1 Johani 4:1-21
4 Varandzekako, mu nga kholwi a timhaka tontlhe ti pimisilweko,* kanilezvi hlolani a timhaka ti pimisilweko* kasi ku wona lezvaku hakunene tita hi ka Nungungulu ke, hakuva lomu tikweni ku na ni vaphrofeti vo tala va mawunwa.
2 Mu ta ti polisa lezvi a timhaka ti pimisilweko hi Nungungulu: Tontlhe a timhaka ti pimisilweko ti vhumelako lezvaku Jesu Kristu i tile hi ka nyama, tita hi ka Nungungulu.
3 Kanilezvi a timhaka tontlhe ti nga mu vhumeliko Jesu, a titi hi ka Nungungulu. Ahandle ka lezvo, leto hi tona a timhaka ti pimisilweko hi mukaneti wa Kristu loyi mu ngazwa lezvaku wata; makunu i kona tikweni.
4 Vana vanga, n’wina muta hi ka Nungungulu niku mu hlulile a vaphrofeti va mawunwa hakuva loyi a nga zvin’we na n’wina wa hombe a ku hundza loyi a nga zvin’we ni tiko.
5 Vona vata hi laha tikweni; hikwalaho va wulawula zvilo zva laha tikweni, hi cigelo leco a tiko ga va ingisa.
6 Hina hita hi ka Nungungulu. Ni wihi loyi a tivako Nungungulu wa hi ingisa, kanilezvi loyi a nga tiko hi ka Nungungulu a nga hi ingisi. Hikwalaho ha zvi kota ku hambanisa a timhaka ta lisine ti pimisilweko ni timhaka ta mawunwa ti pimisilweko.
7 Varandzekako, a hi simameni ku randzana hakuva a lirandzo lita hi ka Nungungulu. Ni wihi loyi a randzako i pswalilwe hi Nungungulu niku wa mu tiva Nungungulu.
8 Loyi a nga randziko a nga mu tivi Nungungulu hakuva Nungungulu lirandzo.
9 Nungungulu i kombile ku wa hi randza hi ku rumela a N’wana wakwe a belekilweko yece ata tikweni kasi hi kuma wutomi hi kota ya yena.
10 A lirandzo hi leli: A hi lezvaku hi hina hi nga randza Nungungulu kanilezvi hi yena a nga hi randza, a rumela a N’wana wakwe kota muphahlo kasi hi tlhela hi zwanana na Nungungulu.*
11 Varandzekako, loku Nungungulu a hi randzisile lezvi, hinawu hi fanele ku randzana.
12 A ku na munhu a tshukileko a wona Nungungulu. Loku hi simama ku randzana, Nungungulu i tshama zvin’we na hina niku a lirandzo lakwe la mbheleliswa ka hina.
13 Hi kota ya lezvo ha zvi tiva lezvaku hi tshama zvin’we naye, yenawu i tshama zvin’we na hina hakuva i hi nyikile a moya wakwe.
14 Ahandle ka lezvo, hina wutsumbu hi zvi wonile niku ha kustumunya lezvaku Papayi i rumele a N’wana wakwe kota muhanyisi wa tiko.
15 Ni wihi loyi a vhumelako lezvaku Jesu i N’wana wa Nungungulu, Nungungulu i tshama zvin’we ni munhu loye, a munhu loye yenawu i tshama zvin’we na Nungungulu.
16 Hina ha zvi tiva niku ha kholwa lezvaku Nungungulu wa hi randza.
Nungungulu lirandzo, niku loyi a randzako i tshama zvin’we na Nungungulu; Nungungulu yenawu i tshama zvin’we naye.
17 Hikwalaho, a lirandzo li mbhelelisilwe ka hina kasi hi fela ku wulawula na hi tlhatlhekile* sikwini ga kulamula, hakuva lezvi yena a nga tshamisa zvona, hinawu hi tshamisile lezvo tikweni.
18 Loyi a randzako a nga chavi nchumu; kanilezvi a lirandzo li hlongola kuchava hakuva a kuchava ka hi tsandzekisa ku maha zvotala. Kunene loyi a chavako a nga mbhelelangi lirandzweni.
19 Hina ha randza hakuva hi yena a nga ranga a hi randza.
20 Loku munhu aku: “Ndza mu randza Nungungulu”, kasi lezvo wa venga a makabye wakwe, o hemba. Hakuva loyi a nga randziko a makabye wakwe loyi a mu wonako, a nga zvi koti ku randza Nungungulu loyi a nga mu woniko.
21 I hi nyikile a nayo lowu waku: Ni wihi loyi a randzako Nungungulu, i wa randze ni makabye wakwe kambe.
Mitlhamuselo ya lahasi
^ Hi kukongoma: “a mimoya yontlhe”.
^ Hi kukongoma: “a mimoya”.
^ Kutani: “muphahlo wa ku hi tlhatlhisa ka zviwonho zva hina”.
^ Kutani: “kasi hiva ni kutsumba”.
