1 Johani 2:1-29
2 Vana vanga, ndza mu tsalela a timhaka leti kasi mu nga wonhi. Kanilezvi loku a wokari a wonha, hi na ni muvhuni loyi a nga zvin’we na Papayi, ku nga Jesu Kristu, a munhu wo lulama.
2 Hi yena a nga muphahlo wu nyikelweko kasi hi tlhela hi zwanana na Nungungulu,* hambulezvo na ku nga hi hina basi kanilezvi ni tiko gontlhe.
3 Loku hi simama ku ingisa milayo yakwe hi komba lezvaku ha mu tiva.
4 Loyi a nge ngalo: “Ndza mu tiva”, kasi lezvo a nga ingisi milayo yakwe, o hemba niku a lisine a li kona kakwe.
5 Kanilezvi loyi a ingisako a mhaka yakwe, a lirandzo la Nungungulu li mbhelelisilwe kakwe. Hikwalaho, ha zvi tiva lezvaku hi zvin’we naye.
6 Loyi a nge ngalo i zvin’we naye, i fanele ku fambisa zvalezvi Jesu a nga fambisa zvona.
7 Varandzekako, a ndzi mu tsaleli a nayo wuswa, kanilezvi i nayo wa kale lowu mu wu zwileko kusukela kusanguleni. A nayo lowu wa kale i mhaka leyi mu nga yizwa.
8 Kanilezvi ndza tlhela ndzi mu tsalela a nayo wuswa, lowu wu nga lisine ka yena ni ka n’wina, hakuva a munyama wa hundza, ni kuwonekela ka lisine ka woninga.
9 Loyi a nge i lomu kuwonekeleni kanilezvi na a venga a makabye wakwe wa ha hi munyameni.
10 Loyi a randzako a makabye wakwe i tshama kuwonekeleni, niku a ku na ca ku mu wisa.
11 Kanilezvi loyi a vengako a makabye wakwe i lomu munyameni niku i famba munyameni; a nga ku tivi lomu a yako kona hakuva a munyama wu mu vhalile matihlo.
12 Vana vanga, ndza mu tsalela hakuva a zviwonho zva n’wina zvi tsetselelwe hi kota ya vito gakwe.
13 N’wina vapapayi, ndza mu tsalela hakuva ma mu tiva loyi a nga kona kusukela kusanguleni. N’wina majaha, ndza mu tsalela hakuva mu hlulile loyi wa kubiha. N’wina vanana, ndza mu tsalela hakuva ma mu tiva Papayi.
14 N’wina vapapayi, ndza mu tsalela hakuva ma mu tiva loyi a nga kona kusukela kusanguleni. N’wina majaha, ndza mu tsalela hakuva mu tiyile, a mhaka ya Nungungulu yi ka n’wina niku mu hlulile loyi wa kubiha.
15 Mu nga randzi a tiko ne hambu a zvilo zvi nga lomu tikweni. Loku munhu a randza tiko, a lirandzo la Papayi a li kona kakwe;
16 hakuva a zvilo zvontlhe zvi nga lomu tikweni — a kunavela ka nyama ni kunavela ka matihlo, ni ku gwira hi kota ya lezvi munhu a nga nazvo* — a zviti hi ka Papayi kanilezvi zvita hi lomu tikweni.
17 Ahandle ka lezvo, a tiko ga hundza ni kunavela ka gona, kanilezvi loyi a mahako a kurandza ka Nungungulu i ta tshama kala kupindzuka.
18 Vana vanga, leci cikhati ca kugumesa, niku kota lezvi mu zvi zwileko lezvaku wata a mukaneti wa Kristu, hambu zvezvi va kona a vakaneti vo tala va Kristu, hi kota ya lezvo ha zvi tiva lezvaku leci cikhati ca kugumesa.
19 Va humile hi kwalomu ka hina, kanilezvi va wa nga hi va hina, hakuva loku va wa hi va hina na va simamile na hina. Kanilezvi va humele kasi zvi woneka lezvaku a hi vontlhe va nga va hina.
20 N’wina mu totilwe hi loyi a Basileko, niku n’wentlheni ma tiva.
21 Ndza mu tsalela, na ku nga hi ku khwatsi mo kala mu nga li tivi a lisine, kanilezvi hi lezvi mu li tivako ni lezvi a mawunwa ma nga tiko hi ka lisine.
22 Himani a nga muhembi, loku ku nga hi loyi a alako lezvaku Jesu hi Kristu ke? A mukaneti wa Kristu, hi loyi a alako Papayi ni N’wana.
23 Ni wihi loyi a alako a N’wana, a nga tsakelwi hi Papayi. Kanilezvi loyi a vhumelako a N’wana wa tsakelwa hi Papayi kambe.
24 Makunu n’wina tshamani ni lezvi mu zvi zwileko kusukela kusanguleni. Loku mu tshama ni lezvi mu zvi zwileko kusukela kusanguleni, mu tava zvin’we ni N’wana mu tlhela muva zvin’we na Papayi.
25 Ahandle ka lezvo, yena wutsumbu i hi tsumbisile a wutomi ga pindzukelwa.
26 Ndzi mu tsalele timhaka leti hi kota ya lava va lavako ku mu hambukisa.
27 Kota lezvi a kutotiwa loku mu ku amukeleko hi ka yena ku tshamileko ka n’wina, a zva ha laveki lezvaku mu gondzisiwa hi munhu; kanilezvi kota lezvi a kutota kakwe ku mu gondzisako zvontlhe zvi nga lisine, na ku nga hi mawunwa, tshamani ka yena kota lezvi ku mu gondzisileko.
28 Hikwalaho, vana vanga, simamani zvin’we naye kasi laha a to wonekeliswa hi fela ku wulawula hi kutiya, hi nga hlehli hi tingana a cikhati leci a tova kona cikari ka hina.
29 Loku mu zvi tiva lezvaku i lulamile, ma zvi tiva kambe lezvaku ni wihi loyi a mahako zva kululama i pswalilwe hi yena.
Mitlhamuselo ya lahasi
^ Kutani: “muphahlo wa ku hi tlhatlhisa ka zviwonho zva hina”.
^ Kutani: “ni kutikulisa hi kota ya titshomba”.
