Hi mahelo-vhiki ya October 5 na 6, 2013, vayingiseri va 1 413 676 ematikweni ya 31 va ve kona eka nhlangano wa lembe ni lembe wa vu-129 wa Watch Tower Bible and Tract Society of Pennsylvania, hi xiviri eHolweni ya Tinhlengeletano ya Timbhoni ta Yehovha eJersey City, le New Jersey, eU.S.A., kumbe hi ku wu hlalela hi ku tirhisa Internet.

Guy Pierce, xirho xa Huvo leyi Fumaka ya Timbhoni ta Yehovha, a a ri mutshama-xitulu wa nhlangano wolowo. U pfuxe ku tsakela ka vayingiseri hi ku va tiyisekisa leswaku nongonoko wolowo wu ta hlamula swivutiso swa nkoka swa Bibele, wu endla leswaku ku voninga ka ntiyiso ku vangama swinene ni ku nyika ‘swakudya swa moya hi nkarhi lowu faneleke.’​—Matewu 24:45; Swivuriso 4:​18.

“Nkombiso Lowu Dzunisaka Yehovha.”

Mark Sanderson wa Huvo leyi Fumaka u nyikele vuxokoxoko malunghana ni nkombiso lowuntshwa entsindza wa misava hinkwayo wa Timbhoni eBrooklyn, le New York, eU.S.A., lowu nga ni nhloko-mhaka leyi nge “Bibele Ni Vito Ra Xikwembu.” Nkombiso lowu wu kandziyisa nkoka wa ku va kona ka vito ra Xikwembu eka Matsalwa ya Xiheveru ni Matsalwa ya Vakreste ya Xigriki naswona ku ni Tibibele to tala ta khale, tibuku ta khale leti gandlisiweke hi vuntshwa ni matluka ya Bibele ya le Malembeni ya le Xikarhi.

Swilo swin’wana swa nkoka eka nhlengeleto lowu swi katsa matluka ya Bibele ya lembe-xidzana ra vu-16 lama hundzuluxeriweke hi William Tyndale, loyi a a ri muhundzuluxeri wo sungula wa Bibele loyi a hundzuluxeleke vito ra Xikwembu hi Xinghezi, swin’we ni tluka ra nkandziyiso wa Xipaniya wa 1602 lowu tiviwaka tanihi Bibele ya Reina-Valera, leyi hundzuluxelaka vito ra Xikwembu ri ku “Iehova.” Nakambe eka nkombiso lowu ku ni Bibele ya Xinghezi leyi tiviwaka tanihi Great Bible (leyi kandziyisiweke hi 1549), Bibele ya Elias Hutter leyi nga ni tindzimi ta 12 (Nkandziyiso wa 1599, lowu nakambe wu vitaniwaka Nuremberg Polyglot), ni Bibele ya Geneva (leyi kandziyisiweke hi 1603), leti hinkwato ka tona ti tirhisaka vito ra Xikwembu.

Makwerhu Sanderson u rhambe hinkwavo leswaku va ya vona nkombiso wa Bibele, a ku: “Hi khongela hi timbilu ta hina hinkwato leswaku . . . wu pfuna vanhu va timbilu letinene va malembe yo hambana-hambana, lava dyondzekeke ngopfu ni lava nga dyondzekangiki ngopfu, leswaku va rhandza swilo swimbirhi leswi hinkwerhu ka hina hi swi rhandzaka​—Rito ra Xikwembu ra risima, ku nga Bible, ni vito ra xona leri vangamaka, Yehovha.”

Ndzimana Ya Lembe Ya 2014.

Endzhaku ka loko Gerrit Lösch wa Huvo leyi Fumaka a nyikele nkatsakanyo wa xihloko xa Xihondzo xo Rindza xa vhiki rero, Makwerhu Pierce u tivise ndzimana ya lembe ya 2014, leyi nge “Mfumo wa wena a wu te.” (Matewu 6:​10) Hambileswi ndzimana leyi ya lembe yi fanelekaka minkarhi hinkwayo eka Timbhoni ta Yehovha, ngopfu-ngopfu ya faneleka lembe leri, tanihi leswi 2014 ku nga lembe ra vu-100 ra ku simekiwa ka Mfumo etilweni.

“Nyiko Ya Risima Leyi Humaka Eka Xikwembu.”

Endzhaku, vayingiseri va hlalele vhidiyo leyi vulavulaka hi matimu ya Vuhundzuluxeri Bya Misava Leyintshwa, ku nga Bibele leyi kandziyisiwaka hi Timbhoni ta Yehovha naswona vanhu van’wana va yi tekaka tanihi byin’wana bya vuhundzuluxeri lebyinene lebyi tshameke byi kandziyisiwa. Loko Nathan Knorr a humese vholumo yo sungula ya vuhundzuluxeri lebyi eka Nhlengeletano ya Matiko leyi a yi ri ni nhloko-mhaka leyi nge Ku Andza Ka Mfumo Wa Le Tilweni, u nyike vayingiseri xitsundzuxo lexi ninamuntlha xa ha tirhaka, a ku: Hlaya vuhundzuluxeri lebyi hi vurhon’wana. Byi dyondze. Pfuna van’wana leswaku va byi dyondza hikuva byi ta va pfuna leswaku va kota ku vitana vito ra Yehovha.

“Ku Tsundzuka Minkarhi Ya Khale.”

Samuel Herd wa Huvo leyi Fumaka u nyikele nkulumo leyi, leyi a yi katsa ni mbulavurisano lowu rhekhodiweke wa swirho swa mune swa ndyangu wa Bethele ya le United States leswi a swi ri kona loko Bibele ya Vuhundzuluxeri Bya Misava Leyintshwa yi humesiwa ro sungula hi tivholumo ta tsevu exikarhi ka 1950 na 1960.

Eunice Timm u tsundzuke a tirhisa Bibele ya Vuhundzuluxeri Bya Misava Leyintshwa eminhlanganweni ya Vukreste. A a tlangela switirhisiwa swa yona swo endla ndzavisiso swo tanihi swikombo. Tanihi leswi a swi ta tika ku teka tivholumo teto hinkwayo u ya na tona eminhlanganweni, u vule leswaku a a teka leti a a ti lava ntsena swin’we ni Bibele leyitsongo ya King James Version leswaku a yi tirhisa loko ko tshuka ku hlayiwa tindzimana leti a a nga swi langutelanga leswaku ti hlayiwa.

Bibele leyintshwa yi khumbe ni swiphemu swin’wana swa vugandzeri bya hina. Hi xikombiso, Fred Rusk u hlamusele leswaku emahlweni ka 1950, lava a va averiwa ku khongela endyangwini ya Bethele a va tirhisa swiga leswi humaka eka Bibele ya King James Version, swo tanihi lexi nge “thy kingdom come.” Kambe endzhakunyana ka loko ku humesiwe Bibele ya Vuhundzuluxeri Bya Misava Leyintshwa, va tshike mavulavulelo ya Xinghezi xa khale naswona va sungule ku tirhisa mavulavulelo ya siku ni siku loko va khongela erivaleni.

John Wischuk a nga tsakisiwanga hi ndlela leyinene leyi Bibele leyi yi hundzuluxeriweke ha yona ntsena kambe ni ndlela leyi Komiti ya Vuhundzuluxeri bya Bibele bya Misava Leyintshwa yi titsongahataka ha yona. U te: “A va nga swi lavi leswaku ku vuriwa mavito ya vona loko va ha hanya kumbe loko se va file hikuva a va lava leswaku ku dzuneka hinkwako ku ya eka Yehovha Xikwembu.” Loko Charles Molohan a phofula ndlela leyi ntlawa hinkwawo wu yi tlangelaka ha yona Bibele leyi, u te: “Vuhundzuluxeri Bya Misava Leyintshwa byi hi pfuna ku tiyisekisa timbilu ta hina leswaku leswi hi swi pfumelaka hakunene i ntiyiso swin’we ni ku tiyisa ripfumelo ra hina leswaku hi kota ku ya eka vanhu hi va pfuna leswaku va va ni ripfumelo.”

“Hi Va Twa Va Vulavula Tindzimi Ta Hina Malunghana Ni Swilo Leswikulu Ngopfu Swa Xikwembu.”

(Mintirho 2:​11) Geoffrey Jackson wa Huvo leyi Fumaka u nyikele nkulumo leyi eka yona ku humesiweke Bibele leyi pfuxetiweke ya 2013 ya Vuhundzuluxeri Bya Misava Leyintshwa. Loko nkulumo yakwe yi hela, vayingiseri hinkwavo ku katsa ni hinkwavo lava hlaleleke nongonoko lowu hi ku tirhisa Internet, va kume kopi ya Bibele leyi.

Makwerhu Jackson u vule leswaku se ku hundze malembe yo tlula 60 hi mpfhuka ku humesiwe vholumo yo sungula ya Vuhundzuluxeri Bya Misava Leyintshwa. Hi nkarhi wolowo, ririmi ra Xinghezi ri cincile kambe xikongomelo xa hina xa ntirho wo hundzuluxela Bibele a xi cincanga. Hi lava ku hundzuluxela Rito ra Xikwembu rito hi rito hilaha hi nga kotaka hakona handle ko cinca mongo wa leswi ri swi vulaka.

Hi 2005, Huvo leyi Fumaka yi dzike swinene eka xilaveko xo hundzuluxela Bibele hi tindzimi to tala. Ku sukela hi lembe rero, nhlayo ya tindzimi leti Bibele ya Vuhundzuluxeri Bya Misava Leyintshwa yi kumekaka ha tona yi andzile yi suka eka 52 yi ya eka 121, naswona sweswi yi hundzuluxeriwa hi tindzimi tin’wana leti engetelekeke ta 45. Tanihi leswi vahundzuluxeri va hundzuluxeleke Vuhundzuluxeri Bya Misava Leyintshwa hi tindzimi tin’wana, va kombele ku hlamuseriwa marito kumbe swiga swo karhi. Ku fikela sweswi, swivutiso swo tano swo tlula 52 000 swi rhumeriwile ni ku hlamuriwa naswona swo tala swa swona swi paluxe tindhawu laha matsalwa ya Xinghezi ma nga antswisiwaka kumbe ma tsariwa hi ririmi ra manguva lawa.

Hi xikombiso, Makwerhu Jackson u hlamusele leswaku Tibibele ta khale ta Xinghezi ta Vuhundzuluxeri Bya Misava Leyintshwa eka 1 Samuwele 14:11 a ti vula leswaku Yonathani ni murhwali wa swihlomo swakwe “exposed themselves to the outpost of the Philistines.” Leswaku ku papalatiwa ku va vahlayi va yi twisisa hi ndlela leyi nga riki yona, Bibele leyintshwa leyi pfuxetiweke yi vula leswaku “revealed their presence.” Hilaha ku fanaka, eku sunguleni Mikiya 2:6 yi tirhise xiga lexi hundzuluxeriweke rito hi rito lexi nge: “Do not you people let words drop. They let words drop.” Xiga lexi sweswi xi hlayekisa xileswi: “ ‘Stop preaching!’ they preach.”

Emalembeni ya ntlhanu lama hundzeke, Huvo leyi Fumaka yi veke komiti leswaku yi pfuxeta Vuhundzuluxeri Bya Misava Leyintshwa, naswona se yi hetile ku yi pfuxeta. Bibele leyi pfuxetiweke yi sasekile, yi hlayeka hi ku olova naswona yi tiye ngopfu lerova yi ta tshama yi languteka hambiloko se yi ri ni malembe yo tala yi tirhisiwa. Makwerhu Jackson u tivise leswaku Tibibele ta Xinghezi ta marito lamakulu ni letitsongo leti nghenaka exikhwameni ti ta kandziyisiwa ku nga ri khale.

Ku “Tamela Khwatsi Rito Ra Ntiyiso.”

Stephen Lett wa Huvo leyi Fumaka u pfuxete switirisiwa swin’wana swa Bibele leyintshwa leyi pfuxetiweke, a teka nhloko-mhaka yakwe eka 2 Timotiya 2:​15. Xiga lexi nge “tamela khwatsi” lexi tirhisiweke eka ndzimana leyi hi rito hi rito xi vula “ku tsema kahle u kongoma.” Hi lava ku tirhisa “banga ra moya” hi ndlela leyi kongomeke, hi ku pakanisa. (Vaefesa 6:​17) Kutani Makwerhu Lett u kombise ndlela leyi switirhisiwa leswintshwa leswi nga eBibeleni leyi swi nga hi pfunaka ha yona ku endla tano.

1. Xiyenge xa le mahlweni lexi nga ni nhloko-mhaka leyi nge “An Introduction to God’s Word,” xi ni tindzimana ta Bibele leti hlamulaka swivutiso swa 20 swa malunghana ni tidyondzo ta xisekelo ta Bibele.

2. Xita-ndzhaku A xi hlamusela swiyenge swa Bibele leyintshwa leyi pfuxetiweke, swo tanihi ku cinca ka matsalelo ni marito swin’we ni ndlela leyi vito ra Xikwembu ri hundzuluxeriweke ha yona eka yona.

3. Xita-ndzhaku B, xi vumbiwa hi swiyenge swa 15 leswi nga ni mivalavala, swi ni mimepe ni tidayagiramu leti nga ta pfuna swinene loko munhu a tiendlela dyondzo ya yena n’wini swin’we ni loko a dyondzisa van’wana.

4. Eku sunguleni ka buku yin’wana ni yin’wana ya Bibele, ku ni xiyenge lexi nge “Outline of Contents” lexi katsakanyaka buku hinkwayo, xisweswo xi pfuna muhlayi leswaku a kuma xiyenge lexi a xi lavaka hi ku hatlisa. Xitirhisiwa lexi xi siva tinhloko-mhaka leti a ti tsariwa eka tluka rin’wana ni rin’wana eka vuhundzuluxeri bya khale.

5. Xiyenge lexi nge “Glossary of Bible Terms” xi nyikela tinhlamuselo to koma ta marito ya madzana lama tirhisiweke eBibeleni.

6. Xiyenge lexi nge “Bible Words Index” xi hungutiwe swinene. Sweswi xi katsa ntsena marito ni tindzimana leti tirhisiwaka ngopfu eku chumayeleni ni le ku dyondziseni.

7. Swikombo leswi kumekaka eka kholomu leyi nga exikarhi ka tluka rin’wana ni rin’wana, na swona swi hungutiwile swinene. Kambe sweswi swi katsa ntsena swikombo leswi nga pfunaka swinene entirhweni wo chumayela.

8. Tinhlamuselo ta le hansi ti kombisa tindlela tin’wana leti marito ma hundzuluxeriweke ha tona, ku hundzuluxela rito hi rito ni rungula leri hlamuselaka mongo wa mhaka.

JW Library.

John Ekrann, xirho xa Komiti ya Rhavi ra United States, xi kombise progreme leyintswa ya JW Library ya switirhisiwa swa elektroniki, swo tanihi ti-smartphone ni ti-tablet. Progreme leyi yi ni vuhundzuluxeri lebyi pfuxetiweke bya Vuhundzuluxeri Bya Misava Leyintshwa swin’we ni Tibibele tin’wana ta ntlhanu. Yi humesiwe mahala eka switolo leswikulu swa tiprogreme hi October 7, 2013.

“Ku Hundzuluxela Rito Ra Xikwembu Hi Ndlela Yo Hundzisela Mongo Lowu Faneleke.”

Anthony Morris wa Huvo leyi Fumaka u ye emahlweni a hlamusela milawu leyi kongomiseke Komiti ya Vuhundzuluxeri bya Bibele bya Misava Leyintshwa loko yi lunghiselela ku hundzuluxela vuhundzuluxeri lebyintshwa lebyi pfuxetiweke. Hi ku tirhisa leswi tsariweke eka 1 Vakorinto 14:​8, 9 entirhweni wa yona, komiti a yi lava ku endla leswaku Bibele leyi pfuxetiweke yi twisiseka hi ku olova. A yi papalata ku hundzuluxela rito hi rito etindhawini leti a swi ta tshuka swi cinca rungula ra Bibele.

Hi xikombiso, loko Genesa 31:20 yo hundzuluxeriwa rito hi rito a yi ta hlayekisa xileswi: “Jacob stole the heart of Laban.” Hambiswiritano, xiga xa Xiheveru lexi tirhisiweke laha xi ni nhlamuselo leyi hambaneke ni ya xiga xa Xinghezi, kutani Vuhundzuluxeri Bya Misava Leyintshwa sweswi byi hundzuluxela xiga lexi hi ndlela leyi: “Jacob outwitted Laban.” Hilaha ku fanaka, vuhundzuluxeri bya rito hi rito bya 1 Vakorinto 7:​39 a byi ta vula leswaku wansati a nga tekana ni wanuna un’wana loko nuna wakwe “a etlele.” Kambe tanihi leswi Matsalwa minkarhi yin’wana ma tirhisaka “ku etlela” ku kombetela eka rifu, Vuhundzuluxeri Bya Misava Leyintshwa yi pfuna muhlayi leswaku a nga pfilunganyeki hi ku tirhisa xiga lexi nge “se a etlele eku feni.”

Makwerhu Morris u te: “Bibele yi tsariwe hi ririmi leri tolovelekeke, leri tirhisiwaka siku ni siku hi vanhu lava tolovelekeke​—varimi, varisi ni vaphasi va tinhlampfi. Vuhundzuluxeri lebyinene bya Bibele byi endla leswaku rungula ra byona ri twisisiwa hi vanhu vo lulama, ku nga khathariseki ndhavuko wa vona.”

“Ku Tirhisa ‘Marito Lama Tsakisaka’ Ni ‘Marito Lama Pakanisaka Ya Ntiyiso.’ ”

David Splane wa Huvo leyi Fumaka u tlhuvutse nhloko-mhaka leyi, leyi sekeriweke eka Eklesiasta 12:10. Vatsari va Bibele a va ri ni vuxiyaxiya loko va tsala mianakanyo ya Xikwembu naswona Komiti yo sungula ya Vuhundzuluxeri bya Bibele bya Misava Leyintshwa na yona yi kombise vuxiyaxiya entirhweni wa yona. Bibele leyi pfuxetiweke ya Vuhundzuluxeri Bya Misava Leyintshwa yi ya emahlweni yi landzela nawu lowu: “Tsala marito lama pakanisaka ya ntiyiso” naswona endla rungula ra Xikwembu ri twisiseka kahle.

Makwerhu Splane u te: “Marito yo tala ya Xinghezi ma ni tinhlamuselo to tala.” Hi xikombiso, Tibibele ta khale ta Vuhundzuluxeri Bya Misava Leyintshwa ti tirhise xiga lexi nge “pattern of healthful words” eka 2 Timotiya 1:​13. Rito leri nge “pattern” ri ni tinhlamuselo to talanyana, yin’wana ya tona yi vula “mpfampfarhuto wa vutshila.” Hi ku ya hi nhlamuselo leyi, van’wana va vule leswaku xiga lexi xi vula mpfampfarhuto wo saseka lowu munhu a nga wu kumaka eka tidyondzo ta Bibele. Hambiswiritano, nhlamuselo leyi fambisanaka ni rito ra Xiheveru ri vula “xikombiso lexi faneleke ku tekeleriwa.” Xisweswo Bibele leyintshwa leyi pfuxetiweke yi tirhisa xiga lexi nge “xikombiso xa marito lamanene.”

Makwerhu Splane u tlhele a hlamusela mindzulamiso leyi endliweke leswaku yi fambisana ni ku cinca ka ririmi ra Xinghezi. Hi xikombiso, rito leri nge “belela,” leri tirhisiweke eka Tibibele to sungula ta Vuhundzuluxeri Bya Misava Leyintshwa leswaku ku hlamuseriwa ndlela leyi Yesu a dlayiweke ha yona, hakanyingi ri vula ku tlhava miri wa munhu hi mhandzi yo tontswa ivi u wu tshika wu khomelela eka yona. Tanihi leswi Yesu a nga beleriwangiki hi mhandzi ya nxaniso, vuhundzuluxeri lebyintshwa lebyi pfuxetiweke byi tirhisa swiga swo tanihi leswi nge “u beleriwe hi swipikiri emhandzini” leswaku byi hlamusela ndlela leyi a dlayiweke ha yona.​—Matewu 27:22, 23, 31.

Makwerhu Splane u gimete hi ku vula a ku: “Hi mi khongelela leswaku onge ku hlaya ni ku dyondza Vuhundzuluxeri Bya Misava Leyintshwa swi nga mi endla mi tshinela swinene eka Yehovha. Nakambe onge a nga va Tatana, Xikwembu ni Munghana wa n’wina.”

Mahetelelo.

Makwerhu Pierce u fanise Bibele leyintshwa leyi pfuxetiweke ni swakudya eka ‘nkhuvo’ wa Yehovha. (Esaya 25:6) Kutani u wu gimete kahle nongonoko lowu hi ku kombela vayingiseri leswaku va yimbelela risimu 114 leri nga ni nhloko-mhaka leyi nge “Buku Ya Xikwembu I Ndzalama” leri humaka ebukwini ya tinsimu leyi nge Yimbelelelani Yehovha.