1 Pedro 5:1-14
5 Hikwalaho, kota dhota-kulobye, ni kustumunyu wa kuxaniseka ka Kristu tlhelo muhlengeli wa kungangamela loku ku to wonekeliswa, ndza khongotela a madhota ma tirako cikari ka n’wina ndziku:
2 Risani a ntlhambi wa Nungungulu lowu wu nga mandleni ya n’wina, mu wu hlayisa khwatsi.* Mu nga wu hlayisi hi ku kurumetwa kanilezvi hi kutsaka mahlweni ka Nungungulu; na ku nga hi ku khwatsi mu tirela bhindzu, kanilezvi tirani hi kuzvirandza.
3 Mu nga ti mahi tihosi hehla ka lava va nga tshomba ya Nungungulu, kanilezvi mahani cikombiso ka ntlhambi,
4 kasi a cikhati leci a murisi wa hombe a to wonekeliswa, mu fela ku nyikiwa a cidlodlo* ca kungangamela, leci ci nga gugiko.
5 Hikwalaho, n’winawu majaha ti koramiseni ka vavanuna va kulileko.* Kanilezvi n’wentlheni ambalani kutikoramisa mun’we ka mun’wani, hakuva Nungungulu wa venga a vamatshandza kanilezvi wa va nyika tipswalo lava va ti koramisako.
6 Hikwalaho, ti koramiseni hasi ka canja ga ntamu ga Nungungulu kasi a fela ku mu tlakusa hi cikhati ci faneleko.
7 Vekani a kukarateka ka n’wina kontlhe hehla kakwe hakuva wa mu khatalela.
8 Hlayisani a kupima ka n’wina, mu ti wonela, hakuva a nala wa n’wina Sathani,* wa fambafamba a ku khwatsi i nghala yi bhongako, na a lava wa ku mu khadamula.*
9 Kanilezvi, mu kaneteni, mu tiya kukholweni, na mu tiva lezvaku a kuxaniseka ko fana ni loko ka humelela a vamakabye va n’wina misaveni yontlhe.
10 Hambulezvo, loku mu xanisekile kutsongwani, a Nungungulu wa tipswalo tontlhe, loyi a mu vitaneleko kungangameleni ka pindzukelwa zvin’we na Kristu, i ta mu gondzisa kala mu buvha, a mu tiyisa, a mu nyika ntamu, ni ku mu veka ciseketelweni co tiya.
11 A ntamu a wuve ka yena kala kupindzuka. Amen.
12 Hi canja ga Silvhanusi,* loyi a nga makabye a tsumbekileko, ndzi mu tsalele magezu lawa ya ma tsongwani kasi ku mu kuca ni ku mu nyika wukustumunyu ga lezvaku leti hakunene hi tona a tipswalo ta Nungungulu. Tiyani ka tona mu ku nde.
13 A wasati* loyi a nga le Bhabhuloni, a hlawulilweko ku fana na n’wina, wa mu rungula, a n’wana wa mina Marku yenawu wa mu rungula.
14 Losanani hi kupswopswana ka lirandzo.
A kurula a kuve na n’wina n’wentlhe mu nga ka Kristu.
Mitlhamuselo ya lahasi
^ Kutani: “kota vawoneleli va wona”.
^ Kutani: “korowa”.
^ Kutani: “ka madhota”.
^ Hi ciGreki: di·á·bo·los, zvi wulako ku “mulumbeti”.
^ Hi kukongoma: “mita”.
^ Loyi a gin’wani vito a nga Silasi.
^ A “wasati” laha ka vhesi legi, ku nga ha wuliwa a bandla.