1 Va Le Korinte 6:1-20
6 Hikuyini loku a wokari cikari ka n’wina a hi ni mhaka ni mun’wani a tiyako kuya tribhunali a ya mu kecara ka vanhu va nga lulamangiko a tsika kuya ka vobasa ke?
2 Kasi a mu zvi tivi lezvaku a vobasa va ta lamula a tiko ke? Loku ku hi lezvaku n’wina mu ta lamula a tiko, a mu zvi koti ku lamula timhaka ta titsongwani ke?
3 Kasi mo kala mu nga zvi tivi lezvaku hi ta lamula a tingilozi? Makunu hi tsandziwa hi yini a ku lamula a timhaka ta loku kuhanya ke?
4 Loku mu hi ni timhaka ta loku kuhanya ti lavako ku xuxiwa, hikuyini mu hlawulako vanhu va nga dzundziwiko hi bandla kasi va mu lamula?
5 Ndzi wula lezvi kasi ku mu wisa tingana. Ko kala ku nga hi na munhu wo tlhariha cikari ka n’wina a ringanako ku lamula vamakabye vakwe ke?
6 Kanilezvi, a makabye iya tribhunali a ya kecara makabye wakwe ka vangakholwiko!
7 A mu zvi woni ku ciruko ka n’wina loku mu kecarana tribhunali? Hikuyini mu nga vhumeliko ku gohelwa? Hikuyini mu nga vhumeliko ku kalavelwa?
8 Phela n’winawu ma goha ni ku kalavela vamakabye va n’wina!
9 Kasi a mu zvi tivi lezvaku a vangalulamangiko va nga taga a tshomba ya Mufumo wa Nungungulu ke? Mu nga ti kalaveli,* hakuva a zvibhayi,* ni vakhozeli va zvifananiso, ni vavanuna lava va ti mahako vavasati, ni vavanuna lava va etlelako ni van’wani vavanuna,*
10 ni makhamba, ni lava va timbilu, ni zvidhakwa, ni lava va rukatelako, ni vaphangi; a vanhu va tshamela lego va nga taga a tshomba ya Mufumo wa Nungungulu.
11 A van’wani va n’wina va wa hanyisa zvalezvo. Kanilezvi mu no hlazviwa mu basiswa, mu wuliwa vo lulama vitweni ga Hosi Jesu Kristu, ni le moyeni wa Nungungulu wa hina.
12 A zvilo zvontlhe zva vhumeleleka ka mina, kanilezvi a hi zvontlhe zvi vhunako. A zvilo zvontlhe zva vhumeleleka ka mina, kanilezvi a ndzi tsiki ne ni cin’we ca zvona ci ndzi fumela.
13 A zvakuga zva khwiri, ni khwiri ga zvakuga; kanilezvi Nungungulu i ta fuvisa zvontlhe. A miri a hi wa wubhayi* kanilezvi wa Hosi, ni Hosi ya miri.
14 Lezvi Nungungulu a nga vhuxa Hosi, i ta hi vhuxawo kufeni hi ntamu wakwe.
15 A mu zvi tivi lezvaku a mimiri ya n’wina zviro zva Kristu? Makunu ndzi wa ta teka a zviro zva Kristu ndzi zvi tlhanganisa ni cibhayi ke? Kokwihi!
16 Kasi a mu zvi tivi lezvaku loyi a ti tlhanganisako ni cibhayi i maha miri wun’we naco ke? Hakuva Nungungulu i ngalo: “Lava vambiri va tava nyama yin’we”.
17 Kanilezvi, loyi a tlhanganisilweko ni Hosi i maha mun’we zvin’we nayo moyeni.
18 Chavani wubhayi!* Ni cihi ciwonho leci a munhu a ci mahako ci lahandle ka miri wakwe, kanilezvi loyi a mahako wubhayi i wonhela a miri wakwe.
19 Kasi a mu zvi tivi lezvaku a miri wa n’wina i tempeli ya moya wo basa lowu wu nga ka n’wina mu nyikilweko hi Nungungulu ke? Hikwalaho, a ma ha hi va n’wina venyi,
20 hakuva mu xavilwe hi ntsengo. Hikwalaho, dhumisani Nungungulu mirini wa n’wina.
Mitlhamuselo ya lahasi
^ Kutani: “Mu nga kalavelwi”.
^ Hi ciGreki: porneía. Wona Tlhamuselo wa magezu ya Bhibhiliya.
^ Kutani: “vavanuna lava va hlengelako masango ni vavanuna”.
^ Hi ciGreki: porneía. Wona Tlhamuselo wa magezu ya Bhibhiliya.
^ Hi ciGreki: porneía. Wona Tlhamuselo wa magezu ya Bhibhiliya.
