1 Va Le Korinte 3:1-23
3 Hikwalaho vamakabye, a ndzi zvi kotangi ku wulawula na n’wina a ku khwatsi hi loku mu hi vanhu va moya, kanilezvi ndzi no wulawula na n’wina a ku khwatsi mu vanhu va nyama, ni zvivanana ka Kristu.
2 Ndzi mu nwisile leti,* a ndzi mu phamelangi zvakuga zvo tiya, hakuva mu wa nga se zvi kota kuga. Hambu ni zvalezvi a mu se zvi kota,
3 hakuva ma hi va nyama. Kota lezvi ku nga ni ciluse ni kuholovisana cikari ka n’wina, hakunene mu vanhu va nyama niku mu hanyisa ku khwatsi hi lezvi a vanhu va tiko va hanyisako zvona.
4 Hakuva loku loyi aku: “Mina ndzi wa Pawule”, a mun’wani aku: “Mina ndzi wa Apolosi”, a mo hanyisa ku khwatsi mu va nyama ke?
5 Kasi Apolosi ova mani? Pawule ke, ova yini? Malandza ntsena ma mu vhunileko ku kholwa, khwatsi hi lezvi a Hosi yi nyikileko a mun’we ni mun’wani wabye.
6 Mina ndzi no byala, Apolosi a chetela mati, kanilezvi hi Nungungulu a nga milisa a tlhela a kulisa.
7 Hikwalaho, loyi a byalako a hi wa nchumu, hambu loyi a chetelako mati, saseka Nungungulu loyi a milisako ni ku kulisa.
8 Makunu loyi a byalako ni loyi a chetelako mati va tira zvin’we,* kanilezvi a mun’we ni mun’wani wabye i ta amukela a nchachazelo wakwe hi kuya hi ntiro wakwe.
9 Hakuva hina hi zvitiri-kulobye na Nungungulu. N’wina mu simu ga Nungungulu, mu yindlu ya Nungungulu.
10 Hi tipswalo ta Nungungulu leti ndzi kombisilweko, ndzi no aka ciseketelo kota meseri wa mu nene, kanilezvi a mun’wani i aka hehla ka cona. Kanilezvi a mun’we ni mun’wani i wa chele kota hi lezvi a akisako zvona ka cona.
11 Hakuva i hava a zvi kotako ku aka cin’wani ciseketelo ahandle ka leci ci sinako ci akilwe, ku nga Jesu Kristu.
12 Makunu loku a munhu a aka ciseketelweni leci hi ouro, ni prata, ni maribye ya lisima, kutani hi tisinya, ni byanyi, ni hlanga;
13 a ntiro wa mun’we ni mun’wani wu ta kombisiwa lezvaku wu tshamisile kuyini, hakuva a siku lego gi ta wu kombisa kubaseni, hakusa wu ta kombekiswa hi ndzilo; a ndzilo wu ta hlola a ntiro wa mun’we ni mun’wani lezvaku wa lixaka muni.
14 Loku a ntiro lowu munhu a wu akileko ciseketelweni leci wu pona kuswa ndzilweni, i ta chachazelwa;
15 loku a ntiro wa munhu wuswa, i ta luzekelwa, kanilezvi yena n’winyi i ta pona, hambulezvo na a ku khwatsi i huma hi lomu ndzilweni.
16 Kasi a mu zvi tivi lezvaku n’wina mu tempeli ya Nungungulu ni lezvaku a moya wa Nungungulu wu tshama ka n’wina ke?
17 Loku a wokari a hohlola a tempeli ya Nungungulu, Nungungulu i ta mu lovisa; hakuva a tempeli ya Nungungulu yi basile, n’wina mu tempeli leyo.
18 Ku ngavi na loyi a ti kalavelako. Loku a wokari cikari ka n’wina a alakanya lezvaku i tlharihile hi wutlhari ga tiko legi,* i wa mahe cipumbu kasi a fela ku tlhariha.
19 Hakuva a wutlhari ga tiko legi, wupumbu ka Nungungulu, hakuva ku tsalilwe ku ngalo: “I khoma vatlharihileko ka mano yabye.”
20 Niku: “Jehovha wa zvi tiva lezvaku a maalakanyo ya vatlharihileko a ma vhuni nchumu.”
21 Hikwalaho, ku ngavi na loyi a ti kulisako hi vanhu, hakuva zvontlhe zva n’wina,
22 kani hi Pawule, kani hi Apolosi, kani hi Khefasi,* kutani i tiko, kutani wutomi, kutani kufa, kutani zvilo zvi nga kona, kutani zvilo zva ha tako, zvontlhe zva n’wina;
23 kasi lezvo n’wina mu va Kristu; Kristu wa Nungungulu.
Mitlhamuselo ya lahasi
^ Kutani: “masi”.
^ Kutani: “va na ni kungo gin’we”.
^ Kutani: “nguva leyi”. Wona laha ka ku: “Nguva” ka Tlhamuselo wa magezu ya Bhibhiliya.
^ Loyi a gin’wani vito a nga Pedro.
