1 Pedro 4:1-19
4 Kota lezvi Kristu a nga xaniseka nyameni, n’winawu ti karateleni kuva ni kupima ko fana ni loko; hakuva loyi a xanisekako nyameni i tsikile zviwonho,
2 lezvaku a cikhati leci ci mu saleleko ca ku hanya nyameni, a nga hanyeli a kunavela ka vanhu kanilezvi a hanyela a kurandza ka Nungungulu.
3 Hakuva ci enele a cikhati leci mu nga maha a kurandza ka vamatiko, laha mu nga kari mu famba mahanyeleni ya tingana,* ni kunaveleni ko biha, ni wudhakweni, ni ka tifesta ta vhilinganya, ni mabyaleni, ni manyaleni ya ku khozela a zvifananiso.
4 Makunu va hlamala hi lezvi mu nga ha fambiko navo mahanyeleni lawo yo nyenyeza, hikwalaho va wulawula kubiha hi n’wina.
5 Kanilezvi a vanhu lava va ta ti hlamulela mahlweni ka loyi a longileko ku lamula a vahanyako ni vafileko.
6 Kunene, hi zvalezvo zvi mahako lezvaku a mahungu ya ma nene ma kanelwa ni ka vafileko, kasi hambu lezvi va lamuliwako nyameni hi kuya hi mawonela ya vanhu, va fela ku hanya hi ka moya hi kuya hi mawonela ya Nungungulu.
7 A kugumesa ka zvilo zvontlhe ku tshinele. Hikwalaho, ku laveka lezvaku muva ni kupima ku nene, mu tlharihela ku khongela.
8 Ahandle ka zvontlhe lezvo, randzanani nguvhu hakuva a lirandzo li khubhunyeta a zviwonho zvo tala.
9 Amukelanani na mu nga nguranguri.
10 Hi kuya hi lipimo la cinyikiwo leci a mun’we ni mun’wani a nyikilweko, i wa ci tirise kasi ku tirela van’wani kota nandza ga gi nene ga tipswalo ta Nungungulu leti ti kombisiwako hi tindlela to tsalangana.
11 Loku munhu a wulawula, i wa mahise ku khwatsi hi loyi a wulawulako timhaka ta Nungungulu. Loku munhu a tirela van’wani, i wa tsumbe a ntamu lowu wu tako hi ka Nungungulu; kasi zvilweni zvontlhe ku dhumisiwa Nungungulu ha Jesu Kristu. A kungangamela ni ntamu zva yena kala kupindzuka ni kupindzuka. Amen.
12 Varandzekako, mu nga hlamali hi tixanisa ta hombe leti mu kumanako nato a ku khwatsi zvova zvilo zvo kala mu nga zvi tivi.
13 Kanilezvi tsakani loku mu hlengela kuxanisekeni ka Kristu kasi cikhatini ca kuwonekeliswa ka kungangamela kakwe mu fela ku tsaka mu tlhela mu nengela.
14 Mu katekile loku mu rukiwa hi kota ya vito ga Kristu, hakuva a moya wa kungangamela, wu nga moya wa Nungungulu, wu hehla ka n’wina.
15 Hambulezvo ku ngavi na munhu cikari ka n’wina a xanisekako hi kuva mudayi, kutani khamba, kutani hi ku maha zvakubiha kutani hi ku nghenela zvilo zva vambe.
16 Kanilezvi, loku a munhu a xaniseka hi kota ya kuva muKristu, a ngawi tingana, kanilezvi i wa simame ku dhumisa Nungungulu hi ku hanya hi vito legi.
17 Hakuva ci chikele cikhati ca lezvaku a kulamula ku sangula hi lomu ndlwini ya Nungungulu. Makunu loku a kulamula ku sangula hi hina, zvi ta kuyini ka lava va nga ingisiko mahungu ya ma nene ya Nungungulu ke?
18 “Loku ku hi lezvaku a munhu wa kululama i fanele ku ti karata kasi a ponisiwa, zvi ta kuyini ka lava va nga chaviko Nungungulu, ni ka vawonhi ke?”
19 Hikwalaho, lava va xanisekako hi kota ya kurandza ka Nungungulu, va wa simame ku maha zva zvi nene, va tsumba a Muvangi loyi a tsumbekileko.
Mitlhamuselo ya lahasi
^ Hi ciGreki: asélgeia. Wona Tlhamuselo wa magezu ya Bhibhiliya.
