1 Va Le Korinte 4:1-21
4 A vanhu va fanele ku hi wona kota zvitiri zva Kristu ni malandza ya zvihundla zvo basa zva Nungungulu.
2 Leci ci lavekako ka malandza hi lezvaku ma tsumbeka.
3 A ndzi na mhaka loku ndzi lamuliwa hi n’wina kutani hi tribhunali ya vanhu, hakuva hambu mina wutsumbu a ndzi ti lamuli.
4 Hakuva a ci kona ndzi alakanyako ku ndzi wonhile. Kanilezvi a ndzi wuli ku ndzi no lulama; loyi a ndzi lamulako hi Jehovha.
5 Hikwalaho mu nga lamuli nchumu na ci nga se chikela cikhati ca kona, rindzelani kala a Hosi yita. Yi ta tisa kuwonekeleni lezvi zvi fihlilweko munyameni, yi tivekisa a mixuvo ya timbilu. Makunu a mun’we ni mun’wani i ta amukela a wudzundzo legi gi mu ringanako hi ka Nungungulu.
6 Hikwalaho vamakabye, ndzi wulawula timhaka leti ha mina wutsumbu na Apolosi kasi ku mu vhuna, lezvaku mu gondza hi ka hina a nayo lowu wu nge: “Mu nga mahi zvo hundza lezvi zvi tsalilweko”, kasi mu nga tali hi matshandza, muku loyi i chukwana ku hundza gayani.
7 Hakuva himani a ku mahako uva wa chukwana ku hundza mun’wani? Kona cini u nga naco u nga kala ku nyikiwa? Makunu loku ku hi lezvaku u no nyikiwa, hikuyini u ti kukumukisako a ku khwatsi hi loku u nga nyikiwangi ke?
8 Kasi mova ni zvontlhe? Mu no ganya ke? Mu no sangula ku fuma n’wece na mu nga hi na hina ke? Kunene, ndzi wa ta tsaka loku ku wo khwatsi mu sangulile ku fuma, kasi hinawu hi fela ku fumawo na n’wina.
9 Hakuva ka mina zvo khwatsi Nungungulu i vekile hina vapostoli lendzhako ka vontlhe a ku khwatsi hi vanhu va konelweko ku dawa na hi hlalelwa hi tiko, ni tingilozi, ni vanhu.
10 Hina hi zvipumbu hi kota ya Kristu, kanilezvi n’wina mu tlharihile ka Kristu; hina a hi na ntamu, kanilezvi n’wina mu na ni ntamu; n’wina ma dzundziwa kanilezvi hina ha chepetiwa.
11 Kala lezvi hi na ni ndlala, ni tora, ha vhumala co boha,* niku ha biwa,* a hi na ko tshama kona,
12 ha ti karata hi tira hi mandla ya hina. Loku va hi ruka ha va katekisa; loku va hi xanisa, ha timisela;
13 loku va hi rukatela, hi va hlamula hi kurula;* kala lezvi hi chaka ga tiko ni fendze ya zvilo zvontlhe.
14 A ndzi mu tsaleli timhaka leti kasi ku mu dhanisa, kanilezvi ndzi mu tsalela kasi ku mu gondzisa kota vana va mina va randzekako.
15 Hakuva hambu loku mu hi ni 10 000 wa vagondzisi ka Kristu, a mu na vapapayi vo tala; hakuva hi mina ndzi nga papayi wa n’wina ka Kristu Jesu hi kota ya mahungu ya ma nene.
16 Hikwalaho ndza mu khongotela lezvaku mu ndzi pimanyisa.
17 Hi kota ya lezvo, ndza mu rumelela Timote, a n’wana wa mina ndzi mu randzako ni wo tsumbeka Hosini. I ta mu alakanyisa lezvi ndzi mahisako zvona zvilo* ka Kristu Jesu, kota lezvi ndzi gondzisako kontlhe, mabandleni wontlhe.
18 A vokari va tele hi matshandza, a ku khwatsi ndzi nga ta hata ka n’wina.
19 Kanilezvi ndzi tata ka n’wina zvezvi, loku Jehovha a zvi randza, na ndzi nga teli ku ta tiva lezvi va wulawulako lava va teleko hi matshandza, kanilezvi a ku ta tiva a ntamu wabye.
20 Hakuva a Mufumo wa Nungungulu a hi kuwulawula, kanilezvi i ntamu.
21 Mu langa yini? Ndzi mu tela ni limhika kutani ndzita hi lirandzo ni moya wa kurula ke?
Mitlhamuselo ya lahasi
^ Hi kukongoma: “hi zvimbyiri”.
^ Kutani: “ha xanisiwa”.
^ Hi kukongoma: “ha va khongotela”.
^ Hi kukongoma: “I ta mu alakanyisa a tindlela ta mina”.
