1 Va Le Korinte 7:1-40
7 Xungetano hi timhaka leti mu nga tsala, i chukwana ku a wanuna a nga henyi* wasati;
2 kanilezvi hi kota ya lezvi a wubhayi* gi tatileko tiko, a wanuna mun’we ni mun’wani i wave ni sati wakwe, ni wasati mun’we ni mun’wani ava ni nuna wakwe.
3 A nuna i wa nyike sati wakwe lezvi zvi mu faneleko, ni sati yenawu i wa mahe zvalezvo ka nuna wakwe.
4 A sati a nga mandi ka miri wakwe saseka nuna wakwe; ni nuna yenawu a nga mandi ka miri wakwe saseka a sati wakwe.
5 Mu nga tsonani, saseka loku mu vhumelana hi cikhati co kari, kasi mu ti nyika cikhati ca ku khongela, mu tlhela mu tlhangana kambe, lezvaku Sathani a nga mu ringi hi kota ya ku tsandzeka ku ti khoma.
6 Ndzi wula lezvi hi ku mu tsetsa, a hi nayo.
7 Kanilezvi ndzi xuva lezvaku vontlhe vanhu va fana na mina. Hambulezvo, a munhu ni munhu i na ni cinyikiwo cakwe a nga nyikiwa hi Nungungulu, a mun’we hi tshamela legi, a mun’wani hi tshamela legiyani.
8 Makunu ndza wula ka lava va kalako va nga chadhangi, ni ka vavasati lava vo felwa hi vanuna lezvaku i chukwana loku va wo tshamisa ku khwatsi hi mina.
9 Kanilezvi loku va nga zvi koti ku ti khoma a va chadhe, hakuva i chukwana ku chadha a ku hundza kuswa hi kunavela.
10 Ndza laya lava va chadhileko, na ku nga hi mina, kanilezvi hi Hosi, ndziku ngalo: A sati a nga faneli ku hambana ni nuna wakwe.
11 Kanilezvi loku a sati a hambana ni nuna wakwe, i wa tshame a nga chadhi kutani ku tlhela a zwanana ni nuna wakwe; ni nuna a nga tsiki a sati wakwe.
12 Kanilezvi ka van’wani ndza wula mina, na ku nga hi Hosi, ndziku: Loku a hi kona makabye a nga ni sati a nga kholwiko, a nga tsiki sati wakwe loku a sati loye a ha zvi lava ku tshama naye;
13 ni loku a wasati a hi ni nuna a nga kholwiko, a nga tsiki nuna wakwe loku a nuna loye a ha zvi lava ku tshama naye.
14 Hakuva a nuna a nga kholwiko i basisilwe hi kota ya sati wakwe, ni sati a nga kholwiko i basisilwe hi kota ya nuna wakwe a kholwako; loku zvi wa nga hi lezvo a vanana va n’wina na va nga hlazvekangi, kanilezvi makunu va basile.
15 Kanilezvi loku loyi a nga kholwiko a suka a famba,* i wa fambe; ka zvilo zvo khwatsi hi lezvi, a makabye wa cinuna kutani wa cisati a nga bohelelwangi ka sati wakwe kutani ka nuna wakwe. Nungungulu i mu vitanele ku ta hanya kuruleni.
16 Wena sati u zvi tivisa kuyini lezvaku u nga ta ponisa a nuna wa wena? Kutani wena nuna u zvi tivisa kuyini lezvaku u nga ta ponisa a sati wa wena ke?
17 Hambulezvo, a munhu ni munhu i wa hanye kota lezvi Jehovha a mu nyikisileko zvona, khwatsi hi lezvi Nungungulu a nga mu vitanisa zvona. Ndzi laya lezvo mabandleni wontlhe.
18 Loku a hi kona a nga vitaniwa na a mahilwe wukwera,* i wa tshamise zvezvo. Ni loku a hi kona a nga vitaniwa na a nga mahiwangi wukwera, i wa tshamise zvezvo.
19 A wukwera* a hi ga nchumu, ni kungamahi wukwera zvonawu a hi zva nchumu; a ca hombe ku hlayisa milayo ya Nungungulu.
20 A mun’we ni mun’wani i wa tshamise zvalezvi a nga vitanisiwa zvona.
21 Loku u vitanilwe na u hi khumbi, u nga karateki hi zvona; kanilezvi loku u zvi kota ku tlhatlheka, londzowota thomo lego.
22 Hakuva ni wihi a nga vitanelwa Hosini na a hi khumbi i tlhatlhekile Hosini; hizvalezvo ni loyi a nga vitaniwa na a tlhatlhekile i khumbi ya Kristu.
23 Mu xavilwe hi ntsengo; tsikani ku ti maha tikhumbi ta vanhu.
24 Vamakabye, a mun’we ni mun’wani i wa simame mahlweni ka Nungungulu na a tshamisile zvalezvi a nga vitanisiwa zvona.
25 Ka majaha ni vanhwana,* a ndzi na nayo wa Hosi, kanilezvi ndzo nyika mawonela ya mina kota munhu wo tsumbeka a mahelweko wuxinji hi Hosi.
26 Hikwalaho, ndzi alakanya lezvaku hi kota ya zvikarato lezvi zvi nga kona, i chukwana ku a wanuna a simamisa zvalezvi a nga tshamisa zvona.
27 Loku u bohilwe ka sati, u nga lavi ku tlhatlheka. Loku u nga hi na sati, u nga lavi sati.
28 Hambulezvo loku u chadha, a wu wonhi. Ni loku a jaha kutani nhwana* a chadha, a nga wonhi. Kanilezvi lava va chadhako va ta xaniseka kuhanyeni.* Ndzo zama ku mu vhikela ka lezvo.
29 Ndza engeta ndziku ngalo ka n’wina vamakabye: A cikhati ci nga sala ci tsongwani. Kusukela lezvi, lava va nga ni vasati a va hanyise ku khwatsi a va navo,
30 lava va rilako a va mahise ku khwatsi a va rili, ni lava va tsakako va ku khwatsi a va tsaki, lava va xavako va ku khwatsi a va na nchumu,
31 ni lava va tirisako zva tiko va ku khwatsi a va zvi tirisi nguvhu; hakuva a matshamela ya tiko legi ma cica.
32 Kunene, ndzi lava lezvaku mu tlhatlheka ka kukarateka. A wanuna loyi a nga kala ku chadha i karatekela a zvilo zva Hosi, lezvaku i ta yi tsakisisa kuyini Hosi.
33 Kanilezvi a wanuna loyi a chadhileko i karatekela a zvilo zva tiko, lezvaku i ta mu tsakisisa kuyini a sati wakwe,
34 niku i avanyekile. A wasati a nga kala ku chadha, a ku patsa ni nhwana,* i karatekela a zvilo zva Hosi lezvaku a fela ku basa mirini ni moyeni wakwe. Kanilezvi a wasati loyi a chadhileko i karatekela a zvilo zva tiko, lezvaku i ta mu tsakisisa kuyini a nuna wakwe.
35 A ndzi wuli lezvo kasi ku mu bohelela, kanilezvi ndzi wulela ku mu vhuna ni ku mu hlanganyeta mu maha lezvi zvi faneleko ni ku tirela Hosi contlhe cikhati na mu nga colopetelwi hi nchumu.
36 Kanilezvi loku a wokari a alakanya lezvaku a nga ha zvi koti ku ti khoma hi ku tshama a nga chadhi, ni loku a hundzile ka tanga ya wun’wanana, i wa mahe lezvi a zvi lavako; i wa chadhe, a hi ciwonho.
37 Kanilezvi loku a wokari a hlambanyile mbilwini yakwe, na zvi nga mu karati a ku tshama a nga chadhi, na a zvi kota ku fumela kunavela kakwe, ni loku a tiyisile mbilwini yakwe a ku tshama a nga chadhi, i maha khwatsi.
38 Loyi a chadhako i maha khwatsi, kanilezvi loyi a nga chadhiko i maha khwatsi nguvhu.
39 A sati i bohilwe ka nuna wakwe loku a nuna wakwe a ha hanya. Kanilezvi loku a nuna wakwe afa, i tlhatlhekile ku chadha ni loyi a mu lavako, saseka lezvaku i wa chadhe ntsena Hosini.
40 Kanilezvi hi mawonela ya mina ndzi alakanya lezvaku i ta tsaka nguvhu loku a tshamisa zvezvo. Ndza kholwa lezvaku minawu ndzi na ni moya wa Nungungulu.
Mitlhamuselo ya lahasi
^ Ku nga lezvaku, a nga hlengeli masango ni.
^ Hi ciGreki: porneía. Wona Tlhamuselo wa magezu ya Bhibhiliya.
^ Kutani: “a boha ku hambana naye”.
^ Kutani: “kinisilwe ngoma; sirkusizawu; tlulisilwe ngoma”.
^ Kutani: “A ku kinisiwa ngoma; sirkusizawu; a ku tlulisiwa ngoma”.
^ A gezu ga ciGreki legi gi tirisilweko laha gi wula jaha kutani nhanyana a kalako a nga se hlengela masango ni munhu.
^ A gezu ga ciGreki legi gi tirisilweko laha gi wula jaha kutani nhanyana a kalako a nga se hlengela masango ni munhu.
^ Hi kukongoma: “va ta karateka nyameni”.
^ A nhwana wasati a kalako a nga se hlengela masango ni wanuna.
