Eku sunguleni ka July 2013, ntlawa wa Timbhoni ta Yehovha ta 28 eBrazil wu teke riendzo ro suka edorobeni ra São Félix do Xingu wu ya endhawini leyi ku tshama Maindiya ya Macayapo ni ya Mayuruna. Hi ku tirhisa xikepe lexi leheke timitara ta 15, wu tlute eNambyeni wa Xingu, lowu khulukaka tikhilomitara ta 2 092 hi le n’walungwini wu kala wu fika eNambyeni wa Amazon.

Ntlawa lowu wu teke riendzo leri leswaku wu ya va chumayela hi Mfumo wa Xikwembu vanhu lava tshamaka eswimitanini leswi nga etlhelo ka nambu lowu. Hi siku ra vunharhu, wu fike eximutanini xa Kokraimoro. Wu amukeriwe hi vanhu vo n’wayitelaka lava nga ni malwandla. Wansati un’wana loyi wu hlanganeke na yena a a ri karhi a kowetela swinene. Munhu un’wana wa le ximutanini xexo loyi a a famba ni ntlawa wolowo u wu hlamusele leswi wansati yoloye a a vula swona: “Ku kowetela ka yena ku vula leswaku, ‘Tanani hinkwenu. Hi lava ku mi tiva!’ ”

Timbhoni ti vulavule ni vanhu hinkwavo​—van’wana hi Xiputukezi kasi van’wanyana hi mavoko ni ku koweta kunene. Swifaniso swa mivalavala leswi nga eminkandziyisweni leyi sekeriweke eBibeleni leyi ti teke na yona yi pfune swinene naswona vanhu vo tala eswimitanini sweswo va yi tekile, ngopfu-ngopfu broxara leyi nge Yingisa Xikwembu.

Loko Gerson, phayona ro hlawuleka eSão Félix do Xingu, a hlamusela ndlela leyi munhu un’wana wa kwalaho a wu amukeleke ha yona nkandziyiso lowu nge Buku Yanga Ya Timhaka Ta Bibele, u te: “U wu langutile kutani a wu khoma hi mavoko mambirhi a wu tiyisa; a a nga lavi ku wu veka ehansi hambi ku ri swa xinkarhana.”

Timbhoni ta Yehovha ti siyele vanhu lava tshamaka eswimitanini leswi nga etlhelo ka nambu tibuku, timagazini ni tibroxara ta kwalomu ka 500. EKawatire, vaaki va kona va yingisele hi vurhon’wana loko va hlayeriwa hi xitshembiso xa le Bibeleni xa misava leyi nga paradeyisi. Tonjaikwa, Muindiya wa Mucayapo la nga ni malwandla, u te: “EParadeyisini, vanhu va ta hanya ku fana na hina.”

Vanhu vo tala edorobeni ra São Félix do Xingu a va twile hi ta riendzo leri. Simone, un’wana wa lava tekeke riendzo leri, u vule leswaku vanhu van’wana lava humaka edorobeni rero a va nga tshembi kahle leswaku yena swin’we ni Timbhoni-kulobye a va ta amukeriwa eswimitanini sweswo. Hambiswiritano, a ku vanga na xiphiqo. Simone u te: “Hi amukeriwile naswona hi chumayele vanhu hinkwavo.”