Endzhaku ko heta khoso yo dyondza Bibele leyi tekaka tin’hweti ta ntlhanu, swichudeni swa ntlawa wa vu-136 wa Xikolo xa Giliyadi swi thwasile hi Mugqivela, March 8, 2014. Exikolweni lexi, vatirheli lava nga Timbhoni ta Yehovha lava nga ni ntokoto va dyondza ku va vachumayeri lavanene ni ku tiyisa vapfumerikulobye. Vanhu va 11 548 va ve kona eka nongonoko lowu entsindza wa dyondzo wa Timbhoni ta Yehovha ePatterson, le New York kumbe hi ku wu hlalela hi ku tirhisa Internet va ri eCanada, Jamaica, Puerto Rico ni le United States.

“Hlayisani Langutelo Leri Ra Mianakanyo Eka N’wina.” David Splane, xirho xa Huvo leyi Fumaka ya Timbhoni ta Yehovha tlhelo mutshamaxitulu wa nongonoko lowu, u sungule hi xingheniso lexi a xi sekele eka Vafilipiya 2:5-7: “Hlayisani langutelo leri ra mianakanyo eka n’wina leri a ri ri kona ni le ka Kreste Yesu.” Loko Yesu a ha ri laha misaveni, a nga karhatekanga hi xikhundlha xakwe kambe a a tinyiketele hi ku titsongahata leswaku a endla ntirho wa Xikwembu.

Hi xikombiso, Yesu u bakanye ndzingo wun’wana ni wun’wana wa Diyavulosi hi ku vula marito lama nge “Ku tsariwile,” lawa a a ma tshaha eka nkulumo leyi Muxe a yi nyikeleke emahlweni ka Vaisrayele. (Matewu 4:4, 7, 10; Deteronoma 6:13, 16; 8:3) Hambileswi a a ta va a hlamurile hi marito yakwe a tirhisa xikhundlha xakwe tanihi N’wana wa Xikwembu la totiweke kambe u titsongahatile a kombisa ku tlangela marito lama vuriweke hi Muxe. Hilaha ku fanaka, hi fanele hi byi tekela enhlokweni vuswikoti lebyi van’wana va nga na byona kutani hi va bumabumela hi mbilu hinkwayo.

Makwerhu Splane u tlhele a kandziyisa ndlela leyi Yesu a kombiseke ha yona langutelo lerinene ra mianakanyo loko nkarhi wakwe wa ku leteriwa laha misaveni wu ri ekusuhi ni ku hela. Loko Yesu a khongela u te: “Ndzi ku vangamisile emisaveni, leswi ndzi heteke ntirho lowu u ndzi nyikeke leswaku ndzi wu endla. Kutani sweswi wena, Tatana, ndzi vangamise etlhelo ka wena hi ku vangama loku ndzi veke na kona etlhelo ka wena misava yi nga si va kona.” (Yohane 17:4, 5) Yesu a nga lavanga swikhundlha leswi engetelekeke. Nchumu wun’we ntsena lowu a a wu lava a ku ri ku tlheriseriwa exikhundlheni xakwe xa khale kumbe ‘entirhweni wakwe wa khale’ loko a tlhelela etilweni. Hilaha ku fanaka, vamathwasana va xikolo xa Giliyadi va fanele va tekelela Yesu hi ku tirha hi ku tinyiketela entirhweni wa vona ku nga ri ku lava xikhundlha naswona va eneriseka hambiloko va nga nyikiwi malunghelo lama engetelekeke loko va tlhelela eswiavelweni swa vona.

“Ku Tinyikela Handle Ko Tisola.” William Malenfant, mupfuni wa Komiti yo Dyondzisa ya Huvo leyi Fumaka, u khutaze swichudeni leswaku swi tekelela xikombiso xa ku tinyikela xa muapostola Pawulo. Ematshan’weni yo va Pawulo a ehleketa hi swilo leswi a swi tshikeke leswaku a endla ntirho wa Xikwembu, u te: “Ndzi siya swa le ndzhaku kutani hi swandla leswi pfulekeke ndzi kongoma eka nchumu wihi na wihi lowu nga emahlweni ka mina leswaku ndzi ta kuma pakani.”—Vafilipiya 3:13, 14, Bibele Ya Phillips.

Loko swichudeni swi tinyikela handle ko tisola swi ta va swi tekelela malandza ya Xikwembu yo tshembeka ya le nkarhini lowu hundzeke ni ya manguva lawa. Makwerhu Malenfant u tshahe marito ya Clara Gerber Moyer, loyi a sunguleke ku tirhela Yehovha ku sukela evutsongwanini. Clara u tsale a ku: “Hakunene i lunghelo ku ehleketa hi malembe ya 80 lawa ndzi ma heteke ndzi ri karhi ndzi tirhela Xikwembu handle ko tisola! Loko ndzo sungula vutomi bya mina hi vuntshwa, ndzi nga tlhela ndzi byi hanya hi ndlela leyi fanaka.”

“Ku Chumayela Hi Mfumo Swin’we Ni Tintsumi Naswona Tanihi Tintsumi.” Gerrit Lösch, xirho xa Huvo leyi Fumaka, u pfune swichudeni leswaku swi tlangela malunghelo mambirhi yo hlawuleka lawa lava chumayelaka va tiphinaka ha wona. Ro sungula, va tirha tanihi tintsumi ta Xikwembu loko va chumayela mahungu lamanene ya Mfumo hikuva rito ra Xiheveru ni ra Xigriki leri tirhisiweke eBibeleni ku kombetela eka “ntsumi” ri nga tlhela ri hundzuluxeriwa ri va “murhumiwa.” Ra vumbirhi, swichudeni swi chumayela mahungu lamanene swi kongomisiwa hi tintsumi, hilaha mudyondzisiwa Filipi a kongomisiweke hakona.—Mintirho 8:26-35.

Kutani Makwerhu Lösch u hlamusele mintokoto yi nga ri yingani leyi Timbhoni ta Yehovha ti yi kumeke loko ti ri eku chumayeleni hi Mfumo. Hi xikombiso, Gabino Mbhoni ya le Mexico, leyi hi ntolovelo yi gongondzaka kan’we kumbe kambirhi ntsena enyangweni, u gongondze ka mune eka wa muti wun’wana. Wanuna loyi a pfuleke nyangwa u byele Gabino leswaku a a lava ku tisunga. U te: “Loko u gongondza ra vumune, se a a ndzi tibohe nkolo hi ntambhu. Kambe ndzi tintshunxile leswaku ndzi ta pfula nyangwa. Ndza khensa leswi u phikeleleke u gongondza. Loko a wu nga phikelelanga, a ndzi ta va ndzi tidlele.”

Hambileswi minkarhi yin’wana swiendlakalo sweswo hi va ka hi lo kotlana na swona kambe minkarhi yo tala ku va ku nga ri ku kotlana. Ku ri na sweswo i vumbhoni bya leswaku tintsumi ta Xikwembu ti kongomisa ntirho wo chumayela wa emisaveni hinkwayo.—Nhlavutelo 14:6.

“Lava Xiximekaka Va Ta Kateka.” Michael Burnett, muleteri wa xikolo xa Giliyadi u sekele nhlokomhaka yakwe eka xikombiso xa Yabese, ku nga ntukulu wa Yuda, loyi a a “xiximeka ngopfu ku tlula vamakwavo.” Yabese u khongele eka Xikwembu a ku: “Loko kunene wo ndzi katekisa, u kurisa ndhawu ya mina naswona voko ra wena hakunene ri va na mina, hakunene u ndzi sirhelela ekhombyeni!”—1 Tikronika 4:9, 10.

Swichudeni swi nga tekelela xikombiso xa Yabese hi ku va leswi baka nhloko ya mhaka loko swi khongela, swi kombela Xikwembu leswaku xi swi pfuna swi hetisisa xikongomelo xa ndzetelo lowu swi wu kumeke eGiliyadi. Swi nga tlhela swi kombela Xikwembu leswaku xi nga swi sirheleli ntsena eka makhombo kambe nileswaku swi nga vi na gome kumbe ku hluriwa hi swiendlo swo biha. Xikwembu xi hlamule xikhongelo xa Yabese naswona xi ta endla hilaha ku fanaka eka swichudeni swa Giliyadi.

“Hambeta U Hiseka.” Mark Noumair, muleteri wa xikolo xa Giliyadi tlhelo mupfuni eka Komiti yo Dyondzisa, u sekele nkulumo yakwe eka 1 Vatesalonika 5:16-19. Tanihi leswi ndzilo wa xiviri wu lavaka mafurha, moya ni xo lumeka hi xona leswaku wu tshama wu ri karhi wu pfurha, swichudeni swi nga tirhisa swilo swinharhu leswaku swi tshama swi ri karhi swi hisekela ntirho wo chumayela.

Xo sungula, ‘tsaka minkarhi hinkwayo.’ (1 Vatesalonika 5:16) Swichudeni swi nga kuma ntsako​—lowu nga ta endla leswaku swi hiseka hi ku va swi anakanyisisa hi mikateko leyi tisiwaka hi ku amukeriwa hi Yehovha. Xa vumbirhi, ‘khongela minkarhi hinkwayo.’ (1 Vatesalonika 5:17) Xikhongelo xi fana ni moya lowu endlaka ndzilo wu pfurha. Hi fanele hi lehisa swikhongelo swa hina, hi chulula timbilu ta hina eka Xikwembu. Xa vunharhu, ‘khensa swilo hinkwaswo.’ (1 Vatesalonika 5:18) Ku tlangela swi tiyisa vuxaka bya hina na Yehovha swin’we ni bya vamakwerhu va hina. Makwerhu Noumair u te: “Tshama u ri karhi u kombisa ku khensa leswi nga ta endla leswaku u nga xopaxopi van’wana.”

“Ku Dzunisa Yehovha Swin’we Ni Swilo Leswi Nga Le Xibakabakeni.” Sam Roberson, muleteri wa swikolo leswi dyondzisaka dyondzo ya Xikwembu, u sekele nkulumo yakwe hi marito ya le Bibeleni lama kombisaka leswaku dyambu, n’weti ni tinyeleti swi dzunisa Yehovha. (Pisalema 19:1; 89:37; 148:3) U vule leswaku swichudeni swi ve ni lunghelo ro dzunisa Yehovha, a tlhela a tirhisa minkombiso ya mintokoto leyi swa ha ku yi kumaka entirhweni wo chumayela. Hi xikombiso, xichudeni xi khense wanuna loyi a fambaka hi xitulu xa lava lamaleke hikwalaho ko kombisa ku tlangela endzhaku ko va xichudeni xi yimise movha leyi a xi ri eku yi chayeleni leswaku a kota ku tsemakanya xitarata. Endzhaku ka sweswo, va sungule ku bula naswona wanuna yoleyo u amukele dyondzo ya Bibele ya mahala. Tanihi leswi xichudeni xa Giliyadi xi fambiseke dyondzo eka mavhiki lama landzeleke, xi kote ku chumayela vanhu vo hlayanyana lava endzeleke wanuna yoloye. Hi ku famba ka nkarhi, xi sungule tidyondzo ta Bibele ta nkombo hikwalaho ka bulo leri xi veke na rona eku sunguleni.

“Kulani Mi Tiya Hi Dyondzo Ya Xikwembu.” Donald Gordon, mupfuni eka Komiti yo Kandziyisa, u burisane ni mimpatswa yimbirhi leyi thwaseke eka ntlawa wolowo. Un’wana wa vamakwerhu lava ku burisaniweke na vona, u tsundzuke ndlela leyi tsalwa ra Vaefesa 3:16-20 ri kandziyisiweke ha yona exikolweni. Tsalwa leri ri pfune swichudeni ku va swi ‘endliwa swi va ni matimba’ hi ku va swi titsongahata, swi ngheneka ni ku tlhela swi tsundzuka leswaku Yehovha wa ha ri ni ntirho wo tala lowu a lavaka leswaku Mbhoni ha yin’we yi wu endla. Makwerhu un’wana wa xisati u tlangele ndlela leyi muleteri un’wana wa le Giliyadi a khutazeke swichudeni leswaku swi va ha yona, swi nga fani ni nhlampfi leyikulu leyi nga endzeni ka nkambana lowutsongo kambe swi fanele swi fana ni nhlampfi leyitsongo leyi nga elwandle. U te: “Ndzi dyondze leswaku loko ndzi tikhoma tanihi lontsongo enhlengeletanweni ya Yehovha, Yehovha u ta ndzi pfuna leswaku ndzi kula hi tlhelo ra moya.”

“Onge Yehovha A Nga Ku Tsundzuka Hi Vunene.” Mark Sanderson, xirho xa Huvo leyi Fumaka, u nyikele nkulumonkulu eka nongonoko wa mathwasana laha nhlokomhaka yakwe a yi sekele eka xikhongelo xa Nehemiya lexi nge: “Oho Xikwembu xanga, ndzi tsundzuke hi vunene.” (Nehemiya 5:19; 13:31) Nehemiya a a nga chavi leswaku Yehovha a nga rivala ndlela leyi a n’wi tirheleke ha yona. Ematshan’weni ya sweswo, Nehemiya a a kombela Xikwembu leswaku xi n’wi tsundzuka hi ndlela leyi a kombiseke rirhandzu ha yona nileswaku xi n’wi katekisa.

Hilaha ku fanaka, swichudeni swi nga tiyiseka leswaku Yehovha u ta swi tsundzuka tanihi vanhu lavanene loko swi tirhisa dyondzo leyi swi yi kumeke eGiliyadi. Hi xikombiso, ku rhandza ka swona Yehovha hi mbilu hinkwayo ku fanele ku va wona nchumu wa nkoka evugandzerini bya swona. (Marka 12:30) Xikwembu xi tsundzuke ndlela leyi Abrahama a a xi rhandza ha yona hi mbilu hinkwayo. Hambileswi Abrahama se a ri ni malembe ya gidi a file, Xikwembu xi n’wi vule “nakulorhi.”—Esaya 41:8.

Makwerhu Sanderson u tlhele a tsundzuxa swichudeni leswaku swi rhandza vaakelani va swona, ngopfungopfu Vakrestekulobye. (Marka 12:31) Ku fana ni Musamariya lonene loyi “a tiendle[ke] warikwavo eka munhu loyi a weleke emavokweni ya swigevenga,” swichudeni swi fanele swi va vo rhanga ku pfuna lava lavaka mpfuno. (Luka 10:36) Leswaku makwerhu Sanderson a endla mhaka leyi yi va erivaleni, u tirhise xikombiso xa Nicholas Kovalak, loyi a thwaseke eGiliyadi a tlhela a tirha tanihi mulanguteri wa muganga. Makwerhu Kovalak a a ngheneka a tlhela a va ni rirhandzu. U tshame a khutaza mulanguteri wa xifundzha swin’we ni nsati wakwe leswaku va tirha hi matimba, a ku: “Hlelani ndlela leyi ntirho wa n’wina mi nga ta wu endla ha yona ka ha ri ni nkarhi.” Endzhaku ka masiku ma nga ri mangani a xiye ndlela leyi makwerhu waxisati a a tirha ha yona, u n’wi byele a ku: “U nga swi tekeli enhlokweni leswi ndzi mi byeleke swona. U le ku tirheni hi matimba swinene. U nga tidlayi loko u tirha, leswaku u ta hambeta u tirhela Yehovha.” Ndzayo yakwe ya rirhandzu, yi pfune makwerhu yoloye wa xisati leswaku a ya emahlweni ni ntirho wa nkarhi hinkwawo malembe yo tala.

Eku heteleleni, Makwerhu Sanderson u khutaze swichudeni leswaku swi tirhisa dyondzo leyi swi yi kumeke leswaku swi dyondzisa ni ku letela van’wana. (2 Timotiya 2:2) Loko swi ri karhi swi tirha eswiavelweni swa swona, swi nga ha khutaza vamakwerhu swi ri karhi swi tiyiseka leswaku Yehovha a nge wu rivali ntirho wa swona.—Pisalema 20:1-5.

Xo hetelela. Endzhaku ka loko swichudeni swi kume tidiploma, xichudeni xin’wana xi hlaye papila leri a ri huma eka swichudeni ro kombisa ku tlangela ndlela leyi swi dyondzisiweke ha yona. Swichudeni swa 15 swi gimete nongonoko lowu hi ku yimbelela risimu 123 leri nga ni nhlokomhaka leyi nge, “Varisi I Tinyiko Leti Nga Vanhu” ebukwini ya tinsimu leyi nge Yimbelelelani Yehovha.