1 Va Le Korinte 8:1-13
8 Xungetano hi zvakuga lezvi zvi phahlelweko zvifananiso, ndza mu tsalela ndziku: Ha zvi tiva lezvaku hontlheni ha yi tiva mhaka leyi. A kutiva ka vanga matshandza, kanilezvi a lirandzo la aka.
2 Loku munhu a alakanya lezvaku wa tiva nchumu wo kari, a nga se wu tivisa lezvi a faneleko ku wu tivisisa zvona.
3 Kanilezvi loku a munhu a randza Nungungulu, yaloye wa tiviwa hi yena.
4 Makunu xungetano hi kuga zvakuga lezvi zvi phahlelweko zvifananiso, ha zvi tiva lezvaku a cifananiso a hi ca nchumu ni lezvaku kova ni Nungungulu mun’we basi.
5 Hakuva hambu lezvi ku nga ni lava va wuliwako ku vanungungulu, kani hi le tilweni kani hi laha misaveni, kota lezvi ku nga ni “vanungungulu” vo tala ni “tihosi” to tala,
6 ka hina kova ni Nungungulu mun’we, a Papayi, loyi a zvilo zvontlhe zvi tako hi ka yena na hina hi vangelweko yena; ni Hosi yin’we, ku nga Jesu Kristu, loyi a zvilo zvontlhe zvi nga kona ha yena, na hina hi nga kona hi kota ya yena.
7 Hambulezvo a hi vontlhe va zvi tivako lezvo. Kanilezvi, a vokari lava a kale va nga tolovele zvifananiso, loku vaga a zvakuga zvi phahlelweko zvifananiso, a livhalo labye li nga tiyangiko la va kona.*
8 Kanilezvi a zvakuga zvi nga ta hi tshineta ka Nungungulu; loku hi ngagi a hi lahlekelwi hi nchumu, hambu loku higa a hi ganyi nchumu.
9 Hambulezvo, ti woneleni hakuva a kutlhatlheka ka n’wina ka ku hlawula lezvi mu zvi lavako ku nga tshuka kuva ribye ga ku wisa lava vo kala ku tiya.
10 Hakuva loku a wokari a wona wena loyi u zvi tivako na uga zvakuga lomu tempeleni ya zvifananiso, a livhalo la munhu loye a nga tiyangiko li nga taza li mu nyika hlana wa ku yenawu aga zvakuga zvi phahlelweko zvifananiso ke?
11 Wona lezvaku a makabye wa wena a nga tiyangiko, loyi Kristu a mu feleko, wa lova hi kota ya kutiva ka wena.
12 Loku u wonhela vamakabye va wena hi ndlela leyi ni ku bayisa a livhalo labye lo kala ku tiya, u wonhela Kristu.
13 Hikwalaho, loku a zvakuga zvi daya kukholwa ka makabye wa mina, ndzi nga ta haga nyama kambe, kasi ndzi nga dayi a kukholwa ka makabye wa mina.
Mitlhamuselo ya lahasi
^ Hi kukongoma: “la nyenyezisiwa”.
