Ndzi velekiwe eCiudad Obregón en’walungwini wa Mexico, ndzi n’wana wa vuntlhanu eka va kaye. A hi tshama ehandlenyana ka doroba laha bava a ri ni purasi leritsongo. A ku ri ndhawu yo tsakisa yo tshama eka yona naswona ndyangu wa ka hina a wu ri ni vun’we wu tlhela wu tsaka. Lexi twisaka ku vava, loko ndzi ri ni ntlhanu wa malembe moya wa xidzedze wu onhe purasi ra ka hina naswona hi boheke ku rhurhela eka doroba rin’wana.

 Bava swi sungule ku n’wi fambela kahle eka swa timali. Kambe hi nkarhi wolowo u sungule ku va xidakwa. Sweswo swi onhe vukati bya yena ni ku onhela hina vana. Hi sungule ku dzaha fole leri a hi n’wi yivela rona. Loko ndzi ri ni tsevu wa malembe ndzi sungule ku dakwa. Ku sukela kwalaho, vatswari va mina va ve hambana naswona mahanyelo ya mina ma ye ma nyanya ku biha.

 Mhani u fambe na hina loko a ya tshama ni wanuna un’wana. A nga n’wi nyiki mali naswona mali leyi mhani a yi hola a yi nga koti ku hi hlayisa. Mina ni vamakwavo va mina a hi pfa hi khomakhoma swikoropo kambe swimalana leswi a hi swi kuma a swi nga nyawuli. A ndzi pholicha tintangu ndzi xavisa xinkwa, maphephahungu, tichepisi ni swin’wana. A ndzi jikajika ni doroba hinkwaro ndzi lavalava swakudya etibinini ta vanhu va swifumi.

 Loko ndzi ri ni khume wa malembe, wanuna un’wana u ndzi komberile leswaku ndzi ya tirha na yena laha ku lahliwaka thyaka. Ndzi pfumerile ndzi tshika xikolo kutani ndzi suka ekaya. A ndzi holela swimalana hi siku a tlhela a ndzi nyika swakudya leswi a swi huma endhawini leyi a ku lahliwa thyaka. A ndzi tshama exiyindlwanini lexi a ndzi xi ake hi leswi a ndzi swi kume laha a ku lahliwa thyaka. Vanhu lava a ndzi tshama na vona a va rhuketela naswona a va nga tikhomanga kahle hi swa masangu. Vo tala a va godzomberiwe hi swidzidziharisi naswona a va ri swidakwa. Vutomi a byi ndzi tikela swinene hi nkarhi wolowo naswona a ndzi rila vusiku byin’wana ni byin’wana ndzi tlhela ndzi tela hi ku chava. Hikwalaho ka vusweti ni ku va ndzi tshike xikolo ndzi titwe ndzi nga ri nchumu. Ndzi tshame laha ku lahliwaka kona thyaka ku ringana malembe manharhu, kukondza ndzi ya tshama exifundzheni xin’wana xa Mexico. Kwalaho ndzi fike ndzi tirha epurasini rin’wana ndzi kha swiluva ni khothoni ndzi hlengeleta mimova ni ku cela mazambhana.

 Endzhaku ka malembe ya mune ndzi tlhelele eCiudad Obregón. Hahani wa mina loyi a ri n’anga u tshame na mina ekaya ra yena. Ndzi sungule ku va ni milorho yo chavisa ni ku tshikileleka lerova ndzi ehleketa ku tidlaya. Vusiku byin’wana ndzi khongerile eka Xikwembu ndzi ku: “Hosi loko ku ri leswaku wa hanya ndzi lava ku ku tiva naswona ndzi ta ku tirhela hilaha ku nga heriki. Loko ku ri na vukhongeri bya ntiyiso ndzi lava ku byi tiva.”

 I khale ndzi swi lava ku tiva Xikwembu. Loko ndza ha ri ntsongo ndzi ye eka tikereke to tala leti a tidyondzisa tidyondzo to hambanahambana kambe hinkwato a ti ndzi tsakisanga. Ku hava na yin’we leyi vuleke swo tala hi Bibele kumbe leyi ndzi pfuneke leswaku ndzi tiva Xikwembu. Eka tikereke tin’wana a va kandziyisa ngopfu mhaka ya ku nyikela kasi eka tin’wana a va tikhoma ku biha hi swa masangu.

 Loko ndzi ri ni 19 wa malembe, sivara wa mina u ndzi byele leswaku Timbhoni ta Yehovha ti n’wi kombe leswi Bibele yi swi vulaka hi ku gandzela swifaniso. U ndzi hlayele Eksoda 20:4, 5. Leri vulaka leswaku u nga tshuki u tiendlela xifaniso lexi vatliweke. Ndzimana 5 yi ri: “U nga tshuki u swi nkhinsamela kumbe u yengiwa ku swi tirhela, hikuva mina Yehovha Xikwembu xa wena ndzi Xikwembu lexi lavaka ku tinyiketela loku hlawulekeke.” Sivara wa mina u ndzi vutisile a ku: “Loko Xikwembu a xi tirhisa swifaniso ku endla masingita kumbe xi lava leswaku hi swi tirhisa loko hi xi gandzela, hikwalaho ka yini xi nga lavi hi swi tirhisa?” Sweswo swi endle leswaku ndzi ehleketa. Endzhaku ka leswi, hi vulavurisane ko tala hi Bibele. Ndzi tiphine swinene hi mimbulavurisano leyi, lerova a ndzi twa onge nkarhi wa tsutsuma loko hi bula.

 Endzhaku, u fambe na mina enhlengeletanweni ya vandlha ya Timbhoni ta Yehovha. Ndzi hlamale ngopfu hileswi ndzi nga swi vona ni ku swi twa kwalaho. Hambi ku ri vantshwa a va ri ni xiphemu eka nongonoko wa kona naswona a va vulavula hi ku khuluka exitejini. Ndzi te, ‘Vanhu lava va dyondzeka laha!’ Hambileswi a ndzi ri ni misisi yo leha ndzi languteka ndzi thyakile kambe Timbhoni ti ndzi amukele hi mandla mambirhi. Ndyangu wun’wana wu ndzi rhambile leswaku ndzi ya dya swakudya swa ni madyambu na wona endzhaku ka minhlangano!

 Loko ndzi dyondza Bibele ni Timbhoni, ndzi dyondze leswaku Yehovha Xikwembu i Tatana la nga ni rirhandzu loyi a khathalaka hi hina ku nga khathariseki xiyimo xa timali, laha hi humaka kona, rixaka kumbe dyondzo. Hakunene a nga yi hi nghohe. (Mint. 10:34, 35) Eku heteleleni ndzi ve ni vuxaka ni Xikwembu. Ku titwa ndzi nga pfuni nchumu swi ve swi hela.

 Vutomi bya mina byi sungule ku cinca! Ndzi tshike ku dzaha, ku nwa byala ngopfu ni ku rhuketela. Xikhomela lexi a ndzi ri na xona ku sukela loko ndza ha ri ntsongo xi ve xi suka ni milorho yo chavisa leyi a ndzi ri na yona yi ve yi hela. Ndzi kote ku hlula ku titwa ndzi nga pfuni nchumu loku se a ku dzime timitsu leswi vangiweke hi mbitsi leyi a ndzi ri na yona loko ndza ha ritsongo ni ku va ndzi nga dyondzanga.

 Ndzi ni nsati lonene loyi a rhandzaka Yehovha naswona wa ndzi seketela. Sweswi ndzi mulanguteri la fambafambaka wa Timbhoni ta Yehovha, ndzi endzela mavandlha leswaku ndzi ma khutaza ni ku dyondzisa ndyangu wa mina wa vamakwerhu. Ndzi khensa dyondzo ya Bibele leyi nga ndzi pfuna ndzi kuma rungula leri Xikwembu xi hi nyikaka rona, a ndza ha titwi ndzi nga pfuni nchumu.