Lembe ni lembe, vanhu va magidi va valanga miako ya rhavi ra le United States swin’we ni ntsindza wa Timbhoni ta Yehovha eXifundzheni xa New York. Miako leyi yi vitaniwa Bethele, ku nga rito ra Xiheveru leri vulaka “Yindlu ya Xikwembu.” Vaendzi lava humaka etindhawini ta le kule ni ta le kusuhi va teka riendzo ku ya vona minkandziyiso yi ri karhi yi gandlisiwa, ku vona ndlela leyi ntirho wa hina wu hleriweke ha yona ni ku ya endzela vanghana va vona lava tirhaka kwalaho. Muendzi un’wana loyi a ha ku endzeka sweswinyana a a tiyimisele hi mbilu hinkwayo ku teka riendzo rero.

Marcellus, Mbhoni yin’wana ya Yehovha leyi tshamaka eAnchorage, Alaska, le U.S.A., wo kota ku vulavula marito ma nga ri mangani hileswi a omeke rihlanguti emalembeni ma nga ri mangani lama hundzeke. a U famba hi xitulu xa lavo lamala naswona u lava ku pfuniwa hi mintirho ya siku ni siku. Ku nga khathariseki mintlhontlho yoleyo, a a swi navela swinene ku endzela eBethele. Sweswinyana, ku navela kakwe ku endlekile.

Corey, munghana wa Marcellus loyi a n’wi pfuneke ku hlela riendzo leri, u te: “A a swi lava swinene. A a tshamela ku ndzi fonela ku tiva leswaku swi famba njhani. Leswi a nga vulavuriki ngopfu handle ko hlamula a ku ‘Ina’ kumbe ‘E-e,’ a ndzi fanele ndzi n’wi vutisa nxaxamelo wa swivutiso loko a ndzi fonela.” Bulo ra vona a ri famba hi ndlela leyi:

“Xana u lava leswaku ndzi ta kwahalano?”

“E-e.”

“Xana u lava ndzi fonela dokodela?”

“E-e.”

“Xana u ndzi fonele malunghana ni riendzo ra wena ro ya eBethele?”

“Ina.”

“Kutani a ndzi ta n’wi hlamusela leswi se ndzi swi endleke ku lunghiselela riendzo leri. Ndzi tsake ngopfu loko ndzi vona ku navela ka yena ku endleka.”

Marcellus u hlule swihinga swo hlayanyana leswaku a kota ku teka riendzo rakwe. Leswi a nga kumiki mali yo tala, u veke mali ku ringana malembe mambirhi leswaku a kota ku hakelela riendzo ro ya eNew York leri leheke tikhilomitara ta 5 400. Hikwalaho ka leswi a nga kotiki ku tiendlela swilo, u boheke ku kuma munhu loyi a fanelekaka wo famba na yena. Xo hetelela, a a lava mpfumelelo wo teka riendzo leri eka dokodela wakwe naswona u wu kumile ku sale masiku ma nga ri mangani emahlweni ko va xihahampfhuka lexi a a ta famba ha xona xi suka.

Loko Marcellus a fike eNew York, u valange miako ya le Brooklyn, Patterson ni ya le Wallkill. U vone michini leyikulu yi gandlisa tibuku ni Tibibele naswona u dyondzo swo tala malunghana ni ndlela leyi ntirho wa hina wu hleriwaka ha yona. U tlhele a vona nkombiso lowu nga ni nhlokomhaka leyi nge “Bibele Ni Vito Ra Xikwembu” swin’we ni lowu nge “Vanhu Va Vito Ra Yehovha.” Loko a ri eku valangeni, u tikumele vanghana lavantshwa. Hakunene a ku ri riendzo ra nkoka swinene!

Vanhu vo tala va vula leswaku a va na wona marito yo hlamusela loko va vutisiwa leswaku a ri ri njhani riendzo ra vona ro ya eBethele. Kambe loko Marcellus a vutisiwe loko riendzo rakwe ro ya eBethele ri nga vanga nyuku wa mbyana, u hlamule hi ndlela leyi a a kota ha yona a ku: “Ina. Ina. Ina!”

Ku endzela eBethele swi nga ku khutaza wena ni ndyangu wa wena, ku fana na Marcellus. Vaendzi va amukelekile emarhavini ya hina lama nga emisaveni hinkwayo. Ha yini u nga ti u ta hi endzela?