1 Pedro 1:1-25
1 Mina Pedro, ndzi nga mupostoli wa Jesu Kristu, ndza tsalela a vahlawulilweko, lava va nga vahlavha va hangalakileko le Pontu, ni le Galatiya, ni le Kapadhokiya, ni le Azia, ni le Bhituniya,
2 lava Nungungulu tlhelo Papayi a va hlawulileko hi ku tatisa kungo gakwe legi a nga sina a gi mahile, va basisilweko hi moya, kasi vava vo ingisa va tlhela va n’watsekelwa a nkhata wa Jesu Kristu, ndziku:
A tipswalo ni kurula a zvi andze cikari ka n’wina.
3 I wa dhumiswe Nungungulu tlhelo Papayi wa Hosi ya hina Jesu Kristu, hakuva hi kota ya wuxinji gakwe ga hombe i no maha lezvaku hi pswaliwa luswa kasi hiva ni kutsumba ko tiya hi kota ya lezvi Jesu Kristu a nga vhuxiwa hi ka vafileko,
4 hi fela ku kuma a tshomba leyi yi nga hiniko, yi nga hiko na noda, ni yi nga kurukiko. Yi vekelwe n’wina le tilweni,
5 n’wina lava mu hlayisiwako hi ntamu wa Nungungulu hi kota ya kukholwa kasi mu kuma a kuhanyiswa loku ku longileko ku wonekeliswa cikhatini co gumesa.
6 Hi kota ya lezvo, ma tsaka nguvhu, hambu lezvi zvi nga ha lavako ku hi cikhatana mu xanisiwa hi mindzhingo yo tsalangana,
7 kasi a kukholwa ka n’wina, loku ku nga ka lisima nguvhu a ku hundza a ouro leyi yi hinako hambu loku yi hlolilwe* hi ndzilo, kuva cigelo ca ku dzundziwa, ni ku khesiwa, ni ku dhumiswa cikhatini leci Jesu Kristu a to wonekeliswa.
8 Hambu lezvi mu kalako mu nga se mu wona, ma mu randza. Hambu lezvi mu kalako mu nga mu woni zvezvi, ma kholwa kakwe niku ma tsaka nguvhu hi kutsaka ka hombe loku ku nga tlhamuselekiko,
9 hakuva ma tiyiseka lezvaku a kukholwa ka n’wina ku ta mu hanyisa.
10 Xungetano hi kuhanyiswa loku, a vaphrofeti lava va phrofetileko hi tipswalo leti mu nyikilweko tona, va no wutisisa khwatsi ha kona, va ku hlolisisa khwatsi.
11 Va wa hlola na va lava ku tiva a cikhati kutani nguva leyi va nga kari va kombiwa xungetano hi Kristu hi moya lowu wu nga hi kabye, laha wu nga va kustumunyela na ka ha hi mahlweni hi zvixaniso lezvi Kristu a nga wa ta xaniseka hi zvona ni kungangamela loku ku nga wa ta landzela hi ndzhako.
12 Va no kombiwa lezvaku a va ti tireli, kanilezvi va tirela n’wina timhakeni leti mu hlawutelweko hi lava va nga mu byela a mahungu ya ma nene hi moya wo basa wu ngata hi le tilweni. A timhaka leti hi tona leti a tingilozi ti xuvako nguvhu ku ti tiva.
13 Hikwalaho, longiselani a kupima ka n’wina kasi mu tira; hlayisani kupima ka n’wina kontlhe, mu veka a kutsumba ka n’wina ka tipswalo leti mu to nyikiwa cikhatini leci Jesu Kristu a to wonekeliswa.
14 Kota vana va ingisako, tsikani ku landzela a kunavela ka n’wina ka kale loku mu nga hi nako na mu nga se tiva nchumu hi Nungungulu,
15 kanilezvi khwatsi hi a Basileko loyi a mu vitanileko, n’winawu basani mahanyeleni ya n’wina wontlhe,
16 hakuva ku tsalilwe ku ngalo: “Basani, hakuva mina ndzi basile.”
17 Loku mu kombela ka Papayi loyi a lamulako hi kuya hi mitiro ya mun’we ni mun’wani na a ngayi hi nghohe ya munhu, hanyani hi ku chava cikhatini leci ma ha hiko vahlavha tikweni.
18 Hakuva ma zvi tiva lezvaku a mu tlhatlhisiwangi hi zvilo zvi hinako, hi prata kutani ouro, mahanyeleni ya n’wina yo biha lawa mu gondzisilweko hi vakokwani va n’wina.*
19 Kanilezvi mu tlhatlhisilwe hi nkhata wa lisima wa Kristu, lowu wu fanako ni nkhata wa yivhana yi nga hiko na cisolo ne cibawa.
20 Kunene, i wa sina a tiviwa na tiko gi nga seva kona kanilezvi i wonekelisilwe zvikhatini zva kugumesa hi kota ya n’wina.
21 Ma kholwa ka Nungungulu hi kota ya Jesu loyi Nungungulu a mu vhuxileko hi ka vafileko, a mu nyika a kungangamela, kasi mu veka a kukholwa ka n’wina ni kutsumba ka n’wina ka Nungungulu.
22 Makunu, kota lezvi mu ti basisileko hi ku ingisa lisine, muza mu zvi kota ku randza vamakabye hi lirandzo li nga hiko lo fayelisela, randzanani hi mbilu yontlhe.
23 Hakuva a mu pswaliwangi luswa hi mbewu* yi hinako, kanilezvi hi mbewu yi nga hiniko; mu pswalilwe hi mhaka ya Nungungulu a hanyako ni wa kutimisela.
24 Hakuva “a nyama yontlhe yi* fana ni byanyi, ni kusaseka kontlhe ka yona ku fana ni zvitsangi zva byanyi; a byanyi ga wuna a zvitsangi zviwa,
25 kanilezvi a mhaka ya Jehovha yi simama kala kupindzuka”. A “mhaka” ya kona mahungu ya ma nene lawa ma kanelweko ka n’wina.
Mitlhamuselo ya lahasi
^ Kutani: “basisilwe; hlutilwe”.
^ Kutani: “hi mikhuwo”.
^ A mbewu leyi hi leyi yi zvi kotako ku pswala mihandzu.
^ Kutani: “a vanhu vontlhe va”.
