Ku sukela hi September 2012, ntirho wo langutela marhavi lama tlulaka 20 ya Timbhoni ta Yehovha wu hundziseriwe eka marhavi lamakulu.

Ku engetela kwalaho, ku simekiwe marhavi lamantshwa eSerbia ni le Macedonia. Ku ni swivangelo swimbirhi leswikulu swa ku cinca koloko.

Emalembeni ya sweswinyana, ku antswisiwa ka matirhelo ya thekinoloji yo vulavurisana ni yo kandziyisa swi endle leswaku ku hungutiwa vatirhi emarhavini man’wana. Kutani leswi marhavi lamakulu se a ma ri ni vatirhi vatsongo, ku pfuleke makamara lama nga tirhiseriwaka ku rhurhela vatirhi van’wana lava a va tirhela emarhavini lamatsongo ya le matikweni man’wana.

Sweswi, rhavi rin’wana ni rin’wana lerikulu ri ni Timbhoni to tala leti nga ni ntokoto leti khathalelaka ntirho wo dyondzisa vanhu Bibele. Hi xikombiso, ntirho wo chumayela eCosta Rica, aEl Salvador, eGuatemala, eHonduras, eNicaragua ni le Panama wu languteriwa hi rhavi ra le Mexico. Hikwalaho, marhavi ya le matikweni wolawo ya tsevu ma pfariwile.

Timbhoni leti ringanaka 40 leti humaka emarhavini wolawo ya tsevu ti averiwe ku ya tirha erhavini ra le Mexico. Timbhoni tin’wana ta kwalomu ka 95 ti sarile ematikweni ya rikwavo, laha ti ngheneleke ntirho wo chumayela wa nkarhi hinkwawo.

Timbhoni tin’wana ematikweni wolawo ya le Amerika Xikarhi ti sungule ku tirha etihofisini ta vuhundzuluxeri leti languteriwaka hi rhavi ra le Mexico. Hi xikombiso, vahundzuluxeri va kwalomu ka 20 ePanama va hundzuluxela minkandziyiso ya Bibele hi tindzimi ta xintu. Khale ka rhavi ra le Guatemala, Timbhoni tin’wana ta 16 sweswi ti hundzuluxela minkandziyiso hi tindzimi ta mune ta kwalaho. Xisweswo, ku hleriwa ka ntirho hi vuntshwa eAmerika Xikarhi swi endle leswaku nhlayo ya vatirhi va le rhavini yi hungutiwa yi suka eka va 300 yi ya eka va kwalomu ka 75.

Hikwalaho ka ku hlanganisiwa ka marhavi, vachumayeri lava fanelekaka lava a va tirha emarhavini lamatsongo se va nga dzika entirhweni wo chumayela mahungu lamanene. Mbhoni yin’wana ya le Afrika, leyi averiweke entirhweni wo chumayela, yi tsale yi ku: “Ku cinca vutomi bya mina leswaku byi fambisana ni swiyimo leswintshwa a ku ri ntlhontlho etin’hwetini ti nga ri tingani to sungula. Hambiswiritano, ku chumayela siku ni siku swi ndzi tisele ntsako ni mikateko yo tala swinene. Sweswi ndzi fambisa tidyondzo ta Bibele ni vanhu va 20 naswona van’wana va vona sweswi va va kona eminhlanganweni ya vandlha.”