gandlisa Tibibele ni minkandziyiso leyi sekeriweke eBibeleni, ku nga ntirho lowu eku sunguleni a wu endliwa eBrooklyn ntsena. Hi 2004, ntirho wo gandlisa ni wo rhumela tibuku wu rhurhiseriwe eWallkill le New York, leyi nga ekule hi tikhilomitara ta kwalomu ka 145 en’walungu-vupela-dyambu bya Brooklyn.

Xivangelo xin’wana a ku ri hunguta swikoxo. Swa durha ku va ni miako ni ku yi khathalela eBrooklyn. Kutani ku va Timbhoni ti rhurhela emuakweni lowutsongo, swi ta endla leswaku mali ya tona ti yi tirhisela ku seketela ntirho wa tona wo dyondzisa vanhu Bibele.

Ku laveka leswaku ndhawu yi kamberiwa hi vativi va mbango emahlweni ko va ku humesiwa papila ro hetelela ro pfumelela ku va ku akiwa. Loko swilo hinkwaswo swo famba kahle, ntirho wo aka wu ta sungula hi 2013 naswona wu ta hetiwa endzhaku ka malembe ya mune.

Handle ka ndhawu yo gandlisa leyi nga eWallkill le New York, Timbhoni ta Yehovha ti ni ndhawu yo dyondzela eka xona ePatterson le New York. Nhlengeletano yi kongomisa marhavi ematikweni yo tala. Emisaveni hinkwayo, ku ni Timbhoni leti tlulaka 7,5 wa timiliyoni.