Vaendzi va magidi lava teke eka xiendlakalo xa minkombiso ya 2014 eRouen, en’walungu wa France, va kokiwe mahlo hi nkombiso wa Bibele ku nga wun’wana wa minkombiso leyi a yi ri kona, lowu a wu ri ni nhlokomhaka leyi nge “Bibele—Tolo, Namuntlha Ni Mundzuku.”

Vaendzi vo tala va kokiwe mahlo hi vhidiyo leyi hlamuselaka Bibele ya khale leyi tsariweke hi voko leyi a yi kombisiwa eka swikirini leswi a swi ri ehandle ka ndhawu yoleyo ya nkombiso wa Bibele. Loko va nghena endzeni, a va dyondza ndlela leyi Bibele yi pfunaka ha yona, matimu ya yona, ndlela leyi pakanisaka ha yona etimhakeni ta sayense ni ndlela leyi kumekaka ha yona hi xitalo.

Nkombiso lowu wu tlhele wu komba ndlela leyi Bibele yi poneke ha yona emalembeni yo tala lama hundzeke leswi endlaka leswaku sweswi vahlayi va tibiliyoni va kota ku yi kuma yi kandziyisiwe hi tindlela to hambanahambana ni hi swivumbeko swa elektroniki. Vaendzi va kume kopi ya mahala ya Bibele ya Vuhundzuluxeri Bya Misava Leyintshwa, leyi kandziyisiweke hi Timbhoni ta Yehovha hi tindzimi to tlula 120.

Vaendzi vo tala va tlangele matshalatshala ya Timbhoni yo endla leswaku vanhu va kuma Bibele. Mutirhi un’wana wa xisati loyi a tirhaka ku pfuna vantshwa loyi a a hlalele nkombiso eka xikirini ni ntlawa wa vantshwa lava a a famba na vona, u te: “Bibele i ndzhaka ya hina. I buku leyi pfunaka. Nkarhi ni nkarhi loko ndzi yi hlaya, ndzi kuma ndlela leyi ndzi nga langutanaka ni swiphiqo swa mina ha yona.”

Kokwana un’wana loyi a nga ni malembe ya 60 u hlamarisiwe hi leswaku a nga kuma Bibele mahala. U te: “Hinkwerhu hi fanele hi yi hlaya hikuva i ya nkoka evuton’wini bya hina!”