“Loko u lava ku tiva Xikwembu, dyondza Bibele ni Timbhoni ta Yehovha.” Swi ndzi hlamarisile ku twa marito lawa. Hi nkarhi wolowo, se a ku ri khalenyana ndzi ri karhi ndzi dyondza ni Timbhoni ta Yehovha. Kambe leswaku u kota ku twisisa leswaku hikwalaho ka yini ndzi hlamarile, i nge ndzi ku tshweta switsongo hi vutomi bya mina.

 Ndzi velekiwe eQuezaltepeque, edorobeni ra El Salvador. A ndzi ri n’wana wa vutsevu eka vana va 15. Vatswari va mina va ringetile ku ndzi kurisa ndzi ri n’wana wo tshembeka ni ku xixima nawu. Ku engetela kwalaho, Leonardo ni Timbhoni ta Yehovha a va hi vhakela leswaku va hi dyondzisa Bibele. Kambe a ndzi swi bisa hi moya leswi a ndzi swi dyondza naswona a ndzi tshamela ku endla swiboho swa vuphukuphuku. Loko ndzi ri ni malembe ya 14, ndzi sungule ku nwa byala ni ku dzaha tidrugs ni vanghana va mina va le xikolweni. Hi tshike xikolo kutani hi joyina ntlawa wa tinsulavoya naswona ndzi tekelele xikombiso xa vona. A hi tshama eswitaratini, hi tekela vanhu mali hi nkani leswaku hi ta enerisa swilaveko swa hina.

 Loko ndzi ri na tinsulavoya a ndzi titwa ndzi ri ekaya. A ndzi twa onge ndzi boheka ku tshembeka eka vona. Hi xikombiso, un’wana wa vanghana va mina loko tidrugs ti n’wi dlonyorile u sungule ku fumbutela muakelani wa mina. Loko va ri karhi va fumbutelana, makhelwani u vambe munghana wa mina kutani a fonela maphorisa. Hi ku hlundzuka ndzi sungule ku fayetela movha wa muakelani leswaku a ta tshika munghana wa mina a famba. Muakelani u ndzi kombele leswaku ndzi yima kambe hi nkarhi wolowo a ndzi ri bizi ndzi onha ni ku fayetela mafasitere ya movha, ndzi n’wi bisa hi moya.

 Loko ndzi ri ni malembe ya 18 ntlawa wa hina wa tinsulavoya wu lwe ni maphorisa. Loko ndza ha lava ku va hoxa hi bomo, leyi a hi tiendlele yona yi buluke evokweni ra mina, a ndzi swi tivi leswaku swi tise ku yini. Ndzi tsundzuka loko ndzi vona voko ra mina ri lo cakacaka kutani ndzi titivala. Ndzi te loko ndzi ku phapha ndzi kuma leswaku ndzi le xibedlhele, loko ndzi ku hahlu ndzi kuma leswaku voko ra mina ra xinene a ra ha ri kona, ndleve ya mina ya xinene a ya ha twi naswona tihlo ra mina ra xinene a ra ha voni kahle.

 Hambileswi a ndzi vavisekile, loko ndzi huma exibedlhele ndzi tlhelele eka ntlawa wa mina wa tinsulavoya. Endzhakunyana ka sweswo tinsimbi tirhosile, ndzi yisiwa ejele. Loko ndzi ri kwalaho vunghana bya mina na tinsulavoya byi ye byi kula. A hi tshama swin’we, hi dya swin’we, hi dzhaha marijuana ku kondza hi ya eku etleleni.

 Loko ndzi ri ejele Leonardo, u ndzi vhakerile. Loko hi ri karhi hi dya bulo u kombetele eka thathu leyi a yi ri evokweni ra mina ra xinene. U ndzi vutise a ku: “Xana wa swi tiva leswaku thathu leyi yi yimela yini?” Ndzi te, “Ndzi yi tiva kahle, yi yimela timhaka ta masangu, tidrugs ni ku titlonya hi vutomi.” Kambe Leonardo u te: “Mina ndzi vona onge ti vula xibedlhele, jele ni rifu. A wu ri exibedlhele naswona sweswi se u le jele. Wa swi tiva leswaku se ku sale yini.”

 Marito ya Leonardo, ma ndzi tsone vurhongo. A tiyisile. A ndzi ti celela sirha hi mahanyelo ya mina. Leonardo u ndzi kombele leswaku ndzi dyondza Bibele na yena naswona ndzi pfumerile. Leswi ndzi swi dyondzeke eBibeleni swi cince vutomi bya mina. Hi xikombiso, Bibele yi ri, “vunakulobye byo biha byi onha mikhuva leyi pfunaka.” (1 Vakorinto 15:33) Nchumu wo sungula lowu a ndzi fanele ndzi wu endla a ku ri ku kuma vanghana lavantshwa. Ndzi sungule ku nga ha yi eka mithini wa tinsulavoya kambe ndzi ya eka timithini ta Timbhoni ta Yehovha leti a ti khomeriwa ejele. Loko ndzi ri eka mithini wa Timbhoni ndzi hlangane ni xivochwa lexi vuriwaka Andrés, lexi khuvuriweke tanihi un’wana wa Timbhoni ta Yehovha ejele. U ndzi rhambe leswaku ndzi dya na yena swakudya. Ku sukela kwalaho, a ndzi nga pfuki ni mpundzu leswaku ndzi ta dzaha marijuana. Ematshan’weni ya sweswo mina na Andrés a hi bula hi ndzimana ya Bibele mixo wun’wana ni wun’wana.

 Tinsulavuya ti vone leswaku ndzi sungula ku cinca. Kutani, boso ya tinsulavoya u ndzi byele leswaku u lava ku vulavula na mina. A ndzi khome hi rhumbyana. A ndzi nga swi tivi leswaku u ta ndzi endla yini, hikuva ku tshika ku va nsulavoya a hi ku dya vuswa. U te: “Hi xiye leswaku a wa ha ti emithinini wa hina kambe u ya emithinini wa Timbhoni ta Yehovha. U kunguhate ku endla yini?” Ndzi n’wi byele leswaku ndzi lava ku ya emahlweni ndzi dyondza Bibele ni ku cinca vutomi bya mina. Lexi ndzi hlamariseke, u vule leswaku tinsulavoya ti ta xixima xiboho xa mina, loko ntsena ndzi kombisa leswaku hakunene ndzi lava ku va Mbhoni ya Yehovha. Kutani u te: “Loko u lava ku tiva hi Xikwembu, dyondza Bibele ni Timbhoni ta Yehovha. Hi langutele leswaku u tshika ku endla swilo swo biha. Ndza ku khensisa. U teke goza lerinene. Timbhoni ti ta ku pfuna hakunene. Ndzi tshame ndzi dyondza na tona eUnited States naswona maxaka ya mina i Timbhoni ta Yehovha. U nga chavi. Yana emahlweni.” A ndza ha khomiwe hi rhumbyana kambe hi nkarhi lowu fanaka a ndzi tsakile. Ndzi n’wi khensa swinene Yehovha. Ndzi twe onge ndzi xinyenyana lexi a xi pfaleriwe ehokweni, naswona ndzi twisise marito ya Yesu lama nge: “Mi ta tiva ntiyiso, kutani ntiyiso wu ta mi ntshunxa.”​—Yohane 8:32.

 Vanghana va mina va khale, a va ndzi ringa hi ku ndzi nyika tidrugs. A ndzi nge kali ndzi mi xisa, nkarhi wun’wana a ndzi ti teka. Kambe endzhaku ko khongela hi ku phikelela ndzi hetelele ndzi tshike mukhuva wolowo.​—Pisalema 51:10, 11.

 Endzhaku ka loko ndzi huma ejele vo tala a va ehleketa leswaku a ndzi ta tlhelela eka mikhuva ya mina ya khale kambe a swi vanga tano. Ematshan’weni ya sweswo a ndzi ya ejele leswaku ndzi ya dyondzisa swivochwa swin’wana leswi ndzi swi dyondzeke eBibeleni. Eku heteleleni, vanghana va mina va khale a va swi xiya leswaku ndzi cincile. Lexi twisaka ku vava, valala va mina a va nga swi voni sweswo.

 Siku rin’wana loko hi ri eku chumayeleni, mina ni makwerhu un’wana hi tikume hi rhendzeriwe hi ntlawa wa tinsulavoya, leti a ti hlomile, ti lava ku ndzi dlaya. Makwerhu loyi a ndzi famba na yena, hi ndlela ya musa kambe a kombisa xivindzi u va byele leswaku a ndza ha ri nsulavoya. Hi nkarhi wolowo a ndzi ringeta ku endla onge a ndzi chuhanga. Endzhaku ko ndzi himetela ni ku ndzi lemukisa leswaku ndzi nga ha tshuki ndzi veke nenge kwalaho, va veke matlhari ya vona kutani va hi tshika hi famba. Hakunene Bibele yi cince vutomi bya mina. Loko a ku ri khale ka mina a ndzi ta ringeta ku rihisela. Kambe sweswi ndzi yingisa ndzayo ya le Bibeleni leyi nga eka 1 Vatesalonika 5:15: “Tiyisekani leswaku ku nga vi na munhu la tlheriselaka swo biha hi swo biha eka van’wana, kambe mikarhi hinkwayo mi lavisisa leswi nga swinene exikarhi ka n’wina ni le ka vanhu van’wana hinkwavo.”

 Ku sukela loko ndzi ve un’wana wa Timbhoni ta Yehovha, ndzi ve munhu wo tshembeka. A swi nga olovi. Hi ku pfuniwa hi Yehovha Xikwembu, ndzayo leyi humaka eBibeleni ni ku seketeriwa hi vanghana va mina lavantshwa, swi ndzi pfune leswaku ndzi kota ku cinca. A ndzi swi lavi ku tlhelela eka mikhuva ya mina ya khale.​—2 Petro 2:22.

 A ndzi ri ni madzolonga naswona a ndzi tshama ndzi dye makala. Ndzi anakanya leswaku a ndzi ta va ndzi funye buwa loko a ndzi nga lo cinca mahanyelo ya mina. Leswi ndzi swi dyondzeke eBibeleni swi hundzule vutomi bya mina. Ndzi tshike mikhuva yo biha. Ndzi dyondze ndlela yo hanyisana hi ku rhula ni valala va mina. (Luka 6:27) Naswona sweswi ndza tiphina hi ku va ni vanghana lava ndzi pfunaka leswaku ndzi hlakulela timfanelo letinene. (Swivuriso 13:20) Ndza tsaka hi leswi ndzi hanyaka vutomi lebyi nga ni xikongomelo ni ku tirhela Xikwembu lexi ndzi rivaleleke swilo swo biha leswi ndzi swi endleke.​—Esaya 1:18.

 Hi 2006, ndzi ye exikolweni xa vachumayeri lexi endleriweke Vakreste lava nga tekangiki. Hi ku famba ka nkarhi ndzi cate ni nsati wa mina wo rhandzeka naswona hi ni ntombhi leyi hi yi kurisaka. Sweswi ndzi heta nkarhi wo tala ndzi dyondzisa vanhu misinya ya milawu ya Bibele leyi ndzi pfuneke. Ndzi tirha tanihi nkulu evandlheni naswona ndzi ringeta ku pfuna vantshwa leswaku va papalata ku endla swihoxo leswi ndzi swi endleke ndza ha ri ntsongo. Ematshan’weni yo ticelela sirha ndzi tilunghisela vumundzuku lebyi Xikwembu xi hi tshembisaka byona eBibeleni.