1 Va Le Korinte 12:1-31
12 Makunu vamakabye, ndzi lava ku mu yi tiva khwatsi a mhaka ya zvinyikiwo zva moya.
2 Ma zvi tiva lezvaku na ma ha hi vamatiko,* mu wa hambukisiwa mu ya khozela zvifananiso zvi nga wulawuliko, mu zvi landzelela ni kwihi lomu zvi nga kari zvi mu yisa kona.
3 Ndzi lava ku mu zvi tiva lezvaku a ku na munhu loyi a nga wulako hi moya wa Nungungulu, aku: “Jesu i rukatelwe!”; ne a nga kona a nga wulako, aku: “Jesu i Hosi!”, na zvi ngati hi ka moya wo basa.
4 A zvinyikiwo zvi hambene, hambulezvo a moya wun’we;
5 a matirela wonawu ma hambene, hambulezvo a Hosi hi yaleyi ya yin’we;
6 ku na ni mitiro yo hambanahambana, hambulezvo a Nungungulu loyi a mahako yontlhe ka vontlhe hi yaloyi wa mun’we.
7 Kanilezvi, lezvi a moya wo basa wu va vhunako ku zvi maha kasi van’wani va vhuneka, zva woneka.
8 Hakuva i kona loyi a moya wu nga mu nyika a wutlhari ga ku wulawula, a mun’wani a nyikiwa ku tiva ku wulawula hi moya walowu wa wun’we,
9 a mun’wani a nyikiwa kukholwa hi moya walowu wa wun’we, ni mun’wani a nyikiwa a ntamu wa ku hanyisa hi moya walowu wa wun’we,
10 a mun’wani kambe a nyikiwa ntamu wa ku maha zvihlamaliso, a mun’wani a nyikiwa ku phrofeta, a mun’wani a nyikiwa ku hlola magezu ma pimisilweko, a mun’wani a nyikiwa ku wulawula tirimi to tala, ni mun’wani a nyikiwa ntamu wa ku tlhamusela tirimi.
11 Kanilezvi yontlhe a mitiro leyi yi mahiwa hi moya walowu wa wun’we, lowu wu avelako ka mun’we ni mun’wani hi kuya hi kurandza ka wona.
12 Hakuva kota lezvi a miri wu nga wun’we, kanilezvi na wu hi ni zviro zvo tala, ni zviro zvontlhe zva miri hambu lezvi zvi nga tala zvi maha miri wun’we, hizvalezvo ni ka Kristu.
13 Hakuva hontlheni hi bhabhatisilwe hi moya wun’we hi maha miri wun’we, kani hi vaJudha kutani hi vaGreki, kani hi tikhumbi kutani hi tlhatlhekile, hontlheni hi amukele a moya walowu wa wun’we.
14 Hakuva a miri a hi ciro cin’we basi, kanilezvi wu wumbiwa hi zviro zvo tala.
15 Loku a nkondzo wuku: “Lezvi ndzi kalako ndzi nga hi canja a ndzi ciro ca miri”, wu nga ta tsika kuva ciro ca miri hi kota ya lezvo.
16 Ni loku a ndleve yiku: “Lezvi ndzi kalako ndzi nga hi tihlo, a ndzi ciro ca miri”, yi nga ta tsika kuva ciro ca miri hi kota ya lezvo.
17 Loku a miri wontlhe wu wa hi tihlo, hi wa ta ingisa hi yini? Ahati loku wu wa hi kuingisa, hi wa tazwa masema hi yini?
18 Kanilezvi Nungungulu i vekile ciro cin’we ni cin’wani ca miri laha a nga ku lava.
19 Loku zvontlhe zvi wa hi ciro cin’we, a miri na wu hi kwihi?
20 Kanilezvi ku na ni zviro zvo tala, hambulezvo, a miri wun’we.
21 A tihlo a gi nge byeli canja giku: “Wena a ndzi ku lavi”, ni hloko a yi nge byeli mikondzo yiku: “N’wina a ndzi mu lavi.”
22 Kanilezvi a zviro zva miri lezvi zvi wonekisako ku khwatsi a zvi na ntamu, zva laveka,
23 ni zviro zva miri lezvi hi alakanyako lezvaku a zvi dzundzeki nguvhu, hi zvi nyika wudzundzo ga hombe, ni zviro zva hina lezvi zvi nga woniwiko hi zvi khatalela khwatsi.
24 Kanilezvi a zviro zva hina lezvi zvo saseka a zvi lavi ku khatatelwa nguvhu. Hambulezvo, Nungungulu i wu mahisile lezvo a miri, a nyika wudzundzo ga hombe a ciro leci ci nga kala ci nga hi na wudzundzo,
25 kasi ku ngavi na kuhambana cikari ka miri; kanilezvi a zviro zva miri zvi fanele ku zwelana.
26 Loku a ciro cin’we ca miri ci xaniseka, zvontlhe lezvi zvin’wani zvi xaniseka zvin’we naco; ni loku a ciro cin’we ca miri ci dzundziwa, zvontlhe lezvi zvin’wani zvi tsaka zvin’we naco.
27 Makunu n’wina mu miri wa Kristu, niku a mun’we ni mun’wani wa n’wina ciro ca miri lowo.
28 Nungungulu i yimisile a zviro zvo tala lomu bandleni: A vo sangula vapostoli; a va wumbiri vaphrofeti; a va wunharu vagondzisi; ku landzela lava vo maha zvihlamaliso; ni lava va nga ni ntamu wa ku hanyisa; ni lava va ku vhunetela; ni lava va nga ni cinyikiwo ca ku rangela; ni lava va ku wulawula tirimi to tala.
29 Kasi hi vontlhe va nga vapostoli ke? Kasi hi vontlhe va nga vaphrofeti ke? Kasi hi vontlhe va nga vagondzisi ke? Kona hi vontlhe va mahako zvihlamaliso ke?
30 Kasi hi vontlhe va nyikilweko ntamu wa ku hanyisa ke? Kasi hi vontlhe va wulawulako hi tirimi to tala ke? Kona hi vontlhe va nga ni cinyikiwo co tlhamusela tirimi ke?
31 Kanilezvi ti karateni* kasi mu kuma zvinyikiwo zva hombe. Hambulezvo, ndza ha ta mu komba zva zvi nene nguvhu ku hundza lezvi zvin’wani.
