1 Va Le Korinte 14:1-40
14 Hlotani lirandzo na mu ti karatela* ku kuma zvinyikiwo zva moya, nguvhunguvhu leci ca ku phrofeta.
2 Hakuva loyi a wulawulako hi lirimi limbe, a nga wulawuli ni vanhu kanilezvi i wulawula na Nungungulu hakuva i hava a mu zwisisako, kanilezvi yena i wulawula zvihundla zvo basa hi moya.
3 Kanilezvi loyi a phrofetako i aka van’wani, a va tiyisa ni ku va chavelela hi magezu yakwe.
4 Loyi a wulawulako hi lirimi limbe o ti aka yena wutsumbu, kanilezvi loyi a phrofetako i aka bandla.
5 Makunu ndzi wa xuva lezvaku n’wentlheni mu wulawula hi tirimi, hambulezvo i chukwana mu phrofeta. Kunene, loyi a phrofetako wa hombe ku hundza loyi a wulawulako hi tirimi, ahandle ka loku a tlhela a tlhamusela, kasi a bandla gi fela ku vhuneka.
6 Makunu vamakabye, loku ndzi wota ka n’wina na ndzi wulawula hi tirimi, zvi wa ta mu vhuna yini lezvo ke? Mu wa ta vhuneka loku ndzi wo wulawula na n’wina hi kuvhululelwa kutani hi kutiva, kutani hi kuphrofeta, kutani hi kugondzisa.
7 Zva fana ni lezvi va bako hi zvona muzka,* kani i mpundzu kutani citende. Loku a kuvhuma ka zvona ku fana, zvi ta tivisiwa kuyini lezvi zvi biwako hi mpundzu kutani hi citende ke?
8 Hakuva loku a mpundzu wuba zvo kala zvi nga tiveki, himani a to ti longisela kuya yimpini ke?
9 Hizvalezvo, loku n’winawu mu nga wulawuli a zvilo zvi tekelako ku zwala, a munhu i ta zvi zwisa kuyini lezvi zvi wuliwako? Mu ta wulawula mahala.
10 Ku na ni tirimi to tala lomu tikweni kanilezvi li hava li kalako li nga zwisiseki.
11 Loku ndzi nga zvi zwisisi lezvi zvi wuliwako, mina ndzi tava wamatiko ka loyi a wulawulako, ni loyi a wulawulako i tava wamatiko ka mina.
12 Hizvalezvo na n’winawu, kota lezvi mu navelako a zvinyikiwo zva moya, hlotani nguvhunguvhu lezvi zvi to tiyisa bandla.
13 Hikwalaho, loyi a wulawulako hi lirimi limbe i wa khongele kasi a kota ni ku tlhamusela.
14 Hakuva loku ndzi khongela hi lirimi limbe, a hi mina ndzi wulawulako, kanilezvi cinyikiwo leci ndzi nyikilweko hi moya wo basa. Hikwalaho, a ndzi zvi zwisisi lezvi ndzi wulako.
15 Makunu, ndzi ta kuyini ke? Ndzi ta khongela hi cinyikiwo leci ndzi nyikilweko hi moya, ndzi guma ndzi khongela kambe hi kupima ka mina; ndzi ta yimbelela hi cinyikiwo leci ndzi nyikilweko hi moya, ndzi guma ndzi yimbelela kambe hi kupima ka mina.
16 Hakuva loku u dhumisa Nungungulu hi cinyikiwo ca moya, a munhu wa nyalidede* loyi a nga cikari ka n’wina i ta wulisa kuyini ku “Amen” ka magezu ya wena ya kubonga kuveni a nga zvi tivi lezvi u wulako ke?
17 Lisine lezvaku u bonga Nungungulu hi ndlela yi nene, kanilezvi loyi mun’wani a nga vhuneki.
18 Ndza mu bonga Nungungulu hi lezvi ndzi wulawulako hi tirimi to tala a ku hundza n’wina n’wentlhe.
19 Hambulezvo, lomu bandleni i chukwana ku ndzi wula ntlhanu wa magezu ma zwalako* kasi ndzi gondzisa van’wani a ku hundza ku wula a 10 000 wa magezu hi lirimi limbe.
20 Vamakabye, mu nga mahi vanana kupimeni ka n’wina, kanilezvi mahani vanana ka zvakubiha; muva madhota* kupimeni ka n’wina.
21 Lomu Nayweni ku tsalilwe lezvi: “‘Ndzi ta wulawula ni vanhu lava hi tirimi timbe ni minomu ya vamatiko, hambulezvo va nga ta ndzi ingisa’, ku wula Jehovha.”
22 Hikwalaho a tirimi a hi cikombiso ka lava va kholwako kanilezvi ka lava va nga kholwiko, kuveni a kuphrofeta a hi ka lava va nga kholwiko kanilezvi ka lava va kholwako.
23 Hikwalaho loku a bandla gontlhe gi tlhangana, vontlhe va sangula ku wulawula hi tirimi timbe, ku gumesa kuta vanhu va nyalidede* ni vangakholwiko, va nga ta wula ku mo hlanya ke?
24 Kanilezvi loku n’wentlheni mu kari mu phrofeta, makunu kuta munhu a nga kholwiko kutani wa nyalidede,* i ta kawukiwa a tlhela a hloliwa hi vontlhe.
25 A zvihundla zva mbilu yakwe zvi ta woneka, niku i tawa lahasi hi nghohe a khozela Nungungulu aku: “Hakunene Nungungulu i kona cikari ka n’wina.”
26 Makunu vamakabye hi ta ku yini? Loku mu tlhangene a mun’we i na ni lisimu, a mun’wani i nyikilwe ku gondzisa, a mun’wani i na ni kuvhululelwa, a mun’wani i wulawula hi lirimi limbe, ni mun’wani i nyikilwe ku tlhamusela tirimi; zvontlhe zvi wa mahiwe kasi mu akana hi zvona.
27 Loku ku hi ni lava va ku wulawula hi tirimi, ku wa wulawule vambiri kutani vanharu basi, mun’we hi khati, lezvo na ku hi ni mutlhamuseli.
28 Kanilezvi loku lomu bandleni ku nga hi na mutlhamuseli, i wa miyele a wulawula yece na Nungungulu.
29 Loku va hi vaphrofeti, ku wa wulawule vambiri kutani vanharu, kanilezvi lava van’wani va wa ingisele kasi va tiva lezvi zvi wuliwako.
30 Kanilezvi loku a wokari a amukela a kuvhululelwa na a ha tshamile laho, loyi a wulawulako i wa miyele.
31 Hakuva n’wentlheni mu nga phrofeta, kanilezvi ku wa phrofete munhu mun’we hi khati, kasi vontlhe va gondza ni lezvaku vontlhe va fela ku tiyiswa.
32 A zvinyikiwo zva moya zva vaphrofeti zvi fanele ku wonelelwa hi vaphrofeti.
33 Hakuva Nungungulu a hi Nungungulu wa woyonga kanilezvi wa kurula.
A ku fana ni lezvi zvi mahekako mabandleni wontlhe ya vobasa,
34 a vavasati va wa miyele lomu mabandleni, hakuva a va faneli ku wulawula. Kanilezvi va wa ti koramise kota lezvi a Nayo wonawu wu wulako.
35 Loku va lava ku tiva cokari, va wa wutise a vanuna vabye le kaya, hakuva zva wisa tingana ku a wasati a wulawula lomu bandleni.
36 Kasi a mhaka ya Nungungulu yi no tumbulukela ka n’wina, kutani yi nota kala ka n’wina basi ke?
37 Loku a wokari a alakanya lezvaku muphrofeti kutani ku i na ni cinyikiwo ca moya, i fanele ku vhumela lezvaku a timhaka leti ndzi mu tsaleleko cileletelo ca Hosi.
38 Kanilezvi loku a munhu a kanyisa cileletelo leci, yenawu i ta kanyisiwa.*
39 Hikwalaho vamakabye, simamani ku ti karatela ku phrofeta, hambulezvo mu nga beteli munhu ku wulawula hi tirimi.
40 Kanilezvi a zvilo zvontlhe zvi wa mahiwe hi fanelo ni nayo.
Mitlhamuselo ya lahasi
^ Kutani: “tsitsirita kasi”.
^ Kutani: “wucenje”.
^ Kutani: “munhu wa ciyimo ca lahasi”.
^ Kutani: “zwisisekako”.
^ Kutani: “mu buvha”.
^ Kutani: “vanhu va ciyimo ca lahasi”.
^ Kutani: “munhu wa ciyimo ca lahasi”.
^ Zvi nga ha wula ku: “loku a munhu a nga tivi, i ta simama ku nga tivi”.
