Ndzi kulele endhawini leyi rhuleke ya Tampere leyi nga ekule ni doroba ra Finland. Ndyangu wa ka hina a wu nga tinyiketelanga ngopfu eka swa vukhongeri kambe a wu teka dyondzo yi ri ya nkoka ni ku hi khutaza ku va ni mahanyelo lamanene. Manana i Mujarimani, naswona loko ndza ha ri ntsongo hakanyingi a ndzi tshama ndzi ri evupeladyambu bya jarimani eka va kokwana.

 Ku sukela loko ndza ha ri ntsongo, a ndzi rhandza mintlangu. Loko ndza ha ri ntsongo a ndzi tlanga mintlango yo hambanahambana kambe loko ndzi ri ni malembe ya 14, ndzi endle xiboho xo tlanga thenisi ntsena. Loko ndzi ri ni malembe ya 16 a ndzi tiletela kambirhi kumbe kanharhu hi siku, a ndzi ri ni valeteri vambirhi lava nga ni vuswikoti kutani ni madyambu a ndzi prakitisa ndzi ri ndzexe. A ndzi rhandza swilo swo tala leswi nga kona eka thenisi; ntlangu lowu a wu ndzi phyuphyisa emianakanyweni ni le mirini. Hambileswi a ndzi swi tsakela ku va swin’we ni vanghana va mina hi n’wa tibiya kambe a ndzi si tshama ndzi tirhisa byala kumbe swidzidzirisi lerova swi ndzi nghenisa ekhombyeni. A ndzi tshama ndzi khomekile hi ku tlanga thenisi.

 Ndzi sungule ku tlanga eka mphikizano wa ATP loko ndzi ri ni malembe ya 17. a Endzhaku ko wina mimphikizano yo tala, ndzi sungule ku duma etikweni hinkwaro. Loko ndzi ri ni malembe ya 22, ndzi ve un’wana wa vanhu 50 lava a va ri va tlangi va ndhuma va thenisi emisaveni hinkwayo.

 Ndzi hete malembe yo tala ndzi ri karhi ndzi fambafamba ni matiko yo hambanahambana ndzi tlanga thenisi. Ndzi vone tindhawu to saseka kambe ndzi tlhele ndzi xiya leswaku misava yi tele hi swiphiqo leswi katsaka vugevenga, ku tirhisiwa ka swidzidzirisi hi ndlela yo biha ni ku thyakisiwa ka mbango. Hi xikombiso, loko hi ri eUnited States, hi byeriwe leswaku hi nga yi emadorobeni man’wana hikuva ku tele vugevenga. Leswi hinkwaswo a swi nga ndzi dyisi byi rhelela. Hambileswi a ndzi endla swilo leswi a ndzi swi rhandza a ndzi nga eneriseki.

 Sanna, nhwanyana loyi a ndzi rhandzana na yena, u sungule ku dyondza Bibele ni Timbhoni ta Yehovha. A swi ndzi hlekisanyana ku n’wi vona a hisekela swa vukhongeri kambe a ndzi nga lwisani na swona. Hi tekane hi 1990, naswona u khuvuriwe tanihi un’wana wa Timbhoni ta Yehovha lembe leri landzelaka. A ndzi nga byi rhandzi vukhongeri kambe a ndzi tshemba leswaku Xikwembu xi kona. Ndzi tsundzuke leswaku kokwana wa mina wa Mujarimani a rhandza ku hlaya Bibele naswona u ndzi dyondzise ku khongela.

 Siku rin’wana mina na Sanna ni va tekani va Timbhoni a hi ti humesile, hiloko Kari, a ndzi komba vuprofeta bya Bibele lebyi vulavulaka hi “masiku yo hetelela.” (2 Timotiya 3:1-5) Leswi swi ndzi tsakisile, hikuva a swi hlamusela leswaku hikwalaho ka yini ku tele swilo swo biha emisaveni. Siku rero a hi vulavulanga ngopfu hi timhaka ta vukhongeri. Ku sukela kwalaho, ndzi sungule ku vulavurisana na Kari hi rungula ra le Bibeleni naswona a ndzi twisisa swilo hinkwaswo leswi a ndzi swi dyondza. Leswi a ndzi tshama ndzi khomekile a swi hi tikela ku hlangana nkarhi na nkarhi kambe Kari a nga helanga matimba. A hlamula swivutiso leswi ndzi swi vutiseke loko hi ri karhi hi dyondza hi ku tsala mapapila. Swivutiso hinkwaswo leswi ndzi swi vutiseke swi hlamuriwe hi ku tirhisa Bibele naswona hakatsongotsongo ndzi sungule ku twisisa nhlokomhaka ya Bibele hinkwayo ku nga leswaku Mfumo wa Xikwembu hi wona wu nga ta hetisisa xikongomelo xa xona. Ku dyondza vito ra Xikwembu, Yehovha ni ku vona leswi xi hi endleleke swona swi ndzi tsakise ngopfu. (Pisalema 83:18) Kambe lexi ndzi tsakiseke ku tlula hinkwaswo hileswaku a ku nga ri xikolokolo leswaku Yehovha a humesa nkutsulo, u endle tano hi rirhandzu. (Yohane 3:16) Ndzi tlhele ndzi dyondza leswaku ndzi ni lunghelo ro va munghana wa Xikwembu ni ro kuma vutomi lebyi nga heriki emisaveni ya paradeyisi leyi nga ta va ni ku rhula. (Yakobo 4:8) Ndzi tivutisa leswaku, “Ndzi nga kombisa ku khensa hi ndlela yihi?”

 Ndzi anakanyisisa hi vukheta hi vutomi bya mina. Ndzi dyondze eBibeleni leswaku ntsako wa xiviri wu tisiwa hi ku nyika naswona ndzi xiye leswaku ndzi fanele ndzi byela van’wana leswi ndzi swi dyondzeke. (Mintirho 20:35) Tanihi mutlangi langa ni vutshila a ndzi va ekule ni le kaya masiku ya 200 elembeni ndzi tlanga mimphikizano. Ndyangu wa mina a wu khathala ha mina, vuleteri bya mina ni ntirho wa mina. Ndzi xiye leswaku ndzi fanele ndzi endla ku cinca.

 A ndzi swi tiva leswaku ku tshika ntirho wo tihanyisa wa swa mintlango hikwalaho ka vukhongeri, i xiboho lexi vo tala va nga ta ka va nga xi twisisi. Kambe lunghelo ro tiva Yehovha ku antswa ni ku kuma vutomi lebyi nga heriki i swa risima ku tlula nchumu wihi ni wihi lowu u nga wu kumaka loko u tlanga thenisi, swi ndzi oloverile ku endla xiboho. Ndzi endle xiboho xo swi ba hi makatla leswi nga ha vuriwaka hi vanhu van’wana. Tsalwa leri ndzi pfuneke leswaku ndzi hlula ndzingo wolowo i Pisalema 118:6 leyi nge: “Yehovha u le tlhelweni ra mina; a ndzi nge chavi.Xana munhu wa nyama a nga ndzi endla yini?”

 Enkarhini wolowo, tikhampani tin’wana a ti lava ku ndzi nyika ntirho lowu holelaka wo tlanga thenisi, lowu a wu ta endla leswaku ndzi nga ha karhateki hi nchumu ku ringana malembe yo tala. A na se a ndzi endle xiboho kutani ndzi ale ntirho wolowo naswona swi nga siya kwihi ndzi tshike ku tlanga eka mimphikizano ya ATP. Ndzi ye emahlweni ndzi dyondza Bibele kutani hi July 2, 1994, ndzi khuvuriwe tanihi un’wana wa Timbhoni ta Yehovha.

 A swi kalanga swi lava leswaku ndzi weriwa hi mahlomulo leswaku ndzi dyondza hi Xikwembu. Naswona a ndzi si tshama ndzi lavisisa ntiyiso wa le Bibeleni. Swilo a swi ndzi fambela kahle naswona a ndzi nga pfumali nchumu. Swi endleke hi xitshuketa onge hiloko ntiyiso wa le Bibeleni a wu lo yimela mina leswaku ndzi wu kuma, ndzi kume leswaku vutomi byi ni xikongomelo ni leswaku vutomi bya antswa ku tlula leswi a ndzi anakanya! Ndyangu wa hina wu na vun’we ku tlula rini na rini. Ndzi tsakisiwa hileswi vana va mina va majaha va tekeleleke xikombiso xa mina tanihi Mukreste ku nga ri tanihi mutlangi wa thenisi.

 kNdza ha swi rhandza ku tlanga thenisi. Emalembeni lama hundzeke a ndzi ti hanyisa hi ntirho wa thenisi, hi xikombiso a ndzi tirha tanihi muleteri kumbe mininjhere wa ntlangu wa thenisi. Kambe vutomi bya mina a bya ha lawuriwi hi swa mintlangu. Eku sunguleni a ndzi tiletela nkarhi wo leha leswaku ndzi va nghwazi eka ntlangu wa thenisi. Sweswi tanihi muchumayeri wa nkarhi hinkwawo, swa ndzi tsakisa ku tirhisa nkarhi wa mina ku pfuna van’wana va dyondza ni ku tirhisa misinya ya milawu ya Bibele leyi cinceke vutomi bya mina. Ndza tsako hi ku rhangisa vuxaka bya mina na Yehovha Xikwembu ni ku byela van’wana hi ntshembo lowu ndzi nga na wona hi vumundzuku lebyi tsakisaka.​—1 Timotiya 6:19.