1 Va Le Korinte 5:1-13
5 Ku zwala lezvaku ka mahiwa wubhayi* go tshisa cikari ka n’wina ga ku ne hambu vamatiko a va mahi, ku nga lezvaku a wanuna wo kari i tekile sati wa papayi wakwe.
2 Zva mu tsakisa lezvo n’wina ke? A hi chukwana mu rila, kasi a wanuna loyi a mahileko lezvo a fela ku susiwa cikari ka n’wina ke?
3 Hambu lezvi ndzi kalako ndzi nga hi kona cikari ka n’wina hi miri, ndzi na n’wina hi moya, niku ndzi sina ndzi lamulile a wanuna loyi a mahileko lezvo, a ku khwatsi hi loku ndzi hi na n’wina.
4 Loku mu tlhangana vitweni ga Hosi ya hina Jesu, na mu tiva lezvaku ndzi na n’wina hi moya ni ntamu wa Hosi ya hina Jesu,
5 nyikelani a munhu loye ka Sathani kasi a nyama yi lovisiwa, lezvaku a moya wu fela ku ponisiwa sikwini ga Hosi.
6 A kutikulisa ka n’wina a hi ku nene. A mu zvi tivi lezvaku a livrina yi tsongwani ya vilisa* a mapa wontlhe ke?
7 Susani a livrina ya kale kasi muva mapa maswa yo kala livrina, kota lezvi futsi mu nga wona. Hakuva Kristu, a yivhana ya hina ya Phasika, i sina a delwe kota muphahlo.
8 Hikwalaho a hi simameni ku maha festa leyi, kanilezvi na hi nga yi mahi hi livrina ya kale ne hi livrina ya kubiha ni wuhava, kanilezvi a hi yi maheni hi tipawa to kala livrina ta kutsumbeka ni lisine.
9 Ka papilo ga mina ndzi mu tsalele lezvaku mu tsema wuxaka ni* zvibhayi.*
10 A ndzi wuli lezvaku mu tsawukana magumo ni zvibhayi* zva tiko legi, kutani vanhu va timbilu, kutani makhamba, kutani vakhozeli va zvifananiso. Hakuva loku zvi wa hi lezvo, mu wa ta suka tikweni.
11 Kanilezvi, makunu ndza mu tsalela lezvaku loku a hi kona munhu loyi a vitaniwako ku makabye na a hi cibhayi,* kutani a nga ni timbilu, kutani mukhozeli wa zvifananiso, kutani murukateli, kutani cidhakwa, kutani khamba, tsemani wuxaka* naye, ne mu ngagi naye.
12 Hakuva i mhaka muni ndzi nga nayo ni va le handle ko kala ndzi va lamula ke? N’wina lamulani lava va nga cikari ka n’wina,
13 Nungungulu i ta lamula lava va nga le handle. “Hlongolani a munhu wa kubiha cikari ka n’wina.”
Mitlhamuselo ya lahasi
^ Hi ciGreki: porneía. Wona Tlhamuselo wa magezu ya Bhibhiliya.
^ Kutani: “kukumukisa”.
^ Kutani: “mu tsika kuva vanghana va”.
^ Wona laha ka ku: “Wubhayi” ka Tlhamuselo wa magezu ya Bhibhiliya.
^ Wona laha ka ku: “Wubhayi” ka Tlhamuselo wa magezu ya Bhibhiliya.
^ Wona laha ka ku: “Wubhayi” ka Tlhamuselo wa magezu ya Bhibhiliya.
^ Kutani: “tsikani kuva ni wunghana”.
