Ndzi velekiwe eMontreal, ku nga doroba lerikulu exifundzheni xa Quebec etikweni ra Canada. Mina ni vana va ka hina vanharhu hi kurisiwe hi vatswari lava nga ni rirhandzu eRosemont. A hi tshama hi tsakile naswona a hi ri na ku rhula.

 Loko ndza ha ri ntsongo, a ndzi rhandza ku hlaya Bibele. Ndzi tsundzuka siku rin’wana loko ndzi ri ni malembe ya 12, ndzi tiphine swinene hi ku hlaya hi matimu ya Yesu eka Testamente Leyintshwa.

 Ndzi khumbiwe swinene hi rirhandzu ni ntwelavusiwana lowu Yesu a wu kombiseke van’wana kutani a ndzi lava ku fana na yena. Lexi twisaka ku vava, loko ndzi ya ndzi kula sweswo swi cincile hileswi a ndzi ri ni vanghana vo biha. Tata wa mina a ri muchayi wa poropita naswona a nga ndzi nyikanga xichayachayana xexo ntsena kambe ndzi tlhele ndzi tekelela rirhandzu leri a ri na rona hi vuyimbeleri. A ndzi byi tsakela swinene vuyimbeleri, sweswo swi endle leswaku ndzi hatla ndzi dyondza ku chaya katara. Hi ku famba ka nkarhi, ndzi sungule ntlawa wa vuyimbeleri bya rock ni vanghana van’wana va mina naswona hi chaye eka mitlangu yo hambanahambana. Khamphani yin’wana ya swa vuhumelerisi bya vuyimbeleri leyi dumeke swinene, yi lave ku ndzi pfuna ku yisa vuyimbeleri bya mina emahlweni. Ndzi sayine ntwanano ni khamphani yoleyo. Vuyimbeleri bya mina byi sungule ku tiveka swinene naswona a byi chayiwa swinene eka rhadiyo eQuebec.

 A swi tikomba onge ndza tiphina hi vutomi. A ndzi ri ntsongo ndzi tlhela ndzi duma swinene naswona a ndzi endla mali yo tala hi swilo leswi a ndzi swi rhandza. Ninhlikanhi, a ndzi endla vutiolori, ndzi endla mimbulavurisano, ndzi ya laha ku nga ni vanhu ndzi teka swifaniso na vona ndzi tlhela ndzi sayina swilo swa vona ni ku ya eka thelevhixini. Nimadyambu a ndzi chaya laha a ndzi rhambiwa kona ni ku ya etiphatini. Leswaku ndzi nga chavi vanhu loko ndzi chaya, ndzi sungule ku n’wa byala ndza ha ri ntsongo kutani endzhaku ndzi tirhisa swidzidzirisi. A ndzi nga chavi nchumu naswona a ndzi tikhome hi ndlela yo biha swinene.

 Van’wana a va navela ku fana na mina hikwalaho ka leswi a ndzi tikomba ndzi tsakile. Kambe embilwini a ndzi karhateka swinene, ngopfungopfu loko ndzi ri ndzexe. A ndzi vilela naswona a ndzi tshikilelekile. Mhaka leyi twisaka ku vava, loko ndzi ri karhi ndzi humelela vahumelerisi va vuyimbeleri bya mina vambirhi va file hikwalaho ka vuvabyi bya AIDS. A ndzi chuhile! Hambileswi a ndzi rhandza vuyimbeleri, mahanyelo ya kona a ma nga ndzi tsakisi.

 Hambileswi a ndzi humelerile, a ndzi swi xiya leswaku misava yi bihile swinene. A ndzi tivutisa leswaku ha yini ku nga ri na vululami laha misaveni? Nakambe a ndzi tivutisa leswaku hikwalaho ka yini Xikwembu xi nga teki goza. Mikarhi yo tala a ndzi khongela eka Xikwembu leswaku ndzi kuma tinhlamulo. Siku rin’wana hi nkarhi wo wisa endzhaku ko valanga ndzi hlaye Bibele. Hambileswi a ndzi nga swi twisisi hinkwaswo leswi a ndzi swi hlaya kambe ndzi gimete hi ku vula leswaku makumu ya le kusuhi.

 Loko ndzi ri karhi ndzi hlaya Bibele, ndzi kume leswaku Yesu u titsone swakudya ku ringana masiku ya 40. (Matewu 4:1, 2) Kutani ndzi tibyela leswaku loko ndzo endla leswi fanaka, Xikwembu a xi ta tikombisa eka mina, kutani ndzi veke siku. Loko ku sale mavhiki mambirhi leswaku ndzi sungula ku titsona swakudya, Timbhoni ta Yehovha timbirhi ti gongondze enyangweni kutani ndzi ti amukerile ndzi ti byela leswaku ti nghena onge hiloko ku ri khale ndzi ti rindzile. Ndzi langute Mbhoni yin’wana leyi vito ra yona a ku ri Jacques, squarely ematihlweni kutani ndzi yi vutisa ndzi ku: “Hi nga swi tivisa ku yini leswaku hi hanya emasikwini yo hetelela?” Loko a hlamula u pfule Bibele kutani a hlaya 2 Timotiya 3:1-5. Ndzi ye emahlweni ndzi va vutisa swivutiso swin’wana swo tala naswona ndzi tsakisiwe hi ndlela leyi tinhlamulo ta vona a ti ndzi enerisa ha yona ni leswi a ti huma eMatsalweni. Endzhaku ka loko va ndzi endzele ko hlayanyana ndzi swi xiyile leswaku a swa ha bohi ndzi titsona swakudya.

 Ndzi sungule ku hlaya Bibele ni Timbhoni ta Yehovha nkarhi na nkarhi. Hi ku famba ka nkarhi, ndzi tseme misisi ya mina yo leha kutani ndzi sungula ku va kona eka minhlangano ya Timbhoni ta Yehovha. Loko ndzi fika ndzi amukeriwe hi mandla mambirhi sweswo swi endle leswaku ndzi swi xiya leswaku ndzi kume ntiyiso.

 I ntiyiso, leswaku ku va ndzi tirhisa leswi ndzi swi dyondzeke eka dyondzo ya Bibele a ndzi fanele ndzi endla ku cinca lokukulu evuton’wini bya mina. A ndzi fanele ndzi tshika ku tirhisa swidzidziharisi hambi ku ri mahanyelo lama nga basangiki. Nakambe a ndzi fanele ndzi cinca vumunhu bya mina ndzi tlhela ndzi kombisa ku khathala hi vanhu van’wana. Tanihi mutswari la nga yexe a ndzi fanele ndzi endla leswaku vana va mina vambirhi va tsaka naswona va va ni vuxaka lebyinene na Yehovha. Kutani ndzi tshike ku yimbelela ndzi ya tirha efektri laha a ndzi hola mali yitsongo.

 Ku endla ku cinca koloko hinkwako a swi nga olovi. Loko ndzi ri karhi ndzi tikarhatela ku tshika swidzidziharisi a swi pfa swi tika lerova ndzi pfa ndzi tlhelela eka swona. (Varhoma 7:19, 21-24) A swi tika swinene ku tshika mahanyelo ya mina yo biha. Nakambe ntirho wa mina lowuntshwa a wu ndzi karharisa na muholo wa kona a wu nga nyawuli. Swi ndzi tekele tin’hweti tinharhu leswaku ndzi hola mali leyi a ndzi yi endla hi tiawara timbirhi loko ndza ha ri xiyimbeleri.

 Xikhongelo xi ndzi pfunile leswaku ndzi tiyisela eka ku tika loku a ndzi hlangana na kona. Ndzi tlhele ndzi xiya leswaku ku hlaya Bibele nkarhi na nkarhi i swa nkoka. Ku ni matsalwa man’wana ya le Bibeleni lama ndzi pfuneke swinene. Rin’wana ra wona i 2 Vakorinto 7:1 leri byelaka Vakreste leswaku va ti ‘tibasisa eka swilo hinkwaswo leswi nyamisaka nyama ni moya.’ Rin’wana leri nga ndzi pfuna ku vona leswaku swa koteka ku hlula mikhuva yo biha i tsalwa ra Vafilipiya 4:13 leri nge “eka swilo hinkwaswo ndzi ni ntamu hikwalaho ka loyi a ndzi nyikaka matimba.” Yehovha Xikwembu u hlamule swikhongelo swa mina a tlhela a ndzi pfuna leswaku ndzi twisisa ni ku tirhisa leswi Matsalwa ma swi vulaka. Leswi swi ndzi khutaze leswaku ndzi tinyiketela eka yena. (1 Petro 4:1, 2) Ndzi khuvuriwe ndzi va Mbhoni ya Yehovha hi 1997.

 Ndza swi vona leswaku loko a ndzi lo ya emahlweni na mahanyelo ya mina ya khale sweswi a ndzi ta va ndzi file. Sweswi ndzi tsakile! Nsati wa mina Elvie u ve nyiko leyikulu eka mina. Ha vumbirhi bya hina ha tiphina swinene hi ku dyondzisa Bibele nkarhi na nkarhi. Leswi swi endla ndzi tsaka ndzi tlhela ndzi eneriseka. Ndzi nkhensa Yehovha ku va a ndzi kokele eka yena.—Yohane 6:44.