1 Timote 1:1-20
1 Mina Pawule, ndzi nga mupostoli wa Kristu Jesu hi kulaya ka Nungungulu a Muhanyisi wa hina, na Kristu Jesu, loyi a nga kutsumba ka hina,
2 ndza tsalela Timote,* a n’wana wa mina wa lisine kukholweni, ndziku:
A tipswalo, ni wuxinji, ni kurula, zvi tako hi ka Nungungulu a Papayi, ni ka Kristu Jesu, a Hosi ya hina, a zvive na wena.
3 A ku fana ni lezvi ndzi nga ku kombelile lezvaku u tshama le Efesusi a cikhati leci ndzi nga lava kuya Makedhoniya, ndza ku kombela kambe lezvaku u simama laho kasi u kawuka vokari lezvaku va nga gondzisi a gondzo yin’wani,
4 ni lezvaku va nga ingiseli tikaringani ni ku landzelela a matimu ya tixaka ta vakokwani. A zvilo lezvo a zvi vhuni nchumu, zvo vhuxa kukanetisana basi, a zvi vhuvhumisi zvilo zva Nungungulu lezvi zvi akako kukholwa.
5 A kungo ga cileletelo* leci hi lezvaku hi randzana hi mbilu yi basileko, ni livhalo li basileko, ni kukholwa ku nga hiko ko fayelisela.
6 A van’wani va hambukile ka zvilo lezvi, va landzela a timhaka ti nga vhuniko nchumu.
7 Va lava ku gondzisa a nayo, kuveni hambu vona venyi a va zvi zwisisi lezvi va wulako ne lezvi va ti tsitsiritelako ku zvi gondzisa.
8 Kunene ha zvi tiva lezvaku a Nayo wu nene loku wu tirisiwa khwatsi,*
9 niku a nayo a wu mahelwi a vanhu vo lulama, kanilezvi wu mahelwa zvitlula-milayo, ni lava va nga ingisiko, ni lava va nga chaviko Nungungulu, ni vawonhi, ni lava va nga tsumbekiko, ni lava va nga cheliko kota hi zvilo zvo basa, ni lava va dayako vapapayi vabye ni vamamani vabye ni van’wani vanhu,
10 ni zvibhayi,* ni vavanuna lava va etlelako ni van’wani vavanuna,* ni vayivi va vanhu, ni vahembi, ni lava va hlambanyako mawunwa, ni lava va mahako zvontlhe lezvi zvi lwako ni gondzo ya yi nene.
11 A gondzo leyi yi seketelwa ka mahungu ya ma nene yo ngangamela ya Nungungulu wo tsaka, lawa Nungungulu a ndzi nyikileko ku ma kanela.
12 Ndza mu bonga Kristu Jesu a Hosi ya hina, loyi a nga ndzi nyika ntamu, hakuva i wonile lezvaku ndzi tsumbekile, a se ndzi nyika ntiro
13 hambu lezvi a kale ndzi nga hi murukateli, ni muxanisi, na ndzi nga hi na cichavo hi munhu. I no ndzi mahela wuxinji, hakuva ndzi wa zvi maha hi kungativi ni kungakholwi.
14 Kanilezvi, a Hosi ya hina yi no ndzi kombisa tipswalo ta hombe nguvhu ni kukholwa zvin’we ni lirandzo leli li nga ka Kristu Jesu.
15 A mhaka leyi lisine niku a yi kanetiwi, yaku: Kristu Jesu i tile laha misaveni kasi ku ta hanyisa vawonhi. Niku a muwonhi wa hombe ku hundza vontlhe hi ye mina.
16 Kanilezvi, hambu lezvi ndzi nga hi muwonhi wa hombe ku hundza vontlhe, ndzi no mahelwa wuxinji, kasi Kristu Jesu a fela ku kombisa lihlazva-mbilu lakwe lontlhe ni lezvaku a ndzi maha cikombiso ka vontlhe lava va to kholwa kakwe kasi va kuma wutomi ga pindzukelwa.
17 Makunu ka Hosi ya pindzukelwa, leyi yi nga fiko, yi nga wonekiko, ku nga yena yece a nga Nungungulu, a give kona wudzundzo, ni wudhumo, kala kupindzuka ni kupindzuka. Amen.
18 Ndza ku nyika a cileletelo* leci, n’wananga Timote, leci ci zwananako ni zviphrofeto lezvi zvi phrofetilweko xungetano hi wena, kasi u simama kulwa a yimpi ya yi nene,
19 na u khomile zvi tiya kukholweni ni ka livhalo li nene, ku nga lezvi a vokari va zvi tsikileko, va gumesa va lahlekelwa hi kukholwa kabye a ku fana ni citimela* ci bombomeleko matini.
20 A vokari va vona hi Himenewusi na Alexandro lava ndzi nga va nyikela ka Sathani kasi va gondzisiwa a ku nga rukateli.
Mitlhamuselo ya lahasi
^ A vito legi gi wula ku: “Loyi a dzundzako Nungungulu”.
^ Kutani: “nayo”.
^ Hi kukongoma: “hi ku faneleko”.
^ Wona laha ka ku: “Wubhayi” ka Tlhamuselo wa magezu ya Bhibhiliya.
^ Kutani: “vavanuna lava va hlengelako masango ni van’wani vavanuna”.
^ Kutani: “nayo”.
^ Kutani: “navhiyo; paketi”.
