1 Johani 5:1-21
5 Ni wihi loyi a kholwako lezvaku Jesu hi Kristu, a munhu loye i pswalilwe hi Nungungulu; ni loyi a randzako Papayi, wa randza ni vana vakwe.
2 Ha zvi tiva lezvaku hi randza vana va Nungungulu loku hi randza Nungungulu hi tlhela hi hlayisa milayo yakwe.
3 Hakuva a ku randza Nungungulu ku ingisa a milayo yakwe niku a milayo yakwe a yi karati.
4 Hakuva ni wihi loyi a* pswalilweko hi Nungungulu wa hlula tiko. A kukholwa ka hina ku hlulile tiko.
5 Himani wa ku a nga hlula tiko, loku ku nga hi yena loyi a kholwako lezvaku Jesu i N’wana wa Nungungulu ke?
6 Jesu Kristu hi yena loyi a tileko hi mati ni nkhata; a nga tangi hi mati basi, kanilezvi i tile hi mati ni nkhata. A moya wa kustumunya, hakuva a moya lisine.
7 Hakuva ku na ni vakustumunyu vanharu:
8 Ku nga moya, ni mati, ni nkhata; hi wunharu ga zvona zva zwanana.
9 Loku hi vhumela a wukustumunyu ga vanhu, a ha ha wuli hi wukustumunyu ga Nungungulu. Hakuva a wukustumunyu ga Nungungulu hi legi a gi nyikako xungetano hi N’wana wakwe.
10 Loyi a kholwako ka N’wana wa Nungungulu i na ni wukustumunyu ndzeni kakwe. Loyi a nga kholwiko ka Nungungulu i mu maha muhembi, hakuva a nga kholwi ka wukustumunyu legi Nungungulu a gi nyikileko xungetano hi N’wana wakwe.
11 A wukustumunyu ga kona hi legi ga ku Nungungulu i hi nyikile a wutomi ga pindzukelwa, niku a wutomi legi gi le ka N’wana wakwe.
12 Loyi a vhumelako a N’wana i na ni wutomi legi; loyi a nga vhumeliko a N’wana wa Nungungulu a nga nago a wutomi legi.
13 Ndzi mu tsalela a timhaka leti n’wina lava mu kholwako vitweni ga N’wana wa Nungungulu kasi mu fela ku zvi tiva lezvaku mu na ni wutomi ga pindzukelwa.
14 A kutsumba loku hi nga nako* mahlweni kakwe hi loku ka ku i ta hizwa loku hi kombela ni wihi nchumu wu yelanako ni kurandza kakwe.
15 Makunu loku hi zvi tiva lezvaku wa hizwa ni ka wihi nchumu hi kombelako, ha zvi tiva lezvaku hi ta zvi kuma lezvi hi kombelako, hakuva hi zvi kombela kakwe.
16 Loku a wokari a wona makabye wakwe na a maha ciwonho ci nga yisiko kufeni, i wa mu kombelele, Nungungulu i ta mu nyika wutomi. I ta maha lezvo loku a ciwonho ca kona ci nga yisi kufeni. Ku na ni ciwonho ci yisako kufeni. Xungetano hi ciwonho leco, a ndzi wuli lezvaku i wa mu kombelele.
17 A kungalulami kontlhe ciwonho, hambulezvo ku na ni ciwonho leci ci nga yisiko kufeni.
18 Ha zvi tiva lezvaku loyi a pswalilweko hi Nungungulu a nga tshami hi ku wonha kanilezvi a N’wana wa Nungungulu wa mu vhikela, hikwalaho loyi wa kubiha a nga mu mahi nchumu.*
19 Hina ha zvi tiva lezvaku hita hi ka Nungungulu, kanilezvi a tiko gontlhe gi le ntan’wini wa loyi wa kubiha.
20 Ha zvi tiva kambe lezvaku a N’wana wa Nungungulu i tile a ta hi nyika wutlhari kasi hi tiva loyi a nga wa lisine. Hi zvin’we ni loyi a nga wa lisine hi kota ya N’wana wakwe, Jesu Kristu. Loyi hi yena Nungungulu wa lisine ni wutomi ga pindzukelwa.
21 Vana vanga, chavani a zvifananiso.
Mitlhamuselo ya lahasi
^ Hi kukongoma: “ni cihi leci ci”.
^ Kutani: “A kutlhatlheka loku hi nga nako kuwulawuleni”.
^ Kutani: “mu khomi”.
