En’walungu wa Doroba ra New York, laha ku nga tikhilomitara ta kwalomu ka 145 ekusuhi ni ximutana xa Wallkill le New York, ku ni mapurasi lama pfuneke swinene eka ntirho wa Timbhoni ta Yehovha wo dyondzisa Bibele emisaveni hinkwayo. Watchtower Farms yi xaviwe eka malembe ya 50 lama hundzeke hi January 2, 1963.

David Walker la nga un’wana wa Timbhoni ta Yehovha, la sunguleke ku tirha epurasini ra le Wallkill loko ra ha ku xaviwa u boxa xivangelo xa ku va ri xaviwile, u ri: “Vatirhi va ku tirhandzela va le ntsindza wa misava hinkwayo wa Timbhoni ta Yehovha a va ya va engeteleka eBrooklyn le New York naswona a ku laveka leswaku va phameriwa hi ndlela leyi nga koxiki mali yo tala. Purasi rin’wana leri Timbhoni ta Yehovha ti ri tirhisaka ri le n’walungu wa New York naswona ku ya eka rona swi teka kwalomu ka tsevu ku ya eka nhungu wa tiawara ku suka eBrooklyn. Ku ya eka purasi ra Wallkill swi teka tiawara timbirhi ntsena kutani sweswo swi endla leswaku swi olova ku tirhisa rona.” Timbhoni ta Yehovha ti hetelele ti tirhise purasi leri leswaku ti byala mihandzu ni matsavu ti tlhela ti fuwa tihuku, tinguluve ni tihomu ni ku endla swakudya leswi endliwaka hi masi. Hi ku famba ka nkarhi ku engeteriwe mapurasi man’wana.

Loko ku nga si hela malembe ya khume, ku andza ka nhlayo ya Timbhoni ta Yehovha emisaveni hinkwayo ku endle leswaku ku va ni ku cinca eWallkill. Ku engetela eka masimu ya swakudya lawa a ma ri kona, ku sungule ku kandziyisiwa minkandziyiso leyi a yi ta pfuna eka ntirho wo tshovela wo fanekisela lowu Yesu a vulavuleke ha wona. (Matewu 9:37; Luka 10:2; Yohane 4:35, 36) Xiya mintirho yin’wana leyi endliweke eWallkill.

Ku Kandziyisa: Hi va-1950, ndhawu yo kandziyisela eka yona leyi nga eBrooklyn le New York, yi kandziyise minkandziyiso yo tala leyi sekeriweke eBibeleni. Kambe leswi xilaveko xa minkandziyiso a xi ya xi andza, ndhawu leyi yo kandziyisela eka yona a yi nga ha koti ku kandziyisa minkandziyiso leyi ringaneke. Hikwalaho hi 1973, Timbhoni ta Yehovha ti hete ku aka ndhawu yin’wana yo kandziyisela eka yona eWallkill. Endzhaku ka sweswo, miako leyi nga ni michini yo kandziyisa yi ndlandlamuxiwile minkarhi yo hlaya naswona yi tlhele yi ndlandlamuxiwa hi 2004.

Tikhompyuta: Hi 1979, ntlawa wo karhi wa Timbhoni ta Yehovha eWallkill wu sungule progreme ya le ka khompyuta leyi vuriwaka Endlelo Ra Elektroniki Ro Thayipa Tindzimi To Tala (Multilanguage Electronic Publishing System [MEPS]). Progreme leyi yi kota ku endla leswaku minkandziyiso leyi sekeriweke eBibeleni yi kandziyisiwa hi tindzimi leti tlulaka 600.

Eka Dyondzo: Hi 1988, Xikolo xa Bibele xa Giliyadi xa Watchtower xi rhurhisiwile eBrooklyn xi yisiwa eWallkill naswona hi October 17 ku sungule titlilasi. Xikolo lexi xi hambete xi va kwalaho ku fikela hi April 1995 loko xi rhurhiseriwa eNtsindza wa Dyondzo wa Watchtower ePatterson le New York.

Eka malembe ya 50 lama hundzeke, ndlela leyi Watchtower Farms a yi tirha ha yona yi cincile. Hambiswiritano, ku endliwa matshalatshala leswaku Timbhoni ta Yehovha leti tirhaka eBethele ya le United States le New York ti kuma swakudya leswinene.

Sweswinyana Timbhoni ta Yehovha eWallkill ti lunghisa miako ya tona ya khale ti tlhela ti aka tihofisi, tindhawu to tshama eka tona ni tin’wana. Ntirho lowu hinkwawo wu ta pfuna Watchtower Farms leswaku yi hambeta yi phamela swakudya swa moya eka Timbhoni ta Yehovha leti andzaka etikweni hinkwaro.

David Walker, loyi a tshahiweke eku sunguleni, u tlhele a ku: “Eka malembe ya 50 lama hundzeke, ndzi ve ni ntsako swinene ku vona ndlela leyi purasi ra le Wallkill leri sunguleke ri ri ritsongo ri kuleke ha yona ni ndlela leyi ri seketelaka ha yona ntirho wa hina wo dyondzisa vanhu rungula leri humaka eBibeleni.”