1 Timote 5:1-25
5 U nga bhongeli munhu wa hombe. Kanilezvi mu khongotele kota papayi, a majaha kota vamakabye* va wena,
2 a vavasati va hombe u va khongotela kota vamamani va wena, ni vanhanyana kota vamakabye* va wena, hi cichavo contlhe.*
3 Dzundza vavasati vo felwa hi vanuna lava hakunene va nga hava wa ku va hlayisa.
4 Kanilezvi loku ku hi ni wasati wo felwa hi nuna, a nga ni vana kutani vazukulu, va wa range va gondza a ku hanya hi kukholwa mingangweni yabye, va tlhelisa kubonga* ka vapswali ni ka vakokwani vabye, hakuva lezvo zva amukeleka ka Nungungulu.
5 A wasati wo felwa hi nuna, a seleko wusiwaneni, loyi hakunene a nga hava wa ku mu hlayisa, i tsumba Nungungulu niku i simama ku khongela ni ku khongotela wusiku ni mumu.
6 Kanilezvi loyi a hanyelako ku tsakisa a kunavela kakwe* i sina a file hambu lezvi a hanyako.
7 Hikwalaho, simama ku va nyika zvileletelo* lezvi kasi va nga soleki.
8 Phela loyi a nga hlayisiko a maxaka yakwe, nguvhunguvhu a va ngango wakwe, i kanetile kukholwa niku i bihile ku hundza loyi a nga kholwiko.
9 A wasati wo felwa hi nuna i ta tsaliwa bhukwini ga lava vo felwa hi vanuna ntsena loku a hi ni 60 wa malembe ni ku hundza, lezvo na a vile sati wa nuna mun’we,
10 na a hi ni nduma ya ku maha mitiro ya yi nene, na a wundlile khwatsi a vana vakwe, ni loku ku hi lezvaku i wa randza ku amukela vapfhumba, a hlambisile mikondzo ya vobasa, a vhunile lava va xanisekako, ni loku a ti tsitsiritile mitirweni yontlhe yo saseka.
11 Kanilezvi a vavasati vo felwa hi vanuna lava va ha hiko vanhanyana u nga va tsali bhukwini, hakuva a cikhati leci a ku navela masango ku va colopetelako ntirweni wa Kristu, va lava ku chadha.
12 Hi ku maha lezvo, va ti vitanela a kulamulwa hakuva va tsikile a kukholwa kabye ko sangula.*
13 Va tlhela va ti maha malolo, va rerela hi muti ni muti;* a va ti mahi malolo basi kanilezvi va tlhela va gondza dekele, va nghenela zva vambe, va wulawula hi zvilo va nga faneliko ku wulawula hi zvona.
14 Hikwalaho, ndzi xuva lezvaku a vavasati vo felwa hi vanuna lava va ha hiko vanhanyana va chadha, va pswala vana, va hlayisa mimiti yabye, kasi va nga mu nyiki cikhati a nala ca ku hi rukatela.
15 Kunene, a vokari va sina va hambukile va landzela Sathani.
16 Loku ku hi ni wasati a nga mukholwa na a hi ni maxaka ma felweko hi vanuna, i wa ma hlayise kasi a bandla gi nga bindziwi. A bandla gi ta hlayisa a vavasati vo felwa hi vanuna lava hakunene va nga hava wa ku va hlayisa.
17 A madhota lawa ma rangelako khwatsi ma fanele ku dzundziwa nguvhu, nguvhunguvhu lawa ma ti tsitsiritako kuwulawuleni ni kugondziseni.
18 Hakuva a Mitsalo yi ngalo: “U nga bohi nomu wa homu a cikhati leci yi hulako timbewu”, yi tlhela yiku: “A mutiri i fanelwe hi hakhelo yakwe.”
19 U nga vhumeli a mhaka yo kecara munhu wa hombe* loku yi nga hi na vakustumunyu vambiri kutani vanharu.
20 Lava va hanyako ciwonhweni va kawuke kuwoneni ka vontlhe, kasi zviva citlharihiso ka lava van’wani.*
21 Ndza ku laya mahlweni ka Nungungulu ni ka Kristu Jesu zvin’we ni ka tingilozi ti hlawulilweko, ndziku: Landzela zvileletelo lezvi na u nga soli nchumu ne kuva ni cihlawulela.
22 U nga tshuki u tsutsumela ku tlhateka mandla ya wena ka munhu;* ne u nga hlengeli ka zviwonho zva van’wani; simama kuva ni mahanyela yo hlazveka.
23 U nga hanwi mati woce, kanilezvi nwana ni vhinyo yi tsongwani hi kota ya lomu ndzeni ka wena, ni lezvi u talako ku babya-babya.
24 A zviwonho zva vokari zvi tekela ku woneka kubaseni, zvi va yisa kulamulweni, kanilezvi a zva van’wani zvi woneka hi ndzhako ka cikhati.
25 Hizvalezvo kambe ni mitiro ya yi nene, ya woneka kubaseni, kanilezvi hambu loku yi nga tekeli ku woneka, yi nga ta fihlala kala kupindzuka.
Mitlhamuselo ya lahasi
^ Kutani: “tinhondzo ni tindzisana”.
^ Kutani: “tinhondzo ni tindzisana”.
^ Kutani: “u nga va xwangi”.
^ Kutani: “mulere”.
^ Zvi nga ha wula ku: “ku ti tsakisa hi masango”.
^ Kutani: “milayo”.
^ Kutani: “va tsikile lezvi va nga hlambanyile ku maha”.
^ Kutani: “va nghena ka lowu muti na va huma vaya ka wun’wani”.
^ Kutani: “dhota”.
^ Hi kukongoma: “kasi lava van’wani va fela ku chava”.
^ Ku nga lezvaku: U nga hatliseli ku nyika munhu a cikhundla co kari.
