1 Va Le Korinte 2:1-16
2 Hikwalaho, a cikhati leci ndzi ngata ka n’wina vamakabye ndzi ta kanela a cihundla co basa ca Nungungulu, a ndzi wulawulangi magezu yo karata ku ma zwisisa ne ya wutlhari ga hombe.
2 Hakuva ndzi zvi wonile na zvi hi chukwana a ku nga wulawuli hi cin’wani cilo ahandle ka Jesu Kristu loyi a nga dawa mhandzeni.
3 Ndzi tile na ndzi ku khwatsi hi loyi a nga hava ntamu, na ndzi chava ni ku rurumela.
4 Lezvi ndzi nga wulawula ni ku kanela a hi magezu ya wutlhari ya ku fela ku kholwisa vanhu, kanilezvi magezu ya ku kombisa a ntamu wa moya wo basa,
5 kasi a kukholwa ka n’wina ku nga seketelwi ka wutlhari ga vanhu, kanilezvi ku seketelwa ka ntamu wa Nungungulu.
6 Makunu hi wulawula hi wutlhari cikari ka lava va buvhileko, kanilezvi a hi wulawuli hi wutlhari ga tiko legi,* ne hambu ga tihosi ta tiko legi, leti ti to lovisiwa.
7 Kanilezvi hi wulawula hi cihundla co basa, leci ci nga wutlhari gi fihlilweko ga Nungungulu, legi a gi maheleko makungo hi kale na gi nga seva kona a tiko legi* go biha, lezvaku giva wudzundzo ga hina.
8 Hi gona wutlhari legi a tihosi ta tiko legi* ti nga kala ku gi tiva, hakuva loku ti wa gi tivile na ti nga dayangi* a Hosi yo ngangamela.
9 Kota lezvi ku tsalilweko ku ngalo: “A tihlo a gi zvi wonangi, ni ndleve a yi zvi zwangi, ne a zvi nghenangi mbilwini ya munhu a zvilo lezvi Nungungulu a longiseleleko lava va mu randzako.”
10 Hakuva Nungungulu i zvi wonekelisile ka hina hi moya wakwe, hakuva a moya wu hlola zvilo zvontlhe, a ku patsa ni zvilo zvi etileko zva Nungungulu.
11 Hakuva himani cikari ka vanhu a zvi kotako ku tiva maalakanyo ya munhu, ahandle ka mbilu* ya munhu loye ke? Hizvalezvo, i hava a tivako maalakanyo ya Nungungulu ahandle ka moya wa Nungungulu.
12 Makunu hina a hi amukelangi a moya wa tiko, kanilezvi hi amukele a moya lowu wu tako hi ka Nungungulu, kasi hi fela ku tiva zvilo lezvi Nungungulu a hi nyikileko.
13 Kanilezvi a zvilo lezvi, a hi wulawuli hi zvona hi magezu ma gondzisiwako hi wutlhari ga vanhu, kanilezvi hi magezu hi gondzisiwako hi moya, a cikhati leci hi tlhamuselako a timhaka ta moya hi magezu ya moya.
14 Kanilezvi a munhu wa nyama a nga vhumeli* a zvilo zva moya wa Nungungulu, hakuva ka yena wupumbu; a nga zvi koti ku zvi tiva hakuva zvi hloliwa hi ka moya.
15 Hambulezvo, a munhu wa moya wa hlola zvilo zvontlhe, kanilezvi yena wutsumbu a nga hloliwi hi mun’wani munhu.
16 Hakuva “himani a ku tivileko a kupima ka Jehovha kasi a fela ku mu gondzisa ke”? Kanilezvi hina hi na ni kupima ka Kristu.
Mitlhamuselo ya lahasi
^ Kutani: “nguva leyi”. Wona laha ka ku: “Nguva” ka Tlhamuselo wa magezu ya Bhibhiliya.
^ Hi ciGreki: aion. Wona laha ka ku: “Nguva” ka Tlhamuselo wa magezu ya Bhibhiliya.
^ Kutani: “nguva leyi”. Wona laha ka ku: “Nguva” ka Tlhamuselo wa magezu ya Bhibhiliya.
^ Kutani: “dayangi laha mhandzeni”.
^ Hi kukongoma: “moya”.
^ Kutani: “amukeli”.
