Graham Browne, Mbhoni ya Yehovha leyi nga ni malembe ya 80, u pfune wanuna la nga hanyangiki kahle emiehleketweni loyi a a lava ku ticukumetela ehansi ku suka eka muako wa Sky Tower lowu leheke timitara ta 328 eAuckland, le New Zealand. Graham u ri: “Wanuna loyi u kombele ku vulavula ni Mbhoni ya Yehovha kutani maphorisa ma ndzi vitanile leswaku ndzi ta n’wi pfuna.

“Vatirhi va kwalaho, va ndzi bohe hi mabandhi ya vuhlayiseki, va tlhela va boha ni Bibele ya mina. Kutani maphorisa ma ndzi yise ehandle laha wanuna yoloye a ri kona ku nga timitara ta 192 ku suka ehansi. A ku hunga moya wo titimela swinene. Wanuna loyi a a xungeta ku tilahlela ehansi a a tshame ekulenyana na mina, a ri karhi a lenga-lengisa milenge.

“Ndzi huwelerile ndzi vula leswaku ndzi Mbhoni ya Yehovha naswona ndzi lava ku n’wi pfuna. Kutani ndzi endle xikhongelo xo koma embilwini ivi ndzi sungula ku n’wi hlayela tindzimana ta Bibele leti chavelelaka.

“Ndzi n’wi byele hi ndlela leyi vutomi byi nga bya risima ha yona, ku nga mhaka leyi a ndza ha ku vulavula hi yona eHolweni ya Mfumo.

“Ndzi te: ‘Xikwembu xi ku teka u ri wa nkoka naswona xi ku nyike nyiko ya risima, ku nga vutomi. Ha yini u nga xi kombi leswaku wa yi tlangela nyiko yoleyo? Ndzi kombela u ta haleno endhawini leyi hlayisekeke.’

“Ndzi hlaye tindzimana to hlayanyana ku katsa na Yohane 3:16, leyi nge: ‘Hikuva Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.’

“Ndzi te: ‘Xikwembu xa ku rhandza naswona xi lava leswaku u hanya.’

“Eku sunguleni wanuna loyi a a tikomba a nga ndzi yingiselanga. Hiloko ndzi khongela hi mbilu eka Yehovha leswaku a ndzi pfuna ku khorwisa wanuna loyi leswaku a nga tidlayi. U hetelele a tshinela hakatsongo-tsongo naswona a a languteka a karhatekile swinene.

“U te: ‘A hi khale Timbhoni ta Yehovha ti te ekaya ra mina kambe ndzi ti hlongorile, mbilu ya mina ya vava hileswi ndzi swi endleke. Ndzi kombela ndzivalelo.’

“Ndzi n’wi chavelerile ndzi ku: ‘A wu dyohanga nchumu, hambi ku ri van’wana va hina hi tshame hi swi endla sweswo loko hi nga si va Timbhoni. Tiyiseka leswaku Yehovha u ta ku rivalela.’

“U te: ‘Inkomu, u ndzi pfunile eka ntshikilelo lowu a ndzi ri na wona.’

“Ndzi ye emahlweni ndzi ku: ‘Mina ndzi bohiwe hi mabandhi ya vuhlayiseki kambe wena ndzi chava leswaku loko wo wa u ta lahlekeriwa hi vutomi bya wena bya risima. Sweswo swi ta twisa Yehovha ku vava. Ndzi kombela u ta haleno endhawini leyi hlayisekeke.’

“A ndzi xiya leswaku a nga ha karhatekanga. Hi moya wo rhula u te, ‘Hi swona, ndzi ta endla tano.’

“U tile laha a ndzi ri kona hiloko maphorisa ma n’wi teka ma n’wi yisa endhawini leyi hlayisekeke. Ndzi hete kwalomu ka awara ndzi ri karhi ndzi vulavula na yena.”

Timbhoni ta Yehovha ta khathala swinene hi vanhu, ngopfu-ngopfu lava tshikilelekeke. Ti pfuna vanhu emisaveni hinkwayo hi ku tirhisa Matsalwa leswaku va va ni ntshembo ni ku va chavelela, ti tlhela ti va tiyisekisa leswaku Xikwembu xa va rhandza.