Sweswinyana Timbhoni ta Yehovha ti khome mintsombano yo hlawuleka eBrazil, Costa Rica, Hong Kong, Ireland, Israel, New Zealand ni le Sweden. Wo sungula wu khomeriwe eSweden hi July 2012 naswona yinharhu yo hetelela yi khomeriwe eCosta Rica ni le New Zealand hi January 2013.

Ku fana ni mintsombano yin’wana ya masiku manharhu leyi khomiwaka lembe ni lembe leyi hi yi hlelaka, mintsombano leyi yo hlawuleka yi va ni tinkulumo leti sekeriweke eBibeleni, minkombiso ni tidrama.

Timbhoni tin’wana ti rhambiwe ku ya ematikweni mambe leswaku ti ya khoma mintsombano leyi yo hlawuleka. Emahlweni ni le ndzhaku ka mintsombano yoleyo, ti kote ku valanga tiko leri ntsombano wu khomeriweke eka rona tanihi leswi a ku hleriwe tano.

Mbhoni yin’wana leyi yeke entsombanweni lowu a wu khomeriwe eBrazil yi te: “A swi tsakisa swinene ku kombiwa rirhandzu ni malwandla lamakulu hi vamakwerhu. Hi xinkarhana ndzi titwe onge ndzi kume swirho swa ndyangu wa mina.”

Mbhoni yin’wana leyi yeke entsombanweni wo hlawuleka lowu a wu khomeriwe eHong Kong, yi te: “Swi ndzi khumbe mbilu swinene ku vona Timbhoni leti vulavulaka Ximandarin ti ri karhi ti n’wayitela ni ku xiririka mihloti ti khomelele minkandziyiso ya Bibele eswifuveni swa tona leyi a ya ha ku humesiwa.”

Lembe ni lembe, Timbhoni ta Yehovha ti khoma mintsombano emisaveni hinkwayo naswona vanhu va timiliyoni va va kona eka yona.

Mintsombano yi endla leswaku lava nga kona va vona rirhandzu, ntsako ni ku rhula loku hina Timbhoni hi nga na kona. Sweswo swi vonaka ngopfu emintsombanweni yo hlawuleka kumbe ya matiko. Emintsombanweni yoleyo, Timbhoni leti humaka ematikweni man’wana ta bula ni ku dya swin’we, ti nyikana tinyiko, tinomboro ta tinqingho ni tiadirese, ti teka swifaniso ni ku angarhana hi rirhandzu.

Hilaha swi endlekaka hakona emintsombanweni hinkwayo, lava nga riki Timbhoni ta Yehovha va amukelekile ku va kona.