1 Timote 4:1-16
4 Kanilezvi a moya wa Nungungulu wu wula zviku dlunya lezvaku zvikhatini zva ha tako, a vokari va ta hambuka kukholweni, va ingisela a magezu ma hambukisako* yo khwatsi mata hi ka Nungungulu, ni tigondzo ta madhimoni,
2 hi kota ya kukanganyisa ka vanhu va wulawulako mawunwa, lava a tivhalo tabye ti tlanyeleko a ku khwatsi ti no hisiwa hi simbi yo hisa.
3 Va betela kuchadha, va tlhela va laya vanhu lezvaku va ngagi a zvakuga lezvi Nungungulu a zvi vangileko kasi zvi giwa ni ku bongiwa hi lava va kholwako ni lava va li tivako khwatsi a lisine.
4 Hakuva zvontlhe lezvi Nungungulu a zvi vangileko zvi nene. Ci hava ci faneleko ku nyenyiwa loku ci amukelwa hi kubonga,
5 hakuva ci basisiwa hi mhaka ya Nungungulu ni mukhongelo.
6 Loku u va nyika zvileletelo lezvi a vamakabye, u tava nandza ga gi nene ga Kristu Jesu, legi gi wundlilweko hi timhaka ta kukholwa ni gondzo ya yi nene leyi u yi landzelako hi kutsumbeka.
7 Kanilezvi u nga ingiseli a tikaringani ni mitsheketo ya mawunwa yi hlawutelwako hi vavasati vo kumba. Ti karate* nguvhu kasi u zvi kota a ku hanya hi kukholwa.
8 Hakuva a ku ti toloveta mihlakano ya ku tiyisa miri* zva vhuna kutsongwani, kanilezvi a ku hanya hi kukholwa zva vhuna zvilweni zvontlhe, hakuva ku na ni citsumbiso ca wutomi ka cikhati leci ni cikhatini ci tako.
9 A mhaka leyo lisine niku a yi kanetiwi.
10 Hi kota ya lezvo, hi tira hi kutikarata ni kutitsitsirita hakuva hi tsumba Nungungulu a hanyako, loyi a nga Muhanyisi wa vanhu va tixaka tontlhe, nguvhunguvhu lava vo tsumbeka.
11 Simama ku va nyika a zvileletelo lezvi ni ku va gondzisa.
12 U nga tsiki munhu a ku kanyisa hi lezvi u nga jaha.* Kanilezvi maha cikombiso ka lava vo tsumbeka hi kuwulawula ka wena, ni mahanyela, ni lirandzo, ni kukholwa, ni kuhlazveka.*
13 Simama ku ti tsitsirita u gondzela van’wani, u va nyika wusungukati,* ni ku va gondzisa, kala ndzita.
14 U nga hlakani hi cinyikiwo leci u nyikilweko hi kuphrofeta a cikhati leci a hubye ya madhota yi nga ku tlhateka mandla.
15 Chela kota hi* zvilo lezvi, u ti tsitsirita ka zvona, kasi a kukula* ka wena hi ka moya ku woniwa khwatsi hi vanhu vontlhe.
16 Ti wonele wutsumbu ga wena, ni kugondziseni ka wena. Timisela ka zvona, hakuva loku u maha lezvo u ta ti ponisa wena u tlhela u ponisa ni lava va ku zwako.
Mitlhamuselo ya lahasi
^ Hi kukongoma: “a mimoya yi hambukisako”.
^ Hi kukongoma: “Ti tolovete”.
^ Kutani: “Hakuva a ku maha ma exercício”.
^ Kutani: “muswa; n’wanana”.
^ Kutani: “kubasa”.
^ Kutani: “u va tiyisa”.
^ Kutani: “Alakanyela”.
^ Kutani: “kubuvha”.
