1 Timote 3:1-16
3 Yi tsumbekile a mhaka leyi yaku: Loku a wanuna a ti karatela kuva dhota,* i navela ntiro wa wu nene.
2 A dhota* gi fanele ku nga soleki, gi hi nuna wa sati mun’we, gi tiva ku ti khoma ka zvontlhe gi mahako, giva ni kupima ku nene, gi maha zvilo hi nayo, gi randza ku amukela vapfhumba, na gi zvi tiva ku gondzisa,
3 na gi nga hi cidhakwa, na gi nga hi munhu wa tiholova,* kanilezvi gi hi gi nene,* gi nga hi munhu wa maguwa, na gi nga hi murandzi wa mali.
4 I fanele kuva loyi a rangelako khwatsi a ngango wakwe, a hi ni vana va ingisako hi cichavo contlhe.
5 (Hakuva loku a munhu a nga zvi tivi ku rangela a ngango wakwe, i ta gi hlayisisa kuyini a bandla ga Nungungulu ke?)
6 A ngavi munhu a ha sangulako ku kholwa, hakuva a nga tshuka a ti kukumukisa hi matshandza, a kuma tsayiselelo wo fana ni lowu wa Sathani.*
7 Ahandle ka lezvo, i fanele kuva ni nduma ya yi nene ka va lehandle kasi a nga koneki a wela ntlhan’wini wa Sathani.*
8 A malandza yo vhunetela wonawu ma fanele kuva vanhu vo dzundzeka, va nga hiko na tirimi timbiri,* va nga nwiko nguvhu byala,* na va nga naveli bhindzu go biha,
9 va khomileko zvi tiya ka cihundla co basa ca kukholwa na va hi ni livhalo li basileko.
10 A ku sangula va fanele ku hloliwa kasi ku wona lezvaku va ringanelwa ke. Andzhako ka lezvo, va wa tire kota malandza loku va nga soleki.
11 A vavasati vonawu va fanele kuva vanhu vo dzundzeka, va nga hi na mahlevo, va tiva ku ti khoma ka zvontlhe va mahako, va tsumbeka zvilweni zvontlhe.
12 A nandza go vhunetela a give nuna wa sati mun’we, gi rangela khwatsi a vana va gona ni ngango wa gona.
13 Hakuva a vavanuna lava va mahako khwatsi mitiro yabye va ti lavela wudzundzo gi nene, ni ku wulawula hi kutlhatlheka ka hombe xungetano hi kukholwa loku ku nga ka Kristu Jesu.
14 Hambu lezvi ndzi xuvako ku ku endzela zvezvi, ndzi ranga ndzi ku tsalela a timhaka leti,
15 kasi loku ndzi tshuka ndzi hlwela kuta, u tiva lezvi u faneleko ku hanyisa zvona ngangweni wa Nungungulu, ku nga bandla ga Nungungulu a hanyako, legi gi nga ziki* ni ciseketelo ca lisine.
16 Kunene, ca hombe a cihundla co basa ca ku kholwa ka Nungungulu, leci caku: ‘I kombisilwe hi ka nyama, a wuliwa wo lulama moyeni, a woneka ka tingilozi, ku kanelwa hi yena cikari ka vamatiko, a tiko gi kholwa kakwe, a amukelwa le tilweni hi kungangamela.’
Mitlhamuselo ya lahasi
^ Kutani: “muwoneleli”.
^ Kutani: “muwoneleli”.
^ Kutani: “ligwaya”.
^ Kutani: “gi nga womeleliko ka mawonela ya gona”.
^ Hi ciGreki: di·á·bo·los, zvi wulako ku “mulumbeti”.
^ Hi ciGreki: di·á·bo·los, zvi wulako ku “mulumbeti”.
^ Kutani: “va nga kanganyisiko kuwulawuleni kabye”.
^ Hi kukongoma: “vhinyo”.
^ Kutani: “mhandze; sika”.
