Hi October 2012, ku pfuriwe ndhawu leyi munhu a tivalangelaka yona leyi kombisaka matimu ya Timbhoni ta Yehovha leyi nga eyindlu-nkulu ya Timbhoni ta Yehovha eBrooklyn le New York. a Minkombiso yoleyo yi kombisa mintlhontlho, makhombo ni ku hlula loku kumiweke hi vanhu van’wana lava tikarhateleke ku hanya hi ndlela ya Vukreste.

Vaendzi va valanga matimu, ku sukela enkarhini wa Vakreste hi 33 C.E. ku fikela namuntlha. Minkombiso ya kona yi hleriwe hi swiyenge swa mune naswona swi katsa ntlhandlamano wa minkarhi leyi swi hlanganisaka swiyenge sweswo hinkwaswo. Xiyenge ha xin’we xi ni nhloko-mhaka ya Matsalwa naswona xi hlamuseriwa hi vhidiyo yo koma leyi nga hlaleriwaka hi Xinghezi leyi marito ya kona ma hundzuluxeriweke hi tindzimi ta tsevu​—Xifurwa, Xintariyana, Xijapani, Xikoriya, Xiputukezi ni Xipaniya.

Vito ra xiyenge xo sungula lexi nge “Vanhu Va Rhandze Munyama,” ri tshahiwe eka marito ya Yesu lama nga eka Yohane 3:19. Bibele yi profete leswaku a ku ta humelela vanhu vo biha lava nga ta “vulavula swilo leswi soholotiweke.” (Mintirho 20:30) Switsundzuxo malunghana ni swiendlo swa vanhu vo tano swi tsariwe eka ntlhandlamano wa minkarhi.

Xiyenge xa vumbirhi xi ni nhloko-mhaka leyi nge, “Ku Vonakala A Ku Voninge,” ku nga marito lama kumekaka eka 2 Vakorinto 4:6. Ntlhandlamano wa minkarhi wu kombisa leswaku nkarhi wolowo wu sungule eku heleni ka va-1800 ku ya eku sunguleni ka va-1900. Xiyenge lexi xi sungula hi xitori xa vavanuna va migingiriko lava sunguleke ku kambisisa Matsalwa hi vuntshwa, vutivi byo tala lebyi va byi kumeke ni ku andza ka vona emahlweni ka Nyimpi yo Sungula ya Misava.

Xiphemu xin’wana xa xiyenge lexi xa vumbirhi xi kombisa vhidiyo leyi dumeke swinene leyi vuriwaka “Photo-Drama of Creation.” Hi 1914, Swichudeni swa Bibele (hilaha Timbhoni ta Yehovha a ti tiviwa hakona enkarhini wolowo) swi sungule ku hlalerisa vanhu vhidiyo leyi ya “Photo-Drama,” leyi katsaka swifaniso leswi tshukatshukaka ni leswi nga tshukatshukiki swin’we ni mpfumawulo lowu rhekhodiweke. Endzhaku ka malembe yi humesiwile, vanhu va timiliyoni va khitikanile leswaku va ya yi hlalela. Nkombiso wa matimu wu katsa swifaniso swa xiviri swa yona, vhidiyo yo koma ya xingheniso ni tisilayidi ta mivalavala to tlula 500.

Xiyenge xa vunharhu xi ni nhloko-mhaka leyi nge ‘Dragona Yi Kariha,’ leyi tshahiweke eka Nhlavutelo 12:17. Xi vulavula hi ku xanisiwa ka valandzeri va Kreste eku sunguleni ka lembe-xidzana ra vu-20 ni timhaka leti khutazaka ta Vakreste lava nga hlanganyelangiki enyimpini hi minkarhi ya tinyimpi. Vhidiyo yin’wana yi kombisa xitori xa Remigio Cuminetti, Mbhoni leyi aleke ku ambala yunifomo ya vusocha ya le Italy kumbe ku ya lwa eNyimpini yo Sungula ya Misava. Yin’wana yi vulavula hi Alois Moser wa le Austria. U ale ku vula a ku, “Heil Hitler!” naswona hikwalaho ka sweswo u lahlekeriwe hi ntirho naswona eku heteleleni u yisiwe ekampeni ya nxaniso ya Dachau.

Ku kombisiwe khotso leri nga lo dzwi, laha ku nga ni swifaniso swa Timbhoni ta Yehovha leti a ti khomiwile hikwalaho ka ripfumelo ra tona ematikweni yo tanihi Greece, Japani, Poland na Serbia.

Xiyenge xo hetelela xi ni nhloko-mhaka leyi nge ‘Mahungu Lamanene Ya Matiko Hinkwawo,’ leyi sekeriweke eka Matewu 24:14 naswona xi vulavula hi ntirho wa Timbhoni ta Yehovha ku sukela hi 1950 ku fikela sweswi. Swifaniso swa mivalavala swi kombisa ku andza hi ku hatlisa, ku phikelela entirhweni wo chumayela ni rirhandzu ra vumakwerhu leri Timbhoni ta Yehovha ti tiviwaka ha rona.

Emahlweni ko va muendzi a famba, a nga langutisa xivumbeko xa Bible House na Brooklyn Tabernacle, ku nga miako leyi a yi tirhisiwa hi Timbhoni ta Yehovha emalembeni yo tlula 100 lama hundzeke.

Ku lunghiselela ndhawu leyi swi teke lembe naswona ku yi aka swi teka tin’hweti. Timbhoni leti humaka emisaveni hinkwayo ti nyikele hi swilo leswi a ti swi teka swi ri swa nkoka swinene ematin’wini.

Ha yini ku endliwe ntirho lowu hinkwawo? Loko xirho xin’wana xa Huvo leyi Fumaka ya Timbhoni ta Yehovha xi vutisiwe leswaku ti ta vuyeriwa njhani Timbhoni ta Yehovha hi ku valanga endhawini leyi, xi phindhe xiga lexi tolovelekeke lexi nge: “Leswaku hi tiva laha hi yaka kona, hi fanele hi tiva laha hi sukaka kona.”