1 Va Le Korinte 16:1-24
16 Xungetano hi hlengo lowu wu mahelwako vobasa, landzelani zvileletelo lezvi ndzi nyikileko a mabandla ya le Galatiya.
2 Hi siku go sangula ga vhiki ni vhiki, a mun’we ni mun’wani wa n’wina i wa khwekete zvokari hi kuya hi lezvi a nga nazvo, kasi ku nga mahiwi mihlengo a cikhati leci ndzi to chikela.
3 Kanilezvi loku ndzi chikela seyo, ndzi ta ruma vavanuna lava mu va dzundzako mapapilweni ya n’wina lezvaku va heleketa a cinyikiwo ca n’wina Jerusalema.
4 Hambulezvo, loku zvi laveka ku minawu ndzi famba, ndzi ta famba navo.
5 Kanilezvi ndzi tata ka n’wina loku ndzi hundzile hi Makedhoniya, hakuva ndzi ta hundza hi Makedhoniya.
6 Zvi nga maha ndzi ta tshama na n’wina a masiku yo kari, kuzvilava hambu kuza ku hundza a nguva ya cirami kasi mu ndzi heleketanyana na ndziya lomu ndzi yako kona.
7 Hakuva a ndzi xuvi ku mu wona zva cipswhati, kota lezvi ndzi alakanyako lezvaku ndzi ta tshama na n’wina a cikhati co kari, loku Jehovha a zvi randza.
8 Kanilezvi ndza ha ta tshama laha Efesusi kala ku chikela a Festa ya Pentekosta,
9 hakuva ndzi vhululelwe a nyangwa ya hombe ya ntiro, kanilezvi ku na ni vakaneti vo tala.
10 Loku Timote a chikela, tirani khwatsi naye kasi a nga chavi loku a hi cikari ka n’wina, hakuva i tira a ntiro wa Jehovha a ku fana na mina.
11 Hikwalaho, ku ngavi na munhu a mu kanyisako. Mu heleketeni hi kurula pfhumbeni gakwe ga kuta ka mina, hakuva mina ni vamakabye hi mu rindzele.
12 Xungetano hi Apolosi a makabye wa hina, ndzi mu khongotele nguvhu lezvaku ata ka n’wina ni vamakabye. I wa nga zvi lavi kuta ka n’wina zvezvi, kanilezvi i tata loku zvi ringana.
13 Khindlimukani, mu tiya mu ku nde kukholweni, mu maha cinuna,* muva ni ntamu.
14 Zvontlhe lezvi mu mahako zvi maheni hi lirandzo.
15 Makunu vamakabye, ndza mu khongotela ndziku: Ma zvi tiva lezvaku a va ka Stefanasi hi vona vo ranga ku kholwa ka Kristu le Akaya ni lezvaku va tirele vobasa hi kutitsitsirita.
16 Hikwalaho, ti koramiseni ka vanhu vo khwatsi hi lavo ni ka vontlhe lava va hlengelako ntirweni lowu ni ku tira hi kutikarata.
17 Kanilezvi ndza tsaka hi lezvi Stefanasi na Fortunatusi na Akayikusi va nga laha na mina hakuva va mu vhaletile, va ndzi vhunile kota lezvi mu nga kala mu nga hi kona.
18 Hakuva va tangalisile moya wa mina ni wa n’winawu. Hikwalaho, mu nga rivali a vanhu vo kota lavo.
19 A mabandla ya le Azia ma mu rungula. Akwila na Priska zvin’we ni bandla legi gi tlhanganako laha mutini wabye va mu rungula nguvhu Hosini.
20 A vamakabye vontlhe va mu rungula. Losanani hi kupswopswana ko basa.
21 Hi lawa a marungula ya mina Pawule, lawa ndzi ma tsalileko hi canja ga mina wutsumbu.
22 Loku a hi kona munhu a nga randziko Hosi, i rukatelwe. Hosi ya hina, ha ku kombela, tana!
23 A tipswalo ta Hosi Jesu a tive na n’wina.
24 A lirandzo la mina a live na n’wina n’wentlhe mu nga ka Kristu Jesu.
Mitlhamuselo ya lahasi
^ Kutani: “mu tiya hlana”.
