1 Johani 3:1-24
3 Hi nga wonani lezvi Papayi a nga hi randzisa zvona laha ka kuza a hi maha hi vitaniwa ku hi vana va Nungungulu! Hakunene hi vana vakwe. Hi zvalezvo zvi mahako a tiko gi nga hi tivi hakuva a gi mu tivi.
2 Varandzekako, hina hi vana va Nungungulu, kanilezvi a hi se zvi tiva lezvi hi to tshamisa zvona. Ha zvi tiva lezvaku a cikhati leci a to wonekeliswa, hi ta fana naye hakuva hi ta mu wonisa zvalezvi a nga tshamisa zvona.
3 Ni wihi loyi a nga ni kutsumba loku mahlweni kakwe i wa ti basise, kota lezvi yena a basileko.
4 Ni wihi loyi a tshamako hi ku wonha i tshama hi ku hambunyeta nayo, hakuva a ciwonho ku hambunyeta nayo.
5 Ma zvi tiva kambe lezvaku yena i wonekelisilwe kasi a susa zviwonho zva hina, ni lezvaku a ciwonho a ci kona kakwe.
6 Ni wihi loyi a simamako zvin’we naye a nga tshami hi ku wonha; ni wihi loyi a tshamako hi ku wonha a nga mu wonangi, ne a nga mu tivi.
7 Vana vanga, mu nga vhumeli ku hambukisiwa hi munhu; loyi a mahako zva kululama i lulamile, kota lezvi yena a lulamileko.
8 Loyi a tshamako hi ku wonha ita hi ka Sathani,* hakuva Sathani* muwonhi kusukela kusanguleni.* Hi kota ya lezvo, a N’wana wa Nungungulu i wonekelisilwe kasi ku ta fuvisa* a mitiro ya Sathani.*
9 Ni wihi loyi a pswalilweko hi Nungungulu a nga tshami hi ku wonha hakuva a mbewu* ya Nungungulu yi tshama ka munhu loye; a nga tshami hi kuwonha hakuva i pswalilwe hi Nungungulu.
10 Leci ci kombisako lava va nga vana va Nungungulu ni lava va nga vana va Sathani,* hi leci: Ni wihi loyi a nga mahiko zva kululama a ngati hi ka Nungungulu, ni loyi a nga randziko a makabye wakwe yenawu a ngati hi ka Nungungulu.
11 Hakuva lezvi mu zvi zwileko kusukela kusanguleni hi lezvaku hi fanele ku randzana,
12 hi nga fani na Kana, loyi a tileko hi ka loyi wa kubiha, a daya makabye wakwe. Kasi i wa mu dayela yini? Hi lezvi a mitiro yakwe yi nga bihile kuveni leyi ya makabye wakwe yi wa lulamile.
13 Vamakabye, mu nga hlamali hi lezvi a tiko gi mu vengako.
14 Ha zvi tiva lezvaku a kale hi wa ku khwatsi hi file kanilezvi makunu ha hanya, hakuva ha randza a vamakabye. Loyi a nga randziko i simama kufeni.
15 Ni wihi loyi a vengako a makabye wakwe mudayi,* niku ma zvi tiva lezvaku a ku na mudayi a nga ni wutomi ga pindzukelwa.
16 Hi kota ya lezvo ha li tiva lirandzo, hakuva yena i no nyikela a wutomi gakwe hi kota ya hina, hikwalaho hinawu hi fanele ku nyikela a wutomi ga hina hi kota ya vamakabye va hina.
17 Ni wihi loyi a nga ni zvilo zva tiko legi kanilezvi a wona a makabye wakwe na a lava ku vhuniwa, hambulezvo a ala ku mu kombisa tipswalo, a lirandzo la Nungungulu li nga tshamisa kuyini kakwe ke?
18 Vana vanga, hi nga randzi hi magezu ni lirimi basi, kanilezvi a hi randzeni hi mitiro ni lisine.
19 Loku hi maha lezvo, hi ta zvi tiva lezvaku hita hi lisineni, niku hi ta tiyisa timbilu ta hina mahlweni kakwe
20 ka lezvi a timbilu ta hina ti hi konako ka zvona, hakuva Nungungulu wa hombe a ku hundza timbilu ta hina niku i tiva zvilo zvontlhe.
21 Varandzekako, loku a timbilu ta hina ti nga hi koni, ha wulawula hi kutlhatlheka mahlweni ka Nungungulu;
22 ni cihi leci hi kombelako wa hi nyika, hakuva ha ingisa milayo yakwe niku ha maha lezvi zvi mu tsakisako.
23 Kunene, a nayo wakwe hi lowu: Hi fanele ku kholwa vitweni ga N’wana wakwe Jesu Kristu, hi randzana kota lezvi a hi layileko.
24 Ahandle ka lezvo, loyi a hlayisako milayo yakwe i simama zvin’we naye, yenawu i zvin’we ni munhu loye. Hina ha zvi tiva lezvaku hi zvin’we naye hi kota ya moya lowu a hi nyikileko.
Mitlhamuselo ya lahasi
^ Hi ciGreki: di·á·bo·los, zvi wulako ku “mulumbeti”.
^ Hi ciGreki: di·á·bo·los, zvi wulako ku “mulumbeti”.
^ Kutani: “kusukela loku a sangulile”.
^ Kutani: “hohlota”.
^ Hi ciGreki: di·á·bo·los, zvi wulako ku “mulumbeti”.
^ A mbewu leyi hi leyi yi zvi kotako ku pswala mihandzu.
^ Hi ciGreki: di·á·bo·los, zvi wulako ku “mulumbeti”.
^ Kutani: “cigevenga”.