Wansati un’wana wa le Ukraine loyi a a yingisele papila ra nkoka leri hlayiweke hi Stephen Lett loyi a nga xirho xa Huvo leyi Fumaka ya Timbhoni ta Yehovha, u te: “Hi kombisiwe rirhandzu lerikulu!” Wansati yoloye a a ri un’wana wa Timbhoni ta 165 000 leti yingiseleke Makwerhu Lett loyi a vulavula hi nhlokomhaka leyi sekeriweke eBibeleni loko a endzele tiko rero hi mahelovhiki ya May 10 na 11, 2014.

Tinhlokomhaka leti sekeriweke eMatsalweni ni papila leri hlayiweke swi tolokiwe hi tindzimi ta ntlhanu laha swi tlheleke swi hlaleriwa eTiholweni ta Mfumo ta kwalomu ka 700 etikweni hinkwaro ra Ukraine.

Hi mahelovhiki wolawo, Mark Sanderson, loyi a nga xirho xa Huvo leyi Fumaka, u hlayele vamakwerhu hinkwavo va le Rhaxiya papila. Nongonoko wolowo wu tolokiwe hi tindzimi ta 14 naswona vanhu va 180 413 lava a va ri kona emavandlheni yo tlula 2 500 ya le Belarus na Rhaxiya a va wu hlalele kunene eka Internet.

Papila leri humaka eka Huvo leyi Fumaka ri hlayeriwe mavandlha hinkwawo ya le Rhaxiya ni le Ukraine. Makwerhu Sanderson u ri hlaye hi Xirhaxiya, leswi susumeteleke rhavi ra le Rhaxiya ku tsala ri ku: “Vamakwerhu va tsakisiwe swinene hi ku tiva leswaku Huvo leyi Fumaka ya khathala swinene ha vona tanihi leswi va nga xiphemu xa vamakwerhu emisaveni hinkwayo. Hinkwerhu ka hina hi titwe onge hi vukarhiwe hi Huvo leyi Fumaka.”

Papila rero a ri tsaleriwe ku khutaza ni ku tiyisa Timbhoni ta le xifundzheni lexi a ku ri ni hasahasa ya tipolitiki eka xona. Ri khutaze vamakwerhu leswaku va hambeta va nga vi “xiphemu xa misava” hi ku nga katseki eka tipolitiki.—Yohane 17:16.

Loko ri gimeta, Huvo leyi Fumaka yi khutaze Timbhoni teto leswaku ti tshama ti ri ni vuxaka lebyinene na Yehovha hi ku khongela, ku dyondza ni ku anakanyisisa hi Rito ra Xikwembu. Vayingiseri va tsundzuxiwe leswaku ku nga khathariseki miringo leyi va nga langutanaka na yona, va nga tshemba xitshembiso xa Xikwembu lexi kumekaka eka Esaya 54:17 lexi nge: “Tlhari rihi ni rihi leri nga ta endleriwa ku ku hlasela a ri nge humeleli.”

Huvo leyi Fumaka yi gimete papila ra yona hi marito lama nge: “Hinkwenu ha mi rhandza swinene. Tiyisekani leswaku nkarhi ni nkarhi hi anakanyisisa hi n’wina naswona ha mi khongelela eka Yehovha.”

Rhavi ra Timbhoni ta Yehovha ra le Ukraine ri tsale ri ku: “Vamakwerhu va tsakisiwe swinene hi ndlela leyi Huvo leyi Fumaka yi va rhandzaka ha yona ni ku khathala ha vona. Ku va Makwerhu Lett na Sanderson va endzele eUkraine ni le Rhaxiya hi mahelovhiki wolawo a ku ri vumbhoni lebyi nga lo dlaa, bya vun’we lebyi vanhu va Xikwembu va nga na byona ni ku komba vamakwerhu ndlela leyi Yehovha na Yesu va va khathalelaka ha yona. Hinkwerhu ka hina hi pfumerile leswaku lowu a ku ri nkarhi lowunene wo hi endzela naswona hi titwe hi tiyisiwile leswaku hi hambeta hi tirhela Yehovha ku nga khathariseki swiphiqo leswi hi nga ha langutanaka na swona.”