Vavalangi va tala ku endzela xidorobana xa Pagsanjan, ePhilippines va ya vona mati lama khulukaka etintshaveni. Tata wa mina Nardo Leron u kulele kona va ri evusiwanini. Loko a vone vukungundzwana lebyi a byi endliwa hi va tirhela mfumo, maphorisa, ku katsa ni ntirhweni wakwe, u sungule ku va ni vukarhi swinene.

 Vatswari va mina a va ri ni vana va nhungu, va hi kurise ku tika va kulula va n’watseka. Hakanyingi a va nga vuyi ekaya, a va heta nkarhi wo tala va masin’wini lama nga etintshaveni. Mikarhi yo tala mina na buti Rodelio a hi boheka ku tivonela naswona a hi dlaya hi ndlala. Loko ha ha ri vatsongo a hi nga ri na nkarhi wo tlanga. Ku sukela loko hi ri ni malembe ya nkombo, a hi fanele hi ya tirha emasin’wini, a hi rhwala swiputsa swo tika swa tikhokhonati hi suka entshaveni hi rhelela na tona. Loko hi nga swi koti ku ti rhwala a hi boheka ku ti kokakoka.

 A hi tiyiselela ku mbeyeteriwa hi tata kambe lexi a xi hi twisa ku vava ngopfu hiloko hi n’wi vona a ba manana. A hi ringeta ku n’wi lamulela kambe a ko va nyuku wa mbyana. Mina na Rodelio hi endle xikungu xo dlaya tatana loko hi kula. A hi swi navela ku va ni tatana loyi a hi rhandzaka!

 Ndzi suke ekaya ndzi duka na ro, loko ndzi ri ni malembe ya 14, hikwalaho ko pfilunganyiwa ni ku hlundzukisiwa hi madzolonga ya tatana. Ku ringana nkarhi wo karhi a ndzi hanya eswitarateni naswona ndzi sungule ku dzaha mbangi. Ndzi hetelele ndzi tirha ku fambisa xikwekwetsu ndzi rhwala vavalangi ndzi va yisa laha ku khulukaka mati etintshaveni.

 Endzhakunyana ka malembe ma nga ri mangani, ndzi ye eyunivhesiti eManila. Kambe a ndzi ri ni nkarhi wuntsongo wo hlaya hikuva hi mahelovhiki a ndzi tlhelela ePagsanjan ndzi ya tirha. Hi nkarhi lowu vutomi bya mina a byi tika, ndzi nga ri na xikongomelo evuton’wini naswona hambi ku ri mbangi a yi nga ha ma huhati maxangu ya mina. Ndzi sungule ku tirhisa swidzidzirisi leswi vuriwaka, methamphetamine, khokheyini na heroyini. Hakanyingi swidzidzirisi swi endla leswaku munhu a tikhoma ku biha hi swa masangu. A ndzi ri xisiwana naswona a ndzi vona vubihi hinkwako. A ndzi venga mfumo naswona a ndzi tibyela leswaku hi wona wu ndzi vangelaka maxangu. Ndzi kale ndzi vutisa Xikwembu ndzi ku, “Hikwalaho ka yini vutomi byi tika hi ndlela leyi?” Kambe a ndzi kumanga nhlamulo etikerekeni to hambanahambana. A ndzi tirhisa swidzidzirisi swo tala leswaku ndzi rivala maxangu ya mina.

 Hi 1972, swichudeni swa le Philippines swi kunguhate ku toyitoyela mfumo. Ndzi swi joyinile naswona a ku ri ni hasahasa. Vanhu vo tala va khomiwile va yisiwa ejele naswona endzhaku ka tin’hwetinyana tiko hinkwaro ri sungule ku lawuriwa hi masocha.

 Ndzi tlhele ndzi ya tshama eswitarateni hikwalaho ko chava ku khomiwa hikuva na mina a ndzi ri un’wana wa vaxandzuki. Leswaku ndzi kota ku kuma mali yo xava swidzidzirisi, ndzi sungule ku yiva naswona eku heteleleni a ndzi pfuna van’wankumi ni vahlapfa hi bindzu ro homboloka. A ndzi nga ha ri na mhaka, hambi ndza fa kumbe ndza hanya.

 Kasi hi nkarhi wolowo manana swin’we ni ndzisana ya mina ya mfana a va sungule ku dyondza Bibele ni Timbhoni ta Yehovha. Tatana u bave a khalakhasa kutani a hisa tibuku ta Bibele. Kambe a va tshikanga ku dyondza naswona va hetelele va khuvuriwile va va Timbhoni ta Yehovha.

 Siku rin’wana Mbhoni ya Yehovha yi vulavule na tatana hi xitshembiso lexi nga eBibeleni xa nkarhi lowu vululami byi nga va kona emisaveni hinkwayo. (Pisalema 72:12-14) Mhaka leyi yi hlamarise tatana lerova a sungula ku yi lavisisa hi yexe. U kume leswaku Bibele yi vula leswaku Xikwembu xi tshembisa ku tisa mfumo wo lulama naswona u tlhele a kuma ni milawu leyi vekeriweke vavanuna na vatatana. (Vaefesa 5:28; 6:4) Swi nga si ya kwihi, yena ni vamakwerhu lavan’wana va ve Timbhoni. Leswi a ndzi ri ekule a ndzi nga swi tivi leswi a humelela kwale kaya.

 Hi 1978 ndzi rhurhele eAustralia. Hambileswi se a ndzi ri etikweni leri a ri ri ni ku rhula, mina a ndzi nga ri na ku rhula. Ndzi ye emahlweni ndzi kukutlela byala ni ku tirhisa swidzidzirisi. Hi ku famba ka nkarhi, lembe rero ndzi endzeriwe hi Timbhoni ta Yehovha. Leswi ti ndzi kombeke swona eBibeleni mayelana ni misava leyi nga ni ku rhula swi ndzi tsakisile, kambe a ndzi nga swi lavi ku nghena kereke ya tona.

 Endzhakunyana ka sweswo, ndzi tlhelele ePhilippines ndzi ya tshama mavhiki ma nga ri mangani. Vamakwerhu va ndzi byele leswaku tatana u ringeta hi matimba ku va munhu lonene, kambe a ndza ha n’wi hlundzukerile kutani a ndzi nga lavi no n’wi vona.

 Ndzisana ya mina ya nhwanyana yi ndzi hlamusele hi ku tirhisa Bibele leswaku hikwalaho ka yini ku tele ku maxangu ni vubihi laha misaveni. Swi ndzi hlamarisile ku twa xinhwanyatana lexi xi kota ku hlamula swivutiso swa mina. Loko ndzi nga si famba, tatana u ndzi nyike buku leyi nge, U Nga Hanya Hi Masiku aParadeyisini eMisaveni. a U te: “U nga ha yingayingi. Buku leyi yi ta ku pfuna ku kuma leswi u swi lavaka.” U ndzi kombele leswaku ndzi lava Timbhoni ta Yehovha loko ndzi tlhelela eAustralia.

 Ndzi yingise xitsundzuxo xa tatana naswona ndzi kume Holo ya Mfumo ya Timbhoni ta Yehovha ekusuhi ni le kaya ka mina eBrisbane. Ndzi pfumele ku dyondzisiwa Bibele. Vuprofeta bya Bibele byo tanihi bya Daniyele ndzima 7 na Esaya ndzima 9 byi ndzi kombe leswaku mfumo wa Xikwembu lowu nga riki na vukungundzwana hi wona wu nga ta fuma misava enkarhini lowu taka. Ndzi dyondze leswaku hi ta hanya vutomi byo nandziha emisaveni leyi nga Paradeyisi. A ndzi lava ku rhandziwa hi Xikwembu, kambe ndzi xiye leswaku a ndzi fanele ndzi dyondza ku lawula vukarhi bya mina, ndzi tshika ku tirhisa swidzidzirisi ni ku kukutlela byala ndzi tlhela ndzi tshika ku tikhoma loko biha hi swa masangu. Ndzi hambane ni ntombhi leyi a ndzi tshama na yona ndzi tlhela ndzi tshika ku tirhisa swidzidzirisi. Loko ndzi ri karhi ndzi dyondza ku tshemba Yehovha ndzi khongele leswaku a ndzi pfuna ndzi cinca ni swin’wana.

 Hakatsongotsongo ndzi sungule ku swi xiya leswaku leswi ndzi swi dyondzaka hakunene swi ni matimba yo hundzula vutomi bya munhu. Bibele yi vula leswaku loko hi tikarhata hi nga swi kota ku ambala “vumunhu lebyintshwa.” (Vakolosa 3:9, 10) Loko ndzi ri karhi ndzi tikarhatela ku cinca vumunhu bya mina, ndzi sungule ku xiya leswaku mhaka leyi ndzi yi tweke ya ta ku cinca ka vumunhu bya tatana yi fanele yi ri ntiyiso. Hikwalaho, ematshan’weni yo va ni xikhomela, se a ndzi lava ku endla ku rhula na yena. Ndzi hetelele ndzi n’wi rivalerile tatana ni ku tshika xikhomela lexi ndzi veke na xona eka yena ku sukela ndza ha ri ntsongo.

 Loko ndza ha ri muntshwa hakanyingi a ndzi yengiwa hi vanhu lava nga ni mahanyelo yo biha ngopfu. Bibele yi tiyisile, hakunene xinakulobye xo biha xi ndzi hambukisile. (1 Vakorinto 15:33) Kambe sweswi se ndzi ni vanghana vo tshembeka lava nga Timbhoni ta Yehovha naswona va ndzi pfunile leswaku ndzi va munhu lonene. Nakambe ndzi teke Loretta nsati wa mina, loyi na yena a nga Mbhoni ya Yehovha. Mina ni nghamu hi dyondzisa vanhu ndlela leyi Bibele yi nga ta va pfuna ha yona.

 Ndza yi khensa Bibele, a ndzi nga tshembi leswaku tatana a nga pfuka a hundzukile a va nuna loyi a rhandzaka manana, loyi a titsongahataka a tlhela a va Mukreste la rhandzaka ku rhula. Loko ndzi hlangana na tatana endzhaku ka loko ndzi khuvuriwile ndzi va Mbhoni ya Yehovha hi 1987, u ndzi angarhile. A ku ri ro sungula evuton’wini bya mina ku angarhiwa hi yena!

 Tatana na manana va tirhe swin’we malembe yo tlula 35 va byela vanhu hi ntshembo lowu Bibele yi va nyikeke wona. Tatana u ve munhu la hisekaka naswona a khathala hi vanhu van’wana nakambe a a dume hi ku pfuna vanhu. Eka malembe wolawo hinkwawo ndzi dyondze ku n’wi rhandza ni ku n’wi xixima. A ndzi tibuma hikuva ndzi ri n’wana wakwe! Tatana u love hi 2016, kambe a ndzi n’wi rivali hikuva mina na yena hi cince vumunhu bya hina loko hi ri karhi hi tirhisa leswi hi swi dyondzeke eBibeleni. A ndza ha ri na rona rivengo nikatsongo. Nakambe ndza tsaka leswi ndzi tiveke Yehovha Xikwembu, Tata wa mina wa le tilweni, loyi a hi tshembisaka leswaku u ta herisa leswi vangaka maxangu emindyangwini hinkwayo.