1 Va Le Korinte 1:1-31
1 Mina Pawule, ndzi vitanilweko hi kurandza ka Nungungulu kasi ndziva mupostoli wa Kristu Jesu, ndzi nga na Sostene a makabye wa hina,
2 ndza tsalela a bandla ga Nungungulu legi gi nga le Korinte, n’wina lava mu basisilweko ka Kristu Jesu, n’wina mu vitanelweko kuva vobasa, zvin’we ni vontlhe lava va khongelako vitweni ga Hosi ya hina Jesu Kristu matshan’wini wontlhe, yi nga Hosi yabye ni ya hina, ndziku:
3 A tipswalo ni kurula zvi tako hi ka Nungungulu, a Papayi wa hina, ni ka Hosi Jesu Kristu, a zvive na n’wina.
4 Ndza bonga Nungungulu wa mina contlhe cikhati ha n’wina, hi kota ya tipswalo leti Nungungulu a mu nyikileko ha Kristu Jesu;
5 hakuva lezvi mu nga ka Kristu, mu nyikilwe zvilo zvontlhe a ku patsa ni wutlhari gontlhe ga ku wulawula, ni kutiva kontlhe.
6 A wukustumunyu ga Kristu gi zimile mitsu gi tiya cikari ka n’wina
7 kasi mu nga kiyelelwi hi cinyikiwo ne ni cin’we, laha mu rindzelako a kuwonekeliswa ka Hosi ya hina Jesu Kristu.
8 I ta mu tiyisa kala kugumeseni kasi mu ngavi na cisolo sikwini ga Hosi ya hina Jesu Kristu.
9 I tsumbekile Nungungulu loyi a mu vitanileko lezvaku mu tava zvin’we* ni N’wana wakwe Jesu Kristu, a Hosi ya hina.
10 Makunu vamakabye, ndza mu khongotela hi vito ga Hosi ya hina Jesu Kristu lezvaku mu wulawula cilo cin’we, ku ngavi na kuhambana cikari ka n’wina, kanilezvi mu zwanana kupimiseni ni maalakanyweni.
11 Hakuva a va ka Klowe va ndzi byelile lezvaku ku na ni kuhambana cikari ka n’wina vamakabye va mina.
12 Ndzi wula hi lezvi mu wulako ku: “Mina ndzi wa Pawule”, “Mina ndzi wa Apolosi”, “Mina ndzi wa Khefasi”,* “Mina ndzi wa Kristu”.
13 Kasi Kristu i no avanyeka ke? Loyi a nga dawa mhandzeni hi kota ya n’wina kova Pawule ke? Kutani mu no bhabhatiswa hi vito ga Pawule?
14 Ndza mu bonga Nungungulu hi lezvi ndzi nga kala ku bhabhatisa munhu cikari ka n’wina, saseka Krispusi na Gayusi,
15 kasi ku ngavi na loyi a wulako lezvaku i bhabhatiselwe vitweni ga mina.
16 Ina, ndzi bhabhatisile va ka Stefanasi. Kanilezvi n’wina van’wani a ndzi zvi tivi ku i kona ndzi nga mu bhabhatisa.
17 Hakuva Kristu a nga ndzi rumangi ku famba ndzi bhabhatisa, kanilezvi i ndzi rumile ku famba ndzi kanela mahungu ya ma nene; na ndzi nga wulawuli timhaka to khwatsi ndzi munhu a gondzileko nguvhu kasi a mhandze ya hlomulo* ya Kristu yi nga mbhelelwi hi ntamu.
18 Hakuva a ku wulawula hi mhandze ya hlomulo* wupumbu ka lava va lovako, kanilezvi ka hina lava hi ponisiwako i ntamu wa Nungungulu.
19 Hakuva ku tsalilwe ku ngalo: “Ndzi ta fuvisa a wutlhari ga lava vo tlhariha, ndzi ala a wutivi ga lava vo tiva.”
20 Va kwihi lava vo tlhariha? A vatsali* ke, va kwihi? Ti kwihi a titlhari ta filozofiya ta tiko legi?* Ina Nungungulu a nga mahangi a wutlhari ga tiko legi giva wupumbu ke?
21 Hakuva kota lezvi Nungungulu a tlharihileko, a tiko gi no tsandzeka ku mu tiva hi wutlhari ga gona. Hikwalaho, Nungungulu i no xalaliswa hi ku ponisa lava va kholwako hi wupumbu legi gi kanelwako.
22 Hakuva a vaJudha va kombela zviwoniso, a vaGreki va hlota wutlhari;
23 kanilezvi hina hi kanela hi Kristu loyi a delweko laha mhandzeni, yi nga mhaka yi karatelako vaJudha ku yi kholwa,* ni wupumbu ka vamatiko.
24 Hambulezvo, ka lava va vitanilweko, hambu va hi vaJudha kutani vaGreki, Kristu i ntamu wa Nungungulu ni wutlhari ga Nungungulu.
25 Hakuva leci a vanhu va alakanyako lezvaku wupumbu na ci hi ca Nungungulu, ci tlharihile ku hundza vanhu, ni leci va alakanyako ku a ci na ntamu na ci hi ca Nungungulu, ci na ni ntamu ku hundza vanhu.
26 Wonani hi kuvitaniwa ka n’wina vamakabye, lezvaku a nga vitanangi a votala va tlharihileko hi ka nyama,* ne votala va ntamu, ne hambu votala vo ganya,
27 kanilezvi Nungungulu i hlawulile lava va nge khwatsi zvipumbu kuwoneni ka tiko kasi a va wisa tingana lava vo tlhariha; ni lava va nge khwatsi a va na ntamu kuwoneni ka tiko, kasi a va wisa tingana lava va ntamu.
28 Nungungulu i hlawulile a zvilo zvi nga nyawuliko zva tiko, lezvi zvi chepetiwako, ni lezvi zvi nga hiko zva nchumu, kasi a chipisa lezvi zvi nga zva nchumu,
29 kasi ku ngavi na munhu a ti kulisako mahlweni ka Nungungulu.
30 Kanilezvi n’wina mu ka Kristu Jesu hi kota ya Nungungulu. Ka hina Kristu wutlhari ga Nungungulu, ni kululama, ni kubasiswa, ni kutlhatlhiswa hi hakhelo ya kutlhatlhisa,
31 kasi ku maheka lezvi zvi tsalilweko, zvaku: “Loyi a ti kulisako i wa ti kulise hi Jehovha.”
Mitlhamuselo ya lahasi
^ Kutani: “mu ta hlengela”.
^ Loyi a gin’wani vito a nga Pedro.
^ Wona Tlhamuselo wa magezu ya Bhibhiliya.
^ Wona Tlhamuselo wa magezu ya Bhibhiliya.
^ Ku wuliwa titlhari ta Nayo.
^ Kutani: “nguva leyi”. Wona laha ka ku: “Nguva” ka Tlhamuselo wa magezu ya Bhibhiliya.
^ Hi kukongoma: “a nga cikhunguvanyiso ka vaJudha”.
^ Kutani: “mawonela ya vanhu”.
