1 Va Le Korinte 9:1-27
9 Kasi a ndzi tlhatlhekangi ke? A ndzi mupostoli ke? A ndzi wonangi Jesu a Hosi ya hina ke? N’wina a mu ntiro wa mina Hosini ke?
2 Hambu loku ndzi nga hi mupostoli ka van’wani, hakunene ndzi mupostoli ka n’wina! Hakuva n’wina mu karimbo yi tiyisako a wupostoli ga mina Hosini.
3 Ka lava va ndzi lamulako ndzi ngalo:
4 Kasi a hi na fanelo ya kuga ni kunwa ke?
5 A hi na fanelo ya ku fambafamba ni sati a kholwako, a ku fana ni lezvi a van’wani vapostoli, ni vamakabye va Hosi, na Khefasi,* va mahako ke?
6 Kutani hi mina ndzoce na Bharnabhasi, lava hi nga hiko na fanelo ya ku tsika a ku ti tirela ke?
7 Hi wihi musochwa a yako yimpini hi mali yakwe ke? Himani a byalako a simu ga mauvha a gumesa a ngagi mihandzu ya kona ke? Kona himani a risako ntlhambi a nga nwiko a masi* ya ntlhambi lowo ke?
8 Kasi lezvi ndzi zvi wulako zvova mawonela ya vanhu? A hi zvona lezvi a Nayo wu wulako ke?
9 Hakuva Nayweni wa Mosi ku tsalilwe lezvi: “U nga bohi nomu wa homu a cikhati leci yi hulako timbewu.” Mu alakanya ku Nungungulu o zwela tihomu basi ke?
10 A nga wuli lezvo hi kota ya hina kambe ke? Kunene zvi tsalilwe hi kota ya hina, hakuva loyi a rimako ni loyi a hulako va fanele ku tira na va tsumba lezvaku va ta kuma cokari.
11 Makunu loku hina hi byalile zvilo zva moya cikari ka n’wina, zvi bihile a ku n’winawu mu hi vhuna hi ka nyama ke?
12 Loku a van’wani va hi ni fanelo leyo cikari ka n’wina, a ha ha wuli hi hina! Hambulezvo, a hi yi londzowotangi fanelo leyo, kanilezvi ha timisela zvilweni zvontlhe kasi ku ngavi na nchumu wu vhalelako mahungu ya ma nene ya Kristu.
13 Kasi a mu zvi tivi lezvaku lava va tirako tempeleni vaga zvilo zva lomu tempeleni, ni lezvaku lava va tirako alatini va amukela cokari alatini ke?
14 Hikwalaho, a Hosi yonawu yi leletele lezvaku lava va chumayelako mahungu ya ma nene va wa hanye hi mahungu ya ma nene.
15 Kanilezvi mina a ndzi mu kombelangi nchumu. Hambulezvo a ndzi mu tsaleli timhaka leti kasi mu ndzi mahela nchumu, hakuva i chukwana ndzifa a ku hundza ku tekelwa zvigelo lezvi zvi ndzi mahako ndzi ti dzundza!
16 Makunu loku ndzi chumayela a mahungu ya ma nene, a ndzi na cigelo ca ku ti kulisa, hakuva hi zvalezvo ndzi faneleko ku maha. Kunene i khombo ka mina loku ndzi nga chumayeli a mahungu ya ma nene!
17 Loku ndzi chumayela hi kuzvirandza, ndzi ta chachazelwa; hambu loku ndzi nga chumayeli hi kuzvirandza, a ntiro wona ndzi sina ndzi nyikilwe.
18 Hi yihi a hakhelo ya mina ke? Hi lezvaku loku ndzi chumayela mahungu ya ma nene, a ndzi xaviseli munhu, kasi ndzi nga hlakani hi ntamu* lowu ndzi nga nawo ka mahungu ya ma nene.
19 Hakuva hambu lezvi ndzi nga tlhatlhekile ka vanhu vontlhe, ndzi no ti maha nandza ga vontlhe, kasi ndzi fela ku kuma votala.
20 Ka vaJudha ndzi wa ku khwatsi ndzi muJudha, kasi ndzi fela ku kuma vaJudha; ka lava va nga lahasi ka nayo, ndzi wa ku khwatsi ndzi lahasi ka nayo, kanilezvi na ndzi nga hi lahasi ka nayo, kasi ndzi fela ku kuma lava va nga lahasi ka nayo.
21 Ka lava vo kala nayo, ndzi wa ku khwatsi a ndzi na nayo, na ndzi nga hi loyi wo kala nayo ka Nungungulu, kanilezvi na ndzi hi ni nayo ka Kristu, kasi ndzi fela ku kuma lava vo kala nayo.
22 Ka lava va gome, ndzi wa ku khwatsi ndzi na ni gome, kasi ndzi kuma lava va gome. Ndzi no ti maha zvontlhe ka vanhu vontlhe, kasi hi ku maha lezvo ndzi fela ku hanyisa vokari.
23 Kanilezvi ndzi maha zvontlhe lezvo hi kota ya mahungu ya ma nene, kasi ndzi ma kanela ka van’wani.
24 A mu zvi tivi lezvaku lava va palisanako ku tsutsuma va tsutsuma vontlhe, kanilezvi mun’we basi a kumako nchachazelo ke? Tsutsumani a ku fana na yena, kasi mu fela ku wu kuma.
25 Vontlhe lava va palisanako va ti khoma zvilweni zvontlhe. Kunene, va maha lezvo kasi va kuma cidlodlo* ci lovako, kanilezvi hina hi tirela leci ci nga loviko.
26 Hikwalaho, a ndzi tsutsumi nyamutsutsume; ni zvibhakela zva mina a ndzi zvi hoxeli kuba moya;
27 kanilezvi ndza tsayisa miri wa mina, ndzi wu fambisa kota khumbi, kasi ku nga maheki lezvaku loku ndzi chumayele van’wani, mina wutsumbu ndzi hoxiwa.
Mitlhamuselo ya lahasi
^ Loyi a gin’wani vito a nga Pedro.
^ Kutani: “leti”.
^ Kutani: “tifanelo”.
^ Kutani: “korowa”.
