1 Timote 2:1-15
2 A co sangula, ndza mu khongotela lezvaku mu maha a mikombelo ni mikhongelo ya ku khongotela ni ku bonga, mu mahela vanhu va tixaka tontlhe,
2 ni tihosi ni vafumeli vontlhe, kasi hi hanya wutomi go rula ni go tshamiseka na hi kari hi tirela Nungungulu hi kumbhelela ni kupima kontlhe.
3 Lezvi zvi nene niku zva amukeleka mahlweni ka Nungungulu, a Muhanyisi wa hina,
4 loyi a randzako lezvaku a vanhu va tixaka tontlhe va ponisiwa, va li tiva khwatsi a lisine.
5 Hakuva kova ni Nungungulu mun’we, ni mutlhanganyisi mun’we cikari ka Nungungulu ni vanhu, ku nga Kristu Jesu,
6 loyi a ti nyikeleko kota hakhelo ya kutlhatlhisa yi enelako vanhu vontlhe.* A vanhu va ta kustumunya hi mhaka leyi hi cikhati ca kona.
7 Ndzi yimisilwe a kuva muchumayeli ni mupostoli hi kota ya wukustumunyu legi — ndzi wula lisine, a ndzi hembi — ni kuva mugondzisi wa vamatiko, ndzi va gondzisa a kukholwa ni lisine.
8 Makunu ndzi xuva lezvaku ku hi vavanuna va khongelako matshan’wini wontlhe, va tlakusa mandla yo tsumbeka, na va nga hi na zanga ne kukanetisana.
9 A vavasati vonawu va fanele ku boha tinguwo ta cichavo, va ti sasekisa va nga hundzeleti na va hi ni kupima ku nene. A kutisasekisa kabye ku ngavi ka malukela ya misisi, ne ku ngavi ka tiouro kutani maperola* ne hambu ka tinguwo to dhura nguvhu,
10 kanilezvi va wa ti sasekise hi ndlela yi faneleko a vavasati lava va chavako Nungungulu, ku nga lezvaku va ti sasekisa hi mitiro ya yi nene.
11 A wasati i wa gondze na a miyele* hi kutikoramisa kontlhe.
12 A ndzi vhumeli lezvaku a wasati a gondzisa kutani ku fumela wanuna, kanilezvi i wa miyele.*
13 Hakuva Adhamu hi yena a nga ranga ku vangiwa, ku gamela Evha.
14 Ahandle ka lezvo, a hi Adhamu a nga kalavelwa, kanilezvi a wasati hi yena a nga kalavelwa a hambunyeta nayo.
15 Hambulezvo, a wasati i ta hanyiswa hi ku pswala vana loku a simama kukholweni, ni lirandzweni, ni kubaseni, na a hi ni kupima kunene.
Mitlhamuselo ya lahasi
^ Kutani: “vanhu va tixaka tontlhe”.
^ Kutani: “mufazi”.
^ Kutani: “na a rulile”.
^ Kutani: “i wa rule”.
